OKHUBISULA 13 - EBAIBO INZIENUKHU

Libisulo lietsisolo tsibili

¹ Khandi ndalola esolo nerulanga munyanza. Yali netsinzika likhumi nende emirwe chine nachitaru; khu siolwika lwayo khwali khwo nende olusimbi, khandi khu siomurwe kwayo khwali khwo neliira eliokhunyeka Nyasaye.

² Esolo tsana yafwana singa ingwe. Ebilenje biayo biali singa ebie eliaka ne omunwa kwayo kwali singa omunwa kwesimba. Ne ebaka yahelesia esolo obukufu bwayo, noluruba lwayo nobunyali bwayo obukali.

³ Omurwe kwe esolo tsana mulala kwafwana singa okukhupilwe olukuma, ne olukuma tsana lwali niluhon'ne. Abomusibala bosi bachenya ma nibalonda esolo.

⁴ Abandu bosi bekayakaya ebaka sichila yali nehelesisie esolo obunyali bwayo. Khandi bekayakaya esolo nibaboola, “Niwina owakhafwana singa esolo? Niwina owakhalwana nende esolo?”

⁵ Esolo yahebwa omunwa okhwepaaka nende okhuboola amang'ana akokhunyeka Nyasaye, khandi yahuchil'lwa okhuba nobunyali khulwe emiesi amakhumi kane nachibili.

⁶ Nechiaka okhunyeka Nyasaye, nende eliira lilie, habundu aha amenyanga nende yabo bosi abamenyanga mwikulu.

⁷ Khandi yahebwa omunwa okhulwana lihe nende abandu ba Nyasaye nokhubaleka. Nyasaye yachiha obunyali khu siolwibulo nende abandu nende olulolomo nende sioluyia.

⁸ Abandu bosi abamenyanga musibala balachiekayakaya; nibarali yabo aba amera kabwe kahandikwa esibala nisisili okhulombwa musitapu esia abali mwoyo esie Simeme Sielikondi esiali okhwirwa.

⁹ “Omundu naba nali nesirwi ahulile!

¹⁰ Omundu wosi naba niyalalilwa okhuhambwa okhwola ahambwe; owalalilwa okhwirwa nolukanga okhwola yerwe nolukanga. Yaka kamanyinjia mbu abandu ba Nyasaye okhwola babe nokhwetinyilisia nende obusubili.”

¹¹ Khandi ndalola esolo yindi nerulanga musibala muusi. Yali netsinzika tsibili singa tsinzika tsie Esimeme Sielikondi, ne yal'loma singa ebaka.

¹² Yarumikhila obunyali bwosi obwe esolo eyokhuranga imbeli wayo. Yanichilisia esibala nabamenyele mwo okhwekayakaya esolo yokhuranga eyo olukuma lwayo lwali niluhon'ne.

¹³ Esolo yakhabili iyo yakhola akamangalimwa amakali; yachemela omul'lo okhwikha okhurula mwikulu okhwitsa khusibala mumoni mwabandu.

¹⁴ Yakaata abandu bosi abamenyanga khusibala khulwa akamangalimwa aka yahuchil'lwa okhukhola imbeli wesolo yokhuranga. Esolo iyo yababool'la balombe esiniini esiokhuhaana oluyali khu esolo eyali okhusalisibwa nolukanga ne siyafwa tawe.

¹⁵ Esolo yakhabili yahuchil'lwa okhuha esiniini siesolo emiya chiobulamu, mbu esiniini tsana sil'lome khandi siire bosi abasulanga okhwekayakaya esiniini sie esolo.

¹⁶ Esolo tsana yanichilisia abandu bosi, abati na bakali, abahinda na batakha; ababohe na balakhuule, okhurebwa khwo olung'ole khumakhono kabwe amalunji, nohomba khubweni bwabwe.

¹⁷ Siyaliho omundu onyala okhukula nohomba okhukusia narali oli nolung'oole yenyene; nalwo neliiraliesolo nohomba amabalo keliira liayo.

¹⁸ Okhwola mube abachesi okhumanyilisia yaka. Oli nobuchesi anyala okhubisula esifune siamabalo kesolo iyo, sichila namabalo kesifune siomundu nalebe. Amabalo yako netsimia tsisasaba, amakhumi kasasaba na kasasaba.