OKHUBISULA 12 - EBAIBO INZIENUKHU

Omukhasi nende Ebaka

¹ Khandi esilolelo esikali esiokhuhuka sialolekha mwikulu. Yaliho omukhasi owe inguboye yali eliuba ne omwesi nikuli isi webilenje bibie, ne olusimbi lwetsiyasulwe likhumi natsibili lwali khumurwe kukwe.

² Yali niyabelekha ne yalakaya butinyu olwa yenya okhwibula.

³ Khandi esilolelo sindi sialolekha mwikulu. Ebaka inzakhanyu ingali yaliho. Yali nemirwe chine nachitaru nende tsinzika likhumi, ne khu siomurwe kwayo, khwalikhwo nende olusimbi.

⁴ Omusila kwayo kwakhwesa esitonye esinabitaru sietsinyininyini tsiokhwikulu nikutsifuuba khusibala. Ebaka tsana yasinjila imbeli womukhasi owali nali ahembi okhwibula mbu nyinga nabe niyebuye, nemile omwana uwe.

⁵ Omukhasi tsana niyebula omwana omusiani owitsa okhwamiha khutsimbia tsiosi nende elabusi yesibia. Ne omwana tsana yakamulwa nahilwa khu Nyasaye nende khuluruba lulwe.

⁶ Omukhasi naye yelukha natsia musitsiimi, aha Nyasaye yamulombela obukono aha yakhafiitwe khulwa amatukhu elefu ndala tsimia tsibili namakhumi kasasaba.

⁷ Ma lihe ndibukha mwikulu. Mikaeli nende abamalaika baabe balwana nende ebaka; ne ebaka yalwana halala nende abamalaika bayo;

⁸ nebutswa ebaka yalekwa, ne siyahuchil'lwa halala nabamalaika bayo okhumenya mwikulu khandi tawe.

⁹ Ebaka ingali tsana yafuubwa hasi nayo neinzokha khulu, elangwanga Es'sieno nohomba Setani owakaata esibala siosi. Yafubwa hasi khusibala halala nende abamalaika baabe bosi.

¹⁰ Ma nimbulila omwoyo omukali mwikulu nikuboola mbu, “Luno obuhonia bwa Nyasaye bwitsile! Luno Nyasaye umanyisie obunyali bubwe singa omuruchi! Luno Masihi uwe umanyisie obunyalibwe! Okhuba Setani osinjilanga imbeli wa Nyasaye wefwe nayaala abasubili basiefwe obutukhu nom'basu ufuubilwe okhurula mwikulu!”

¹¹ Abaana befwe baleka Setani khulwa amatsahi ke Simeme Sielikondi nende khulwa amang'ana aka bakambanga; ne bali aberechekhu okhuhaana obulamu bwabwe nende okhufwa.

¹² Khusifune yisio musangale inywe mwesi abamenyanga mwikulu! Nebutswa balitsiboolelwa yabo abamenyanga khusibala nende munyanza. Okhuba Setani wikhile okhwitsa khwinywe mwirima likali, sichila umanyile mbu asili butswa nende inyinga indututu.

¹³ Olwe ebaka tsana yalola mbu ifuubilwe hasi khusibala, yachiaka okhulondechel'la omukhasi owali niyebuye omwana omusiani.

¹⁴ Nebutswa omukhasi tsana yahebwa tsimbaha tsibili etsie inditsu ingali, apulukhe okhurula khubaka iyo okhutsia musitsiimi, mubukono bubwe aha nalindwe bulahi khulwa emihika chitaru nende enusu.

¹⁵ Ne ebaka tsana yafutsa okhurula mumunwa kwayo amaatsi singa omuchela khumukhasi mbu amaatsi kamuhile.

¹⁶ Nebutswa esibala siahabina omukhasi; siekula omunwa kwasio nisimila amaatsi akebaka yali nefutsile.

¹⁷ Ebaka tsana nehambwa noburima khumukhasi ma netsia okhulwana nolwibulolwomukhasi olwali nilusikaye, khu yabo bosi abafumilanga amalako ka Nyasaye khandi abali abasubilwa khubwatooto obwa Yesu yabisula. Ebaka tsana nesinjila khumuyekhe kwe inyanza.