MATAYO 28 - EBAIBO INZIENUKHU

Okhusimukukha kwa Yesu

¹ Ne olwe litukhu lie Sabato liali nilihweye, nibusietsanga mumabwebwe khwitukhu liokhuranga lielihonga, Mariamu Magadalena nende Mariamu undi batsia okhulola esilindwa.

² Ne matetekhana khwaliho okhutechela khwesibala okhukali; om'malaika wo Mwami yekha okhurula mwikulu, niyetsa nakongomia lichina elubeka, niyekhala khwo.

³ Ne likondo lilie liali singa oluheni, ne tsingubo tsitsie tsialaba tser're singa etsaluji.

⁴ Abalindi yabo khulwo oburi, batechela nibakwa hasi nibafwana singa abafu.

⁵ Om'malaika nababool'la abakhasi yabo, “Simukwana okhuria tawe, okhuba manyile murunanga Yesu owabeye okhubambwa.

⁶ Siali hano tawe; yali okhusimukukha singa obwa yaboola. Yitse mulole habundu aha yali okhurebwa.

⁷ Mutsie bwangu mubool'le abechi baabe usimukukhile okhurula mubafwa; ne lole, umuranjiliye okhutsia Galilaya; namumulole yo. Ne mwitsul'le ake ise mubooleye.”

⁸ Nibarula bwangu hasilindwa noburi obutsokan'nemwo obusangali obukali, nibelukha okhutsia okhumanyia abechi baabe.

⁹ Ne lola Yesu yakaana n'nabo nababool'la, “Emilembe.” Nibesunda ahembi, nibatila khubilenje bibie, nibamusikamila.

¹⁰ Ma Yesu nababool'la mbu “Muraria tawe; mutsie mubool'le abaana befwe batsie Galilaya, nabanyoole yo.”

Aka abalindi baboola

¹¹ Olwa abakhasi bali mbali mwitsia lola abalala khubalindi nibatsia mwitaala nibamanyia abesaalisi abakhongo kosi akali nikekhol'le.

¹² Abesaalisi abakhongo bakana nibebunjelesisie nende abakhulundu, ma nibaloosia amang'ana ma nibaha abasikari efetsa inyinji.

¹³ Mbaboola, “Muboole mbu abechi baabe bayitsile butukhu nibamwiba olwa khwabeye nikhukonanga.

¹⁴ Ne amang'ana yaka ngaba nikahul'likha imbeli wo Mukafuna khulal'loma n'naye, okhumuhinia khwo esihenda mwoyo sienywe.”

¹⁵ Babukula efetsa tsana, nibakhola singa bali nibebaaliywe. Ma ling'ana yilio lialanda mu Buyahudi mwosi okhwola leelo.

Yesu yalolekha khubechi baabe

¹⁶ Abechi likhumi namulala batsia khusikulu sia Galilaya aha Yesu yali nabalachile mbu nabatsie.

¹⁷ Olwa bamulola bamusikamila nibamwekayakaya, ne kata mbwo abalala khubo bali nende honzoni.

¹⁸ Yesu yesunda khubo nababool'la, “Ndahebwa obunyali bwosi mwikulu nende musibala.

¹⁹ Khulwe yako mutsie mukhole abetsimbia tsiosi okhuba abechi banje mubabaputise muliira lia Papa nende Omwana nende Omwoyo Omutsienukhu;

²⁰ ne mubebaal'le okhufumila amang'ana kosi aka ndali okhumulaka, ne lole, ndiba n'nenywe amatukhu kosi, kata okhwola khusihesi siesibala.”