MARIKO 10 - EBAIBO INZIENUKHU

Yesu yebaala khukokhulekhana khwomusaatsa nomukhasi

¹ Yesu yarulaho natsia mulukongo lwe Buyahudi okhwola khuluchelekha lwomuchela kwa Yorodani. Omukanda kwabandu kwamutsila khandi; nabebaal'la singa obwa yali niyanala.

² Abafarisayi nibamutsiila nibamureeba khulwo khumutema, “Nobulahi omundu okhukhunga omukhasiwe?”

³ Yesu nabakalusia, “Musa yamulaka mbwena?”

⁴ Nabo nibaboola, “Musa yalaka omusaatsa okhumuhelesia omukhasiwe ebarwa yokhwabukhana, ma amulekhe.”

⁵ Yesu nabakalusia, “Musa yamuhandichila lilako yilio khulwobutinyu bwemirwe chienywe.

⁶ Nebutswa okhurula khukhulombwa khwesibala, Nyasaye yalomba omusaatsa nende omukhasi, singa Amahandiko kaboolanga.

⁷ Khulwe esifune yisio, omusaatsa alalekha samwana nende nyina, ma ahambane nomukhasiwe

⁸ ne bombi balakwa omubili mulala. Kho, bo sibali babili khandi tawe, nebutswa omubili mulala.

⁹ Kho aba Nyasaye ahambanisie, omundu arakhabukhania tawe.”

¹⁰ Olwa benjila munyumba khandi, abechi baabe nibamureeba khwing'ana yilio.

¹¹ Naye nababool'la, “Okhunganga omukhasiwe ma alere oundi aheyanga niyonela omukhasiwe.

¹² Ne omukhasi olekhanga omusaatsawe ma alerwe nende oundi aheyanga.”

Yesu alaamila abaana batu tsikhabi

¹³ Abandu baler'ra Yesu abaana batu abatilekhwo, ne abechi baabe nibabakondekhela.

¹⁴ Olwa Yesu yakalola, yasinyikha nababool'la, “Lekhe abaana batu betse khwise, murabekal'la tawe, sichila Obwami bwa Nyasaye nobwabandu abafwana singa abaana yaba.

¹⁵ Mubool'langa tooto mbu omundu wosi orakhahuchil'la Obwami bwa Nyasaye singa omwana muti siyakhenjile mu Bwami yibwo tawe.”

¹⁶ Ma nababukula mumakhonokaake, nabarakhwo amakhono, nabalaamila tsikhabi.

Omundu owali omuhinda

¹⁷ Olwa Yesu yachiaka oluchendo lulwe khandi, omundu mulala yamwitsila tsimbilo, namusikamila namureeba, “Omwibaali Omulahi, khole mbwena khe nyoole obulamu oburahwa?”

¹⁸ Yesu namukalusia, “Busina unanganga omulahi? Abulaho omulahi narali Nyasaye yenyene.

¹⁹ Wamanya amalako; ‘Orera, oraheya, oreba, orakobokhela obubehi, orabeha, okosie papawo nende mamawo.’ ”

²⁰ Naye namukalusia, “Omwibaali, yako kosi ndakhola okhurula obwana bwanje.”

²¹ Yesu namuhenga, namuyanza, ma namubool'la, “Kenyekhanga okhole esindu silala. Tsia okusie ebindu bioli n'nabio, obahelesie abatakha, nawe wakhaba nelibere mwikulu, ma witse unonde.”

²² Olwa yahul'la mbwo yabihil'lwa m'monimwe, natsia ingo nabeeleye, sichila yali nende emiandu eminji.

²³ Yesu yahenga tsimbeka tsiosi, nabool'la abechi baabe, “Nobutinyu muno abahinda okhwinjila mu Bwami bwa Nyasaye.”

²⁴ Abechi baabe nibachenya khumang'ana kaake. Yesu nababool'la khandi, “Abaana banje, nobutinyu muno okhwinjila mu Bwami bwa Nyasaye!

²⁵ Nobutoro ingamia okhubir'ra mumuluhu kwesindani okhuyomba omuhinda okhwinjila mu Bwami bwa Nyasaye.”

²⁶ Abechi baabe nibahuka muno nibareebana, “Niwina owakhanyala okhuhonibwa?”

²⁷ Yesu nabahenga, nababool'la, “Khubandu sikanyalikha tawe, nebutswa khu Nyasaye kosi sikali mbwo tawe, sichila khu Nyasaye kosi kanyalikha.”

²⁸ Petero namubool'la, “Ifwe khwalekha biosi ma khwakhulonda.”

