MALAKI 1 - EBAIBO INZIENUKHU

¹ Kano niko amang'ana ako MWAMI yabool'la Malaki abool'le Abaisiraeli.

Obuyanzi bwo MWAMI khu Isiraeli

² OMWAMI abool'langa abandube mbu, “Ndamuyanza amatukhu kosi.” Nebutswa nabo bareebanga mbu, “Wakhuyanza mbwena?” OMWAMI nakalusia mbu, “Esau nende Yakobo nabamwabo nebutswa ndali okhuyanza Yakobo

³ ne nisuula Esau. Ndakalukhania esibala sia Esau siebikulu okhuba esitsiimi ma nindekhela ebibwe biomusitsiimi obulaamebwe.”

⁴ Ne kata abolwibulo lwa Esau, Abaedomu nibaba nibaboola mbu, “Amataala kefwe amakali kamumilwe nebutswa nakhukombokhe obuhia” nilwo olwo MWAMI naakalusie mbu, “Lekha bombokhe; ise nangasambule khandi. Abandu bakhakalange mbu, ‘Esibala esibi’ khandi mbu, ‘Lihanga lio MWAMI yasinyikhila khulwe inziayo.’ ”

⁵ Abandu ba Isiraeli balalola yaka ma baboole mbu, “OMWAMI nomukufu kata khusibala esirali esia Isiraeli.”

OMWAMI akhalachila abesaalisi

⁶ OMWAMI Wokhunyala Biosi aboolanga mbu, “Omwana ahelesianga samwana oluyali, ne omurumikhili ahelesianga omwamiwe oluyali. Kho ise nimba nindi papa wenywe, esichilanga nimurambelesia oluyali lwanje nisina? Kata nimba nindi omwami, esichilanga nimunjaaya nisina? Munjaayanga ne nimureeba mbu, ‘Khukhuchaayile mbwena?’

⁷ Munjaayanga olwa muhaananga emisango chiebiokhulia ebirali noluyali khulusambwa lwanje. Nenywe mureebanga mbu, ‘Khubul'le mbwena okhukhuhelesia oluyali?’ Mubulanga okhumbelesia oluyali olwa muchaayanga olusambwa lwanje.

⁸ Olwa mumban'nanga omuruko okwabofula nohomba okulwalanga nohomba okulikhwo obulema singa omusango, mupaalanga yako sikali amabi tawe? Teemekhwo okhuhaana omuruko kufwana mbwo khumuruchi mulole! Mbula omuruchi yakhayanzisibwa n'nawe nohomba okhukhubeela tsimbabasi noho?”

⁹ Ne luno inywe abesaalisi, teeme okhureeba Nyasaye akhubeele esirenda. Ye sinamukalusie amasaayo kenywe tawe, ne yako nakabe amabi kenywe.

¹⁰ OMWAMI Wokhunyala Biosi aboolanga mbu, “Makano wabakhwo mwinywe omundu mulala owakheekala emiliango chie Hekalu okhumwikal'la mulekhe okhuhambia omul'lo kurali matsami khulusambwa lwanje! Ise sisangasibwanga n'nenywe tawe, khandi sinambuchil'le esihanwa esiamumban'nanga tawe.

¹¹ Abandu okhurula khulubeka l'lala lwesibala okhwola khulubeka lundi bambetsanga oluyali. Buli habundu hosi basambanga obwali nende okhumban'na emisango emilahi. Bosi p'pe bambetsanga oluyali.

¹² Nebutswa inywe simumbelesianga oluyali olwa muboolanga mbu ‘Olusambwa lwo MWAMI lubula obukhala’ olwa muhaananga khulwo ebiokhulia ebiamwachaaya.

¹³ Muboolanga mbu, ‘Kano kakhuchonyisie okhusila!’ Ma mmuufuutsanga. Muleeranga omuruko okwa mweeba nohomba omulema nende okwatekhelana singa omusango khu ise. Mupaalanga nase nambuchil'le ebiene yibio okhurula khwinywe noho?

¹⁴ Esilaamo siobubi sibe khu uyo oukaatanga niyambanila omusango kwomuruko okulikhwo obulema, olwa ali nemiruko emilahi musiayo sisie etsia yesuha okhumbanila! Okhuba ise ndi omuruchi omukhongo, ne abandu bamahanga kandi bayiria ise.”