MARIKO 7 - EBAIBO INZIENUKHU

Amebaalo kabakuka

¹ Abalala khu Bafarisayi nende abebaali ba Malako abali nibarul'le Yerusalemu bebunjikha imbeli wa Yesu.

² Balola mbu abalala khubechi baabe balitsanga ebiokhulia namakhono amamwamu, nibaresaabile tawe.

³ (Sichila Abafarisayi nende Abayahudi bandi bosi balondanga amebaalo kabakhulundu babwe: sibalitsanga esindu nibaresaabile amakhono kabwe munjila ekwan'ne tawe.

⁴ Khandi sibalitsanga esindu siosi okhurula musiiro nisirasaabilwe mbelio tawe. Khandi chialiho emiima chindi echiabalondanga, singa okhusaaba ebisanda, tsindabu, nende ebifuria.)

⁵ Kho Abafarisayi nende abebaali ba Malako nibareeba Yesu, “Busina abechi baabo sibalondanga emiimo echiakhwalekhelwa nabakhulundu befwe tawe, nebutswa balitsanga namakhono kam'misu?”

⁶ Yesu nabakalusia, “Inywe abakalama, Isaya yali okhurooba habwene khwinywe, olwa yahandika: ‘Nyasaye aboolanga, abandu yaba bangohanga neminwa chiabwe nebutswa emioyo chiabwe chili ehale khwise.

⁷ Okhundekayakaya khwabwe nokhwabutswa, sichila bebaalanga amalako kabandu ol'la namalako kanje!’

⁸ “Inywe mulekhanga lilako lia Nyasaye nimulonda amebaalo kabandu.”

⁹ Yesu natsilil'la okhuboola, “Inywe muli neinjila eyalukano eyamusul'langamwo lilako lia Nyasaye khulwa okhulonda amebaalo kenywe abene.

¹⁰ Okhuba Musa yalaka, ‘Ohelesie papawo nende mamawo oluyali,’ khandi ‘Uyo onyekanga samwana nohomba nyina, okhwola yerwe.’

¹¹ Ne inywe mwibaalanga mbu, omundu niyakhaba nesindu esiayakhakhonyele samwana nohomba nyina, nebutswa aboole esindu yisio ni Koribani (akaboolanga nesihanwa sia Nyasaye),

¹² kho sahachibwanga khandi okhukhonya samwana nohomba nyina tawe.

¹³ Nimbwo inywe muchiayanga ling'ana lia Nyasaye khulwa mebaalo akamukambilanga abandi. Khandi kaliho amenji akamukholanga akafwana singa yaka.”

Ebindu ebifwabianga omundu

¹⁴ Yesu khandi yalanga omukanda kwabandu, nababool'la, “Mumbul'le mwesi, ma mumanyilisie.

¹⁵ Sibulaho esindu esinjilanga m'mundu okhurula esioba esinyala okhumwononia. Nebutswa esirulanga m'mundu nisio esimwononianga. [

¹⁶ Oli namarwi kokhuhul'la, ahul'le.]”

¹⁷ Olwa yalekha omukanda kwabandu ma niyenjila munyumba, abechi baabe bamureba esifune siolukano yilwo.

¹⁸ Naye nababool'la, “Nenywe khandi musili okhumanyilisia? Simumanyile mbu esindu esinjilanga mumundu okhurula esioba sisinyala okhumufwabia tawe?

¹⁹ Okhuba sisimwinjilanga m'mwoyo tawe, nebutswa sinjilanga munda ma sirula esioba khandi.” (Mukhuboola yaka Yesu yamanyianga mbu ebiokhulia biosi nebisiyikhu.)

²⁰ Natsilil'la okhuboola, “Esirulanga m'mundu nisio esifwabianga omundu.

²¹ Sichila okhurula mukari, mumwoyo kwomundu, karulangamwo amakani amabi akamwemel'langa khubusoti, obwibi, obwiri,

²² obuheyi, obulangu, obubi bwosi, obubehi, obusambale, esikhayilwe, obunyekani, obwekhonyi nende obuhingwa.

²³ Yibio biosi birulanga m'mundu mukari, ma nibio ebimwononianga.”

Obusubili bwomukhasi Omusurofoinisia

²⁴ Yesu yarulaho natsia mulukongo lwa Turo. Niyenjila munyumba nalebe ne siyayenya omundu wosi amanye tawe; nebutswa siyanyala okhwebisa tawe.

²⁵ Omukhasi owomukhaanawe yali nomwoyo kwesifwabwi, yahul'la oluyali lwa Yesu, ma niyetsa khuye bwangu, nakwa habilenjebie.

²⁶ Omukhasi uyo yali Omuyunani, owoluyia lwa Surofoinisa. Namuhomba Yesu ahinie es'sieno m'mukhanawe.

²⁷ Yesu namubool'la, “Lekha abaana barange okhwikura; sichila sibuli obulahi okhubukula ebiokhulia biabaana okhufubila tsimbwa tawe.”

²⁸ Omukhasi uyo nakalusia naboola, “Nakahabwene, Omwami, nebutswa kata tsimbwa etsili hasi wemesa tsilitsanga ebiokhulia biabaana ebisasikhanga.”

²⁹ Yesu namubool'la, “Khulwe ling'ana yilio, tsia ingo. Es'sieno sirul'le mumukhanawo.”

³⁰ Natsia ingo, nanyoola omwana ukon'ne khusitanda, es'sieno nisirul'le muye.

Yesu yahonia omusilu wesilimi

³¹ Ma Yesu narula mulukongo lwa Tiro, nabir'ra Sidoni, niyola khunyanza ya Galilaya nabiriye musibala sia Dekapoli.

³² Abandu bandi nibamuler'ra omusilu owesilimi nibamuhomba are khuye amakhono.

³³ Yesu namuhila sibeka okhurula khumukanda kwabandu, namureela ebitere mumarwi, nafutsa amare ma natila khul'limi lulwe.

³⁴ Ma nahenga ikulu, nasenya ma namubool'la, “Efatsa,” eliboolanga “Ikukha.”

³⁵ Amarwi kaake nikekukha ne ol'limi lulwe nilubohol'lokha, nachiaka okhul'loma bulahi.

³⁶ Yesu nabakaya barakhabool'lakhwo omundu wosi ling'ana yilio tawe. Nebutswa olwa yabakayanga nilwo olwa batsilil'la okhulandia amang'ana yako.

³⁷ Abandu nibachenya okhusila, nibaboola, “Akholanga amang'ana kosi bulahi; Achilanga abekala amarwi nibahul'la, ne abasilu nibal'loma.”