NAHUMU 1 - EBAIBO INZIENUKHU

¹ Kano namang'ana akal'lomanga khwitookho lia Nineve. Amang'ana tsana ketsela mumabisulo khu Nahumu owarula Elikoshi.

Oburima bwo OMWAMI khwitookho lia Nineve

² OMWAMI ni Nyasaye weimbalikha khandi owokhurunjia es'sialia. OMWAMI ahaananga esinyasio khubasuku baabe, mwirimalia abarungianga es'sialia.

³ OMWAMI satilwanga noburima bwangu tawe, nebutswa nowetsingufu tsinyinji, ne saabulanga okhuhaana esinyasio khubakholi bobubi tawe. Imbumbuyeka okhuhutsa echaakanga aho MWAMI achendanga, ne amalumbesi kali singa olukhuukhi oluchingilwanga mubilenje bibie!

⁴ OMWAMI alakanga inyanza okhukhama, nayo nekhama! Akhamianga emichela chiosi. Emikunda chiesibala sia Basani chiomanga, Esikulu sia Karimeli sihangal'langa, ne amahuwa ka Lebanoni kaniala.

⁵ Ebikulu ebikali bitekelanga imbeli wo MWAMI; ebikulu ebiti bikhamulukhanga imbeliwe. Liloba lirenganga olwo MWAMI alolekhanga; esibala nasio sitechela halala nabandu bosi abalimwo.

⁶ Niwina onyala okhuhonokokha khulileko lilie? Niwina onyala okhuhonokokha khuburima bubwe? Oburima bubwe burula esioba singa omul'lo, tsinyanda tsitubukhanga singa olukhuukhi imbeli uwe.

⁷ OMWAMI nomulahi; asoolanga abandu baabe munyinga tsiamanyakhano; alindanga yabo abetsanga khuye.

⁸ Singa omukhula omukali kwamaatsi, OMWAMI amumanga abasukube bosi; yeranga yabo bosi abamufukulanga.

⁹ Inywe abandu ba Nineve! Nisina esia muloosianga okhukhol'la OMWAMI esibi? OMWAMI alamwira inywe. Abulaho omufukulanga okhuyomba l'lala.

¹⁰ Singa omahwa kabohana khandi singa amakata akooma, inywe abanywi namusambwe pe!

¹¹ Okhurula mwibe litookho lia Nineve, yaliho omundu owaloosinjia tsinjila tsimbi etsia masilisi etsiokhwira OMWAMI.

¹² Kano niko ako OMWAMI abool'langa abandube ba Isiraeli, “Kata ngali mbu abandu ba Asiria nabetsingufu, khandi nabenji, naberwe ma nababuleho. Abandu banje, ndalekha nimunyakhana, nebutswa khandi sinakholekhwo mbwo tawe.

¹³ Luno khandi abandu ba Asiria sinabamurukekhwo tawe. Mal'le okhukhalaka eminyol'lo chimuhambanianga n'nabo.”

¹⁴ Kano niko ako MWAMI yali okhukhalachila abandu ba Asiria, “Sibakhabekhwo nende abetsukhulu abakhachile eliira liabwe lilatsilil'le okhulangwa tawe. Nanyononie ebiniini biabara mutsihekalu tsiabanyasaye babwe. Ise rechekhanga ebilindwa biabandu ba Asiria. Sibakhoya babe mwoyo tawe.

¹⁵ “Henge, omurumwa arulanga mubikulu naleera amang'ana amalahi! Ali khunjila yetsanga okhulandia akobulechi. Abandu ba Yuda mwesangasie mumasabo kenywe nende okhuhaana khu Nyasaye ebiamwesuha okhumuhaanila. Abasiamu sibakhaseere liloba lienywe khandi tawe. Bamal'le okhwirwa bosi pe.”