MARIKO 2 - EBAIBO INZIENUKHU

Yesu yahonia omundu owakwa likara

¹ Inyuma wamatukhu matututu Yesu yakalukha Kaperinaumu ma abandu nibahul'la ali munyumba.

² Nibetsa abandu abenji muno ma kata obweyangu sibwanyolekhakhwo kata m'muliango tawe. Yesu yali nabakambilanga ling'ana lia Nyasaye,

³ olwomundu owali niyakwa likara yalerwa nakingilwe nende abandu bane.

⁴ Sichila omukanda kwali omukali sibali abanyala okhumulera ha Yesu yali tawe. Bamala nibafunula mus'sekese aha Yesu yali nali. Olwabanyola obweyangu obuhela nibenjisisiamwo omulwaye uyo nakon'ne khusirili sisie.

⁵ Olwa Yesu yalola obwabali nibasubiye khuye, yabool'la owakwa likara, “Omwana wanje, tsimbi tsitsio tsilekheywe.”

⁶ Balala khubebaali ba Malako abali nibekhayeho, nibakanakana mumioyo chiabwe,

⁷ “Esichilanga naboola mbwo nisina? Anyekanga Nyasaye. Abulaho omundu onyala okhulekhela tsimbi narali Nyasaye yenyene.”

⁸ Yesu yamanya amanye amapaalo kabwe, ma nababool'la, “Busina mukanakana yaka mumioyo chienywe?

⁹ Nel'liena eliangu, okhubool'la owakwa likara ‘Ulekheywe tsimbi tsiosi’, nohomba okhumubool'la ‘Sinjila wetukhe esirili sisio, ochende?’

¹⁰ Ndamumanyia mbu Omwana wo Mundu ali nobunyali musibala okhulekhela tsimbi.” Ma nabool'la owakwa likara,

¹¹ “Khubool'langa buukha wetukhe esirili sisio otsie ingo.”

¹² Abandu bosi nibasimuhenga, omundu uyo yabuukha, nabukula esirili sisie natsia. Abandu bosi nibachenya, nibafumia Nyasaye nibaboola, “Khusili okhulolakhwo akafwana singa kano.”

Yesu yalanga Lawi okhumulonda

¹³ Yesu yatsia khandi khuluchinga lweinyanza ya Galilaya. Omukanda kwabandu nikwitsa khuye, ma nachiaka okhubebaal'la.

¹⁴ Olwa yali nabiranga, yalola omusololi wobusuru Lawi omwana wa Alufayo niyekhaye ahasolol'langa obusuru. Yesu namubool'la, “Nonda.” Lawi nasinjila namulonda.

¹⁵ Inyuma woluhono lutititi, Yesu yali niyekhaye munyumba mwa Lawi, nalitsanga ebiokhulia. Abasololi bobusuru abenji nende aboni bali nibamulon'de ne abenji khubo bali nibekhaye n'naye halala nabechi baabe.

¹⁶ Abalala khubebaali ba Malako abali Abafarisayi olwa balola Yesu nalitsanga halala nende abandu betsimbi nende abasololi bobusuru, nibareba abechi baabe, “Busina alitsanga nende abasololi bobusuru nende aboni bandi?”

¹⁷ Yesu yabahul'la, nababool'la, “Abandu abalamu sibarunanga omulesi tawe; nebutswa yabo abali abalwaye. Sindaitsa okhulanga abandu abalunji tawe, nebutswa aboni.”

Lireebo khukokhuhonga okhulia

¹⁸ Ebise bindi abechi ba Yohana nende Abafarisayi bali nibahonganga okhulia. Abandu balala nibetsa khu Yesu, nibamureeba, “Busina abechi ba Yohana nende Abafarisayi bahonganga okhulia, nebutswa abechi baabo sibahonganga okhulia tawe?”

¹⁹ Yesu nabakalusia, “Abacheni bes'sel'lo bakhahonga mbwena okhulia omwene es'selelo nali halala n'nabo? Buli lwosi olwabali nende omwene es'sel'lo sibanyala okhuhonga okhulia tawe.

²⁰ Nebutswa amatukhu ketsanga olwa omwene es'selelo alihinibwa khubo; olwene yilwo nilwo olwa balihonga okhulia.

²¹ Abulaho omundu okhalakanga esilaka khungubo imbia khulwa okhunabila khungubo ikhulu. Nakhola mbwo, esilaka esihia siakharandula ingubo ikhulu ma silombe omuluhu omukali okhuyomba okwaliho.

²² Kata abulaho omundu otsukhanga ewaini imbia mumitata emikhulu. Nakhola mbwo, ewaini yakharandula emitata yitsio, ma ewaini esundukhe ne emitata chiononekhe. Ewaini imbia erebwanga mumitata emihia.”

Lireebo khukelitukhu lie Sabato

²³ Litukhu lindi elie Sabato Yesu yali nabiranga m'mukunda kwobule. Olwa bali mbabirangamwo, Abechi baabe nibachiaka okhunoka ebiangala biobule.

²⁴ Abafarisayi nibamubool'la, “Lola, nakomusilo khubechi babo okhukhola yaka mwitukhu lie Sabato!”

²⁵ Yesu nabakalusia, “Musili okhusomakhwo aka Daudi yakhola olwayali natiimile esiakhulia? Ye nende abayali n'nabo bali neinzala,

²⁶ ma niyenjila munyumba ya Nyasaye, nalia omukaati okwahanwa khu Nyasaye. Yaka kekhola olwa Abiatsari yali Omwesaalisi Omukhongo. Okhulondokhana namalako, Abesaalisi bonyene nibo abali nibahuchil'lwa okhulia omukaati yikwo. Nebutswa Daudi yalia, ma khandi nahakhwo abayali n'nabo.”

²⁷ Kho Yesu nababool'la, “Esabato yalombwa khulwo omundu ne omundu siyalombwa khulwe Sabato tawe.

²⁸ Khulwe yako Omwana wo Mundu niye Omwami khandi kata owe Sabato.”