MARIKO 16 - EBAIBO INZIENUKHU

Okhusimukukha khwa Yesu

¹ Olwelitukhu lie Sabato liali nilihweye Mariamu Magadalena, Mariamu nyina Yakobo nende Salome bakula amafura akahunyanga esuswa, batsie okhubakha omubili kwa Yesu.

² Eliuba ndirulanga mwitukhu liomwihonga barula nibatsia khusilindwa.

³ Nibabool'lana abene khubene, “Niwina owanokhuhinichis'sie lichina khumuliango kwesilindwa?”

⁴ Olwa bachingula tsimoni, balola lichina nilihinibwe (liali likali okhusila).

⁵ Benjila musilindwa ne nibalola omuyaye niyekhaye elubeka womukhono musatsa niyebikhile tsingubo tsindafu ma nibachenya okhusila.

⁶ Nebutswa omuyaye uyo yababool'la, “Murachenye tawe. Murunanga Yesu Omunasareti owabambilwe. Usimukukhile siali hano tawe. Lole, hano niho ahabamureye.

⁷ Tsie mubool'le abechi baabe nende Petero mbu ‘Omwene umwemeleye okhutsia Galilaya. Nam'mulondel'leyo singa yali okhumubool'la.’ ”

⁸ Nibarula musilindwa tsimbilo sichila bali noburi, nende okhuchenya. Sibabool'lakhwo omundu wosi ling'ana liosi tawe khulwoburi. [

Yesu yalolekhela Mariamu Magadalena

⁹ Olwa Yesu yasimukukha mukamba tsuli khwitukhu liomwihonga, yaranga okhulolekha khu Mariamu Magadalena, owayali niyahinia mwo ebisieno bine nabitaru.

¹⁰ Naye Mariamu Magadalena yatsia nabool'la abalinji na Yesu okhuba bali nibabelelanga ne nibabisia omusika.

¹¹ Nebutswa olwa bahul'la mbu Yesu ali mwoyo, ma khandi Mariamu Magadalena umulutsikhwo sibasubila tawe.

Yesu yalolekhela abechi babili

¹² Olweinyuma weyako Yesu yalolekha mwikondo lindi khubechi babili. Abechi yabo bali nibatsitsanga ingo okhurula mwitaala.

¹³ Nabo nibatsia nibabool'la abandi, ne sibabasubila tawe.

Yesu yalolekha khubechi likhumi nende mulala

¹⁴ Olweinyuma Yesu yalolekha khubechi likhumi nende mulala olwa bali nibalitsanga ebiokhulia. Nabakondekhela okhusila khulwo okhubula okhusubila khwabwe nende obutinyu bwemioyo chiabwe, sichila sibasubila yabo abali nibamulutsi namal'le okhusimukukha tawe.

¹⁵ Nababool'la, “Mutsie mubibala biosi, mukambe Amang'ana Amalahi khubandu bosi.

¹⁶ Wosi osubila nabaputiswa alahonibwa. Orasubila tawe alakhalachilwa esiina.

¹⁷ Ne ebilolelo yibi biakhalonde yabo abasubilanga, muliira lianje bakhahinie ebisieno; bakhal'lome netsinimi tsimbia.

¹⁸ Nibakhatiila tsinzokha nohomba okhunywa esindu siosi esiokhwira, sisiakhabasalisia tawe. Bakhare amakhono kabwe khubalwaye ne nibahona.”

Yesu yapulukha okhutsia mwikulu

¹⁹ Olwa Omwami Yesu yamala okhul'loma n'nabo yabukulwa okhutsia mwikulu, ma niyekhala khumukhono omusaatsa kwa Nyasaye.

²⁰ Abechi nabo nibatsia, nibakamba habundu hosi. Omwami yakhola emilimo halala n'nabo, namanyia mbu oburume yibwo nobwatooto mubilolelo ebiayakhola.]