MIKA 2 - EBAIBO INZIENUKHU

Esinyasio siabandu abakhupianga abamanani esibi

¹ Balitsiboolelwa yabo abaloosianga amang'ana amabi nibakon'ne khubitanda biabwe. Olwa busietsanga mukamba tsuli, buli olwa banyoolangwa obweyanga ne bakhola amabi kababetsanga nibaloosisie.

² Nibaba nibakhenya emikunda, bachinuulanga bunuula; ne nibakhenya tsinyumba, ne bachibukula. Bakhupianga omundu nende abeinyumbaye esibi, khandi babukulanga omundu nende emianduchie.

³ Khulwe yako, kano niko ako MWAMI aboolanga: “Ndosianga okhuleera likhupako khwinywe, ne sinamuhonokokhe mulio tawe. Namunyoole abene nimuli mumanyakhano, ne sinamuchende nimwekhonya khandi tawe.

⁴ Olwe litukhu yilio liakhoole, abandu bakharumikhile likhupako yilio singa esifwanani, ne bakhembe olwembo lwokhufwisia omwoyo khu akekholekha khwinywe nibaboola mbu, ‘Ifwe khwamala okhusaalisibwa kupu! OMWAMI wakhunuula liloba liefwe, ma wahelesia yabo abakhuhila mubuhambe.’ ”

⁵ Khulwe yako, olwe inyinga yakhoole eyokhukalusisia abandu ba Nyasaye liloba liabwe inywe simwakhanyoolekhwo omukabwa kwosi tawe.

⁶ Abandu bambool'langa mbu, “Orakhukambila tawe. Orakamba yako kosi tawe. Nyasaye siyetsa okhukhusimbia omurwe tawe.

⁷ Opaalanga abandu ba Isiraeli bali musilaamo noho? Mbula OMWAMI yakhalekha okhwefwila noho? Mbula yakhakhola akafwana yaka noho? Ye sial'lomanga bulahi khu yabo abakholanga amalahi?”

⁸ OMWAMI nakalusia mbu, “Inywe museeranga abandu banje singa abasuku. Abasaatsa bakalukhanga okhurula mubulwani nibapaala bali nomulembe ingo, nebutswa inywe mubalindil'langa okhwiba amakoti kabebiikhile.

⁹ Mukhunganga abakhasi babandu banje okhurula mutsinyumba tsiabwe etsiabayanza, khandi mwanuula abaana babwe tsikhabi tsianje khulwe inziayo!

¹⁰ Sinjile mutsie; omulembe sikusiliho tawe. Tsimbi tsienywe tsiafwabia habundu hano ma nikachila nihamumwa.

¹¹ “Abandu bano bayanza omuroobi owetsula nobubehi nende obukaati, oboolanga mbu, ‘Roobanga mbu ewaini nende amalwa nabibe ebinji khulwe inywe.’

¹² “E inywe abandu ba Isiraeli abasikala, naamubunjelesie halala! Naamubunjelesie singa amakondi akakalukhanga musikuuli siako. Singa esikuuri siobwayilo esitsuyemwo amakondi, nimbwo esibala sienywe siakhetsulemwo nabandu banje khandi.”

¹³ Nyasaye yakhabeekul'le injila nabemel'la okhurula mubuhambe. Bakhafunake ebilibwa bielitookho nibarulamwo nibali abalakhuule. Omuruchi wabwe ouli OMWAMI mwene yakhabemel'le okhurulamwo.