OKHUBISULA 1 - EBAIBO INZIENUKHU

¹ Yaka namang'ana akebindu ebia Yesu Kristo yabisula. Nyasaye yamuha okhubisula yikhu mbu amanyie abarumikhi baabe ebindu ebikhoyele okhwekhola matetekhana. Kristo yaribula amang'ana yaka khu Yohana omurumikhi uwe olwa yaruma om'malaika uwe khuye,

² ne Yohana yabool'la abandi kosi akayalola. Yibu nobukobokheli bwa amang'ana ka Nyasaye nende obwatooto obwa Yesu Kristo yabisula.

³ Noweikhabi omundu osomanga butinyu amang'ana kesitapu yisi, khandi nabeikhabi yabo abarechelesianga amang'ana koburoobi yibu nibafumila amang'ana akahandikwa musitapu yisi! Okhuba inyinga eli ahembi olwa amang'ana yako nakekhole.

Amasiesi ka Yohana khu amakanisa kane nakataru

⁴ Ise Yohana mandichilanga amakanisa kane nakataru akali Asia. Esirenda sibe khu inywe nende emilembe okhurula khu Nyasaye oliho, owalinjiho khandi owitsanga; nokhurula khu emioyo chine nachitaru echili imbeli woluruba lulwe,

⁵ nokhurula khu Yesu Kristo omukobokheli omusubilwa, owokhuranga okhusimukusibwa okhurula mubafu niye khandi omukhongo wabaruchi besibala. Ye wakhuyanza ifwe, ma wakhuboholola ifwe okhurula mutsimbi tsiefwe khulwo okhufwa khukhwe

⁶ nakhukhola okhwamiha n'naye singa abesaalisi abarumikhilanga Nyasaye uwe khandi niye Samwana. Obukhongo nobunyali bube khu Yesu Kristo inziayo. Amina.

⁷ Lola, yetsanga mumalumbesi! Siomundu wosi alimulola kata nende yabo abamwira. Abandu bosi abokhusibala balekhuula khulwa ye. Nambwo kakhabe! Amina.

⁸ “Ise ndi owokhuranga khandi owokhumalilikha,” Omwami Nyasaye Owokhunyala Biosi aboolanga niye oliho, owalinjiho khandi owitsanga!

Esilolelo sia Kristo

⁹ Ise ni Yohana omwana wenywe, ne singa omulondi wa Yesu ndi omusanji halala n'nenywe mukhwetinyilisia misiloli esinyoolanga yabo abali abo Bwami bwa Nyasaye. Ndabohelwa musikhalachinga sia Patimo khulwa okhulandia ling'ana lia Nyasaye nobwatooto obwa Yesu yabisula.

¹⁰ Ndali nindi mu Mwoyo Khwitukhu lio Mwami, nimbulila inyuma wanje omwoyo omukali singa okwolwika

¹¹ nikuboola, “Handika kosi akololanga musitapu ma orume esitapu tsana khumakanisa kane nakataru yaka: Efeso, Simurina, Perigamo, Tsuatira, Saride, Filadelifia nende Laodikia.”

¹² Nase ndasukhana mbu ndole owali nal'lomanga n'nase, ma nindola ebihani bietsitaya bietsahabu bine nabitaru,

¹³ ne hakari mubio, ndalola mulala ofwana singa omundu, niyebikhile ingubo okhwola khubisisilo, niyebohele olukhoba lwetsahabu musilifusie.

¹⁴ Liswi lilie liali lilafu tser're singa etsaluji, ne tsimonitsie tsiakha nolumemo singa omul'lo;

¹⁵ ne ebilenjebie biakha singa omukasa okusiyilwe m'mul'lo, ne omwoyo kukwe kwali omukali singa okhuhoola khwamaatsi amenji.

¹⁶ Yali netsiyasulwe tsine natsitaru m'mukhonokwe omusaatsa, ne olukanga olwochi tsimbeka tsibili lwarula m'munwa kukwe. M'moni mumwe mwakha singa eliuba elibalanga mungufu tsialio.

¹⁷ Olwa ndamulola, ndakwa hasi mumakulu kaake singa omufwe. Nara omukhono kukwe omusaatsa khu ise, naboola, “Oraria tawe! Ise ndi owokhuranga khandi owokhumalila.

¹⁸ Ise nise olimwoyo! Ndali okhufwa nebutswa luno ndi mwoyo inziaiyo. Ndi nobunyali khulufu khandi khu Emakombe.

¹⁹ Kho ohandiike amang'ana akoluutsi, yako akaliho luno nende yako akanaketse okhwekhola inyuma we yako.

²⁰ Lino nilio libiso elietsiyasulwe tsine natsitaru etsia waali okhulola mumukhono kwanje omusaatsa nende ebihani ebietsitaya bine nabitaru. Etsiyasulwe tsine natsitaru nabamalaika abalind'e amakanisa kane nakataru, ne ebihani bine nabitaru namakanisa kane nakataru.