MARIKO 4 - EBAIBO INZIENUKHU

Olukano lwomumitsi

¹ Yesu khandi yachiaka okhwibaala nali khuluchinga lweinyanza ya Galilaya. Omukanda kwosi kwebunjikha khuye ma nikamuhachia okhuniina muliaro niyekhalamwo khunyanza. Omukanda kwosi nikusinjila khuluchinga hamaatsi karali.

² Yabebaal'la amang'ana amenji mutsingano, ne mukhwibaala khukhwe yababool'la,

³ “Hul'le! Omumitsi yatsia okhumitsa imwo.

⁴ Olwa yali namitsanga, imwo ndala yakwa khunjila, amanyonyi nikachibootsa.

⁵ Eyindi yakwa khulwanda, hamaloba karali amenji tawe. Imwo tsana yamela bwangu sichila liloba silialiho elinji tawe.

⁶ Olwom'basu kwabala, neniala; ne sichila yabula aheyila emisi yamala niyoma.

⁷ Imwo yindi yakwa mubisakha biamahwa, ne amahwa nikakhula, nikachimiina, ma siyayama tawe.

⁸ Nebutswa eyindi yakwa mumaloba amalahi, nemela, nekhula, niyaama ebiamo, ndala amakhumi kataru, eyindi amakhumi kasasaba ne eyindi emia.”

⁹ Ma nababool'la, “Oli namarwi kokhuhul'la, ahulile.”

Lichoomo lietsingano

¹⁰ Olwa Yesu yali nali yenyene, balala khubali okhumuhul'la bamutsila halala nende abechi likhumi nababili, nibamureeba esifune sietsingano.

¹¹ Nababool'la, “Inywe mwahebwa amabiso kobwami bwa Nyasaye, nebutswa yabo abali esioba babool'lwanga amang'ana kosi mutsingano,

¹² khe, ‘Balahenga tooto nebutswa sibalola tawe, Bahulilanga tooto nebutswa sibalamanyilisia tawe, khase bakhekalukhania ma Nyasaye abalekhele.’ ”

Yesu yenoosia olukano lwomumitsi

¹³ Khe Yesu nabareeba, “Inywe simumanyile olukano yilu tawe? Mwakhamanye mbwena tsingano tsiosi?

¹⁴ Omumitsi amitsanga ling'ana lia Nyasaye.

¹⁵ Abandu balala bafwananga singa imwo eyakwa khunjila; olwa bahuliye ling'ana, ne Setani yetsa bwangu okhulihinia.

¹⁶ Abandu bandi bafwananga imwo eyakwa khulwanda. Olwabahuliye ling'ana balihuchil'langa nobusangali

¹⁷ nebutswa silibenjilanga ma liba nemisi mubo tawe, ma betinyilisianga amatukhu mati, ne olwesibi nende okhunyasibwa bitsanga khulwe ling'ana yilio, nebalekha obusubili bwabwe.

¹⁸ Abandu bandi bafwana singa imwo eyakwa mumahwa. Nabo niyabo abahul'langa ling'ana,

¹⁹ nebutswa nyinga okhuhendela ebiesibala, nende obulahi bwobuhinda nende obwekombi bwebindu bindi ebinji khwinjilanga mubo, nekhumina ling'ana ma babula okhwama.

²⁰ Nebutswa abandi bafwananga imwo eyamitswa mumaloba amalahi. Yabo bahul'langa ling'ana, ma balihuchil'la, ma bama ebiamo; balala amakhumi kataru, abandi amakhumi kasasaba ne abandi emia ndala.”

Etaya yafuunikhilwa musipaala

²¹ Yesu natsilil'la okhubabol'la, “Alikhwoho omundu ohambianga etaya alera munyumba ma achifuunikha musipaala nohomba ara musi wesitanda? Achiretsanga khumesa?

²² Khe liosi eliabiswa liakhabisulwe, ne siosi esifuunikhwanga siakhafunulwe.

²³ Oli namarwi kokhuhul'la, ahul'le.”

²⁴ Khandi nababool'la, “Muhengelesie akamuhul'langa! Esichelo esiamuchel'langamwo abandu bandi nisio esia Nyasaye yakhamuchel'lemwo nenywe; khandi kata okhuyombia khwo.

²⁵ Uyo oli nesindu yakhametwe ebindi, nebutswa obula esindu kata esiti esiali n'nasio siakhabukulwe.”

Olukano lweimwo emelanga

²⁶ Yesu natsilil'la okhuboola “Obwami bwa Nyasaye bufwana omundu omiitsanga imwo mumukunda.

²⁷ Butukhu akonanga ne m'basu abukha, ne olwene yilu lwosi imwo yiye erombanga nekhula; ye omwene samanyile obwemelanga nekhula tawe.

²⁸ Liloba eliene likhusianga imwo tsana, okhuchiakila khumuboka, ma likhamara ne olwokhumalilikha liba libele.

²⁹ Olwa amachese kalabanga ne omundu achiaka okhurumikhila injeso yiyie, sichila lichesa libetsanga niliol'le.”

Olukano lwolukutsa lwelisatsi

³⁰ Khandi Yesu naboola, “Khwakhafwanania Obwami bwa Nyasaye nasina? Khwakhabufwanania khulukano sina?

³¹ Bufwana singa olukutsa lwelisatsi oluli olutititi okhuyomba tsimwo tsindi tsiosi.

³² Nebutswa nilurakilwe lumelanga lukwa omusaala omukali okhuyomba ebirakwa bindi biosi m'mukunda. Tsisaka tsiakwo tsibetsanga tsingali kata amanyonyi kanyala okhwombokha ebitsu biako musinikha siakwo.”

³³ Yesu yabakambila amang'ana kaake mutsingano tsinyinji singa yitsio, yal'loma n'nabo singa obwa banyala okhuhul'la.

³⁴ Siyababool'lakhwo liosi sila okhurumikhila tsingano tawe, nebutswa olwa yalinji yenyene nende abechi baabe, yabaribul'langa amang'ana kosi.

Yesu yalenjesia imbumbuyeka

³⁵ Khumukolooba kwelitukhu yilio Yesu yabool'la abechi baabe, “Chende khwambukhe inyanza khutsie injelekha.”

³⁶ Nibalekha omukanda kwabandu, nibenjila muliaro omwa Yesu yali nali, nibatsia n'naye. Amaro kandi kali habwene yaho khandi.

³⁷ Imbutsa ingali yachiaka okhuhungutsa, ebikubuli nibielumba muliaro ma niliba ahembi okhwitsulamwo amaatsi.

³⁸ Yesu yali nali inyuma weliaro nakonanga tsindoolo khumukeka. Abechi baabe nibamubusia nibamubool'la, “Omwibaali, sohendangakhwo omwoyo khutibanga tawe?”

³⁹ Yesu nabuukha ma nakondekhela imbutsa ne nabool'la ebikubuli bieinyanza, “Siling'ana, olenjele.” Imbutsa nelekha ma omulenjeelo omukali nikubaho.

⁴⁰ Ma Yesu nabool'la abechi baabe, “Busina nimuria? Simuli nende obusubili tawe?”

⁴¹ Nabo bali nende oburi obwinji, nibachiaka okhurebana, “Nimundu sina uyu? Kata imbutsa nende ebikubuli bimuhulilanga.”