MIKA 7 - EBAIBO INZIENUKHU

Ifwo imbi ya Isiraeli

¹ Kano nakabutswa! Ise fwana omundu oli neinzala onyoolanga amatunde kosi nikanokelwe khumusaala khandi tsinzabibu tsiosi nitsinokelwe khumisabibu. Tsinzabibu tsiosi nende emiseituni emielungu tsiosi tsianokwa tsiosi pe.

² Abulaho omundu wosi osinjilanga khukatooto owasikala musibala, khandi abulaho oli omusubilwa khu Nyasaye. Buli mundu alindil'langa okhunyoola obweyangu bwokhwira. Buli mundu ahimanga abandu beinyumbaye yene.

³ Bosi nabasitsa bokhukhola amabi. Abemeli nende abakhalachi bemise bareebanga okhuhebwa ebihetso. Omundu wobunyali ababool'langa akayenyanga, ma khulwako baloosianga amabi halala.

⁴ Oli omulahi khubo afwana singa lirakalu, oli omukol'lokhu afwana singa olukaka lwamahwa; Litukhu liol'le olwa Nyasaye nahelesie abandu esinyasio singa obwa yali okhubachetsiyia okhubir'ra mubalindi babwe abaroobi. Luno bali mungoyani.

⁵ Orasubila owasio nohomba kata omulina uwo tawe. Obe omuchesi kata khukobool'langa omukhasiwo.

⁶ Mumatukhu kano abasiani bachaayanga abasamwana ne abakhaana bafukulanga abanyina, ne abakhasi ababuukha basoolananga nende abanyakhusala babwe. Abasuku bomundu nabeinyumbaye bene.

⁷ Nebutswa ise namenge khu MWAMI, nanindil'le Nyasaye omuhonia wanje; Nyasaye wanje nayambulile.

OMWAMI yakhaleere obuhonia

⁸ Abasuku befwe babula esifune siokhusangal'la eminyakhano chiefwe. Kata nikhuba nikhukwiye hasi, nakhubuukhe; kata nikhuba nikhuli musiilima luno, OMWAMI alakhuhelesia obulafu.

⁹ Khwakhola tsimbi imbeli wo MWAMI, kho luno okhwola khwefwile oburima bubwe khulwamatukhu mati. Nebutswa mukhumal'likha yakhakhusoole khandi yakhahinieho amabi kakhwakhol'lwa. Yakhakhuleere mubulafu; khwakhamenye okhwola olwa khulilola nakhuhonianga.

¹⁰ Ma abasuku befwe bakhakalole ma basimbe emirwe, abasuku yabo abareebanga amareebo keinzekhelesi mbu, “OMWAMI Nyasaye wenywe ali hena?” Ifwe nakhulole nibalekelwe nibaseneywe hasi singa amatohi khumihanda.

¹¹ Inywe abandu ba Yerusalemu, inyinga yokhwombokha amasisi kelitookho obuhia yitsanga. Olwene yilio liloba lienywe liakhabambukhe.

¹² Abandu benywe bakhakalukhe khwinywe okhurula buli habundu. Bakhakalukhe okhurula Asiria elili ebukwe, okhurula Emisiri elili enandete okhurula mulusoma lwa Efurate, okhurula mutsinyanza etsili ehale nende ebikulu ebili ehale nehale.

¹³ Nebutswa esibala siakhakwe esitsiimi khulwo obubi bwabandu abamenyangamwo.

Tsimbabasi tsio MWAMI khu Isiraeli

¹⁴ Obe omwayi wabandubo, E OMWAMI, abandu aba wali okhwahula. Kata nikali bamenyanga bonyene musitsiimi, khuliho neliloba linolu ahembi n'nabo. Lekha batsie okhwaya mubikuuri biobwayilo obulahi obuli Bashani nende Gileadi, singa obwabakholanga khale.

¹⁵ Okhukhol'le akamangalimwa OMWAMI singa obwa wakhola olwa wakhuhiinia Emisiri.

¹⁶ Amahanga kalalola yaka ma kasimbe omurwe, kata olwa kali netsingufu tsinyinji. Kalayungubala ma keekale eminwa chiako nende amarwi kaako.

¹⁷ Kalamoola mulukuukhi singa tsinzokha. Kalarula mutsiminga tsiako nikatechelanga khandi nikariiye. Kaleetsa khu MWAMI Nyasaye wefwe muburi obukali.

¹⁸ Abulaho nyasaye undi singa ibe E OMWAMI; olekhelanga tsimbi tsiabandubo abasili mwoyo. Siohambwanga noburima khulwe inziayo tawe, nebutswa osangal'langa okhukhumanyia obuyanzibwo oburalilu.

¹⁹ Olakhubeela tsimbabasi khandi. Nosen'netsimbi tsiefwe hasi mubilenjebio notsifuuba mulwalo lweinyanza.

²⁰ Nomanyie obusubilwabwo nende obuyanzibwo oburalilu khubandubo, abolwibulo lwa Aburahamu nende Yakobo singa obwa wasubisia abakuka befwe okhurula khale nakhale.