MARIKO 13 - EBAIBO INZIENUKHU

Yesu yal'loma khukokhusambulwa khwe Hekalu

¹ Olwa Yesu yali narulanga mu Hekalu, mulala khubechi baabe yamubool'la, “Omwibaali, lola singa amachina akokhuchenyia nende obwombokhi yibu buli!”

² Yesu namubool'la, “Ololanga amombokho amakali yaka? Libulaho lichina eliakhasikale khulindi; buli sindu siakhasambul'lwe.”

Amanyakhano nende okhukhupibwa esibi

³ Olwa Yesu yali niyekhaye Khusikulu sia Miseituni esihengana nende Ehekalu, Petero, Yakobo, Yohana nende Anderea bamureeba masilisi,

⁴ “Okhubool'le yaka kakhekhole lina? Nisilolelo sina esiakhamanyie yaka kali ahembi okhwekhola?”

⁵ Yesu nachiaka okhubabool'la, “Mwelinde, omundu arakhamukaata tawe.

⁶ Abenji bakhetse nibarumikhilanga eliira lianje nibaboola, mbu bo nibo Masihi, ne bakhakosie abandu abenji.

⁷ Olwa mwakhahul'le obulwani nende oluyali lwamahe, murahende emioyo tawe. Yako kosi okhwola kalekhole, nebutswa esihesi siene nisisili.

⁸ Olwibulo lwakhalwane noluyia lundi, ne obwami bwakhalwane nende obwami bundi; khulibaho okhutechela khwesibala nende inzala habundu hosi. Yaka kosi kakhabe butswa okhusal'la khwokhuranga okhweinumwa.

⁹ “Nebutswa inywe muchetsihe, sichila abandu bakhamuhile musiina, khandi mulitiabilwa mutsisinakoki. Mwakhahilwe imbeli wabaruchi nende abaami khulwe ise, kho mube abakobokheli banje khubo.

¹⁰ Nebutswa okhwola Amang'ana Amalahi kakambwe mubibala biosi mbelio.

¹¹ Nabo olwa bakhamutile nibamuhila musiina murakhahende aka muliboola tawe, inyinga niyol'le mulaboole liosi eliamwakhahebwe, sichila simuli ninywe abaliboola tawe nebutswa Omwoyo Omutsienukhu.

¹² Amwabo yakhasiemane amwabo undi yerwe, samwana yakhasiemane omwanawe, abaana nabo bakhenjil'le abebuli babwe nibabera.

¹³ Abandu bosi balimubihil'lwa khulwanje. Nebutswa owakhefwile okhwola khusihesi naye yakhahonibwe.

Esies'sinyo esikali

¹⁴ “Mwakhalole esies'sinyo esiokhukhuya nisisinjiiye hasirakwan'ne okhuba.” (Osomanga amanyilisie esifune yisi). “Kho abali Ebuyahudi belukhile mubikulu.

¹⁵ Omundu oli khus'sekese sieinyumba arakhekhe okhwinjila munyumbamwe okhubukula esindu tawe.

¹⁶ Oli m'mukunda arakhakalukhe inyuma okhubukula inguboye tawe.

¹⁷ Are bane khu yabo abaliba tsinda nende abanunianga mumatukhu yako.

¹⁸ Musaaye khu Nyasaye mbu yaka karakhekhole amatukhu kobusindu tawe.

¹⁹ Okhuba amatukhu yako kakhabe akokhukhupibwa esibi es'sili okhubakhwo ho okhurula Nyasaye nalomba esibala okhwola leelo tawe, khandi sisilibakhwo ho olundi tawe.

²⁰ Omwami nalibula okhututuhia amatukhu yako, omundu wosi siyakhahonibwe tawe. Nebutswa khulwa abelwa baabe, katutuyibwa.

²¹ “Omundu naba namubool'la, ‘Lole, Masihi ali hano’ nohomba ‘Ali hala,’ muramusubila tawe.

²² Bakhabukhe masihi bobubehi, nende abaroobi bobubehi, balikhola akamangalimwa nende akokhuchenya khulwa okhukosia abelwa ba Nyasaye nikakhanyalikha.

²³ Nebutswa inywe muchetsiye sichila ise mal'le okhumubool'la kosi nikasili okhwekhola.

Okhukalukha khwo Mwana wo Mundu

²⁴ “Mumatukhu yako, olunyuma lwesibi yisio, eliuba liakhakwe esiilima, ne omwesi sikuliakha tawe.

²⁵ Tsinyininyini tsiakhakulukhe okhurula khwikulu, ne obunyali bwomwikulu bwakhatechele.

²⁶ Nilwo olwa balimulola Omwana wo Mundu niyetsanga mumalumbesi nobunyali obukali nende oluyali.

²⁷ Yakharume abamalaika baabe, balabunjelesie abelwa baabe okhurula tsimbeka tsine etsiesibala, okhurula khundulo khwesibala okhwola khundulo khwomwikulu.

Elieko khumukhuyu

²⁸ “Mweke olukano luno okhurula khumukhuyu: Olwetsisaka tsiakwo tsichiakanga okhusebukha amasafu, ne mumanya omuhika kwol'le.

²⁹ Khandi nenywe olwa mwakhalole akene yaka nikekholekha, mulamanye mbu Omwana wo Mundu ali ahembi muno, kata hamuliango.

³⁰ Siahene mubool'langa, lisuba yili siliakhahwe amang'ana yaka nikasili okhwekhola tawe.

³¹ Likulu nende esibala biakhabire nebutswa amang'ana kanje sikakhabire butswa tawe.

Abulaho omanyile olwo Mwana wo Mundu yakhetse

³² “Nebutswa abulaho omanyile litukhu liene yilio nohomba esaa yene iyio, kata abamalaika bomwikulu, nohomba Omwana; Papa yenyene niye omanyile.

³³ Muchetsihe, mulinde nimusaaya sichila simumanyile olwe inyinga tsana yakhole tawe.

³⁴ Kakhabe singa omundu orulanga hango natsia oluchendo nalekhela abatiyi baabe obunyali, siamulala nomulimo kukwe; ne nalachile omulindi okhulinda nahengelesia.

³⁵ Khe mulinde, sichila simumanyile esaa eya mwene nyumba yakhakalukhe tawe. Haundi yakhetse hamukolooba nohomba mubutukhu hakari nohomba mutsitaywa, nohomba mukamba tsuli.

³⁶ Niyakhetsa bwangu arakhamunyoola nimukonanga tsindoolo tawe.

³⁷ Eliamubool'langa inywe mbool'langa bosi, mulinde!”