²⁹ Yesu naboola, “Siahene mubool'langa, omundu wosi owalekha inyumba yiye nohomba abawabwe, nohomba ababotso, nohomba nyina, nohomba samwana nohomba abaanabe, nohomba emikunda khulwanje nende khulwa Amang'ana Amalahi,

³⁰ yakhanyoole esiemia munyinga tsino. Yakhanyoole tsinyumba, abawabwe, ababotso, abanyina, abaana nende emikunda halala nende okhukhupibwa esibi; ne munyinga etsisaa yakhanyoole obulamu oburahwa.

³¹ Nebutswa abenji abali abeimbeli bakhabe abeinyuma, nabeinyuma bakhabe abeimbeli.”

Yesu yaboola olwakhataru akokhufwakhwe nende okhusimukukha

³² Yesu nende abechi baabe bali nibatsitsanga Yerusalemu ne Yesu yali niyemeye. Abechi baabe bachenya, ne abandu abali nibabalondanga nibaria. Yesu yabukula abechi likhumi nababili sibeka, nachiaka okhubabool'la akanakekhole khuye:

³³ “Hulile! Khutsitsanga Yerusalemu, ne ebwene yio Omwana wo Mundu nahanwe khubesaalisi abakhongo nende abebaali ba Malako. Nabamukhalachile esiina siokhwirwa, ma nabamure mumakhono kabandu betsimbia.

³⁴ Nibamukhol'la inzekhelesi, nabamufutsile amare, nabamutiabe netsikhoba ma nabamwire. Ne inyuma wamatukhu kataru yakhasimukukhe.”

Obusabi bwa Yakobo nende Yohana

³⁵ Yakobo nende Yohana, abaana ba Sebedayo, batsia khu Yesu nibamubool'la, “Omwibaali, khwenyanga okhukhol'le akakhwitsa okhukhureeba.”

³⁶ Yesu nabareeba, “Mwenyanga mukhol'le sina?”

³⁷ Nibamubool'la, “Okhuhuchil'la okhwikhala mulala khumukhonokwo omusaatsa ne oundi khumukhonokwo omukhasi olwa wakhahebwe obukhongo.”

³⁸ Yesu nababool'la, “Simumanyile esia musabanga tawe. Mwakhanyala okhunywa es'sanda siokhusal'la esia nanywe, nohomba okhubaputiswa singa nambaputiswe?”

³⁹ Nibamukalusia, “Khwakhanyala” Yesu nababool'la, “Es'sanda siandinywelamwo nenywe mwakhanywelemwo tooto, khandi mwakhabaputiswe singa obwandakhabaputiswe.

⁴⁰ Nebutswa okhwikhala khumukhono kwanje omusaatsa nohomba omukhasi sikali akanje okhuhana tawe nebutswa bakhahebwe abalombelwa.”

⁴¹ Olwa bechi bandi likhumi bakahul'la, bachiaka okhusiendekhela Yakobo nende Yohana.

⁴² Yesu nabalanga, nababool'la, “Mwamanya mbu yabo abapaalwanga okhuba abemeli betsimbia barukanga tsimbia tsiabwe netsingufu ne abakhongo babwe bali nobunyali khubandu babwe.

⁴³ Nebutswa khwinywe karakhaba mbwo tawe, nikarali owakhenya abe omukhongo khwinywe okhwola abe omurumikhili wenywe.

⁴⁴ Owakhenya okhuba owokhuranga okhwola abe omurumikhili wa bosi.

⁴⁵ Okhuba Omwana wo Mundu siyaitsa okhurumikhilwa tawe, nebutswa okhurumikha, nende okhuhana obulamu bubwe okhuba obununuli bwabenji!”

Yesu yahonia omubofu walangwa Batimayo

⁴⁶ Niboola Yeriko, ne olwa Yesu yali narulanga mwitaala nende abechi baabe halala nende omukanda omukali kwabandu, omubofu owali omusabi oweliiralie Batimayo omwana wa Timayo yali niyekhaye khuluchinga lweinjila.

⁴⁷ Olwa yahul'la ni Yesu wa Nasareti, nachiaka okhuhanzukha naboola, “Yesu, Omwana wa Daudi, umbeele tsimbabasi!”

⁴⁸ Abandu abenji bamukaya asiling'ane, nebutswa yalanjisia okhusila “Omwana wa Daudi, umbeele tsimbabasi”

⁴⁹ Yesu yasinjila ma naboola, “Mulange.” Ma nibalanga omubofu uyo, nibamubool'la, “Oleme omwoyo. Sinjila, akhulanganga.”

⁵⁰ Ma nafuba ingubo yiye, niyelukha natsia khu Yesu.

⁵¹ Yesu namureeba, “Wenyanga khukhol'le sina?” Omubofu uyo namubool'la “Omwibaali, sabanga ndoole okhulola khandi.”

⁵² Yesu namubool'la, “Tsia, obusubili bubwo bukhuhonisie.” Ma omubofu natola okhulola, namulonda Yesu khuluchendolwe.