LUKA 8 - EBAIBO INZIENUKHU

Abakhasi abalondana nende Yesu

¹ Inyuma we yako hatititi Yesu yabir'ra mumataala amakali nende amati nakambanga Amang'ana Amalahi ako Bwami bwa Nyasaye. Abechi likhumi nababili balondana n'naye.

² Khandi abakhasi nalebe aba Yesu yali niyahinia mwo ebisieno nende okhubahonia obutekhele balondana n'naye. Nabo bali Mariamu (owalangwa Magadalena) owahinibwa mwo ebisieno bine nabitaru,

³ Joani mukha Kuza, owali omuhenji wabatiyi ba Herode, nende Susana, ma nende abakhasi bandi abenji abarumikhilanga emiandu chiabwe abene okhukhonya Yesu nende abechi baabe.

Olukano lwomumitsi

⁴ Omukanda omukhongo kwali nikwebunjikhanga ne abandu bali nibetsanga khu Yesu okhurula mumataala akabukhan'ne. Ne nababool'la olukano luno.

⁵ “Omumitsi yatsia okhumitsa imwo yiye. Olwa yali namiitsanga imwo mumukunda, ndala yakwa khunjila, ne abandu nibachisena, ma amanyonyi nikachibootsa.

⁶ Eyindi yakwa khulwanda ne olwa yamela yamala niyoma bwangu sichila liloba siliali nende isindil'la tawe.

⁷ Imwo yindi yakwa mubitsakha biamahwa, ma amahwa nikakhula n'nayo halala ne nikachimiina.

⁸ Ne imwo yindi yakwa mumaloba amalahi, nemela, nekhula ma niyama ebiamo hali emia.” Niyakhamala okhuboola yaka yahanzuukha naboola, “Oli namarwi akokhuhul'la, ahulile.”

Lichoomo lietsingano

⁹ Abechi bareeba Yesu esifune siolukano yilwo.

¹⁰ Nababool'la, “Inywe mwahebwa okhumanya obusiilia bwa amabiso ko Bwami bwa Nyasaye, nebutswa khubandi bosi ketselanga mutsingano, kho bahenge ne baralola, bahul'le nebutswa baramanyilisia.

Yesu yenoosia olukano lwom'mitsi

¹¹ “Esifune siolukano yilwo nsiesino: imwo neling'ana lia Nyasaye.

¹² Imwo eyakwa khunjila emanyianga yabo abahul'langa ling'ana; nebutswa Setani yetsanga ma ahinia ling'ana liatsana mumioyo chiabwe khe balekhe okhusubila khase bakhahonibwa.

¹³ Imwo eyakwa khulwanda emanyianga yabo abahul'langa ling'ana ma balibukula nobusangali. Nebutswa silieyinikhanga mubo kupu tawe, basubilanga khulwa amatukhu matititi, nebutswa olwe inyinga yokhutemwa yitsanga nibakwa okhurula khubusubili.

¹⁴ Ne imwo eyakwa mumahwa emanyianga yabo abahul'langa, nebutswa olwa bachenda mutsinjila tsiabwe, okhuhendela obuhinda nende obulahi bwesibala bibaminanga ne sibali abanyala okhwama habwene tawe.

¹⁵ Imwo eyakwa mumaloba amalahi ni yabo abahul'langa ling'ana, nibalitila nemioyo emilahi echiatooto, ma baama ebiamo mukhwefwila.

Etaya eyafunikhilwa musipaala

¹⁶ “Abulaho omundu ohambianga etaya ma afuunikhakhwo esipaala nohomba achira muusi mwesitanda, nebutswa achiretsanga khumesa kho olwa abandu benjila ne balola obulafu.

¹⁷ Okhuba libulaho liosi eliabiswa elirakhabisukhe tawe nohomba eliamambiswi elirakhamanyikhe ma lilarule habulafu.

¹⁸ Kho mwelinde obwa muhul'langa, okhuba uyo oli n'nabio niye ometelwanga nebutswa orali nesindu kata sitititi esiapaalanga ali n'nasio yakhanulwe.”

Nyina Yesu nende abaana babwe

¹⁹ Nyina Yesu nende abaana babwe betsa khuye nebutswa sibaali abanyala okhwola khuye tawe khulwo omukanda.

²⁰ Yamala nabool'lwa, “Mamawo nende abaana benywe basinjiye esioba, benyanga bakhulole.”

²¹ Yesu nakalusia, “Mama wanje nende abaana befwe ni yabo abahul'langa ling'ana lia Nyasaye ma bakhola akaliboolanga.”

Yesu yalenjesia imbumbuyeka

²² Litukhu elala Yesu yaniina muliaro halala nende abechi baabe ma nababool'la, “Chende khwambukhe inyanza khutsie injelekha.” Ma nibachiaka oluchendo.

²³ Olwa bali nibatsitsanga Yesu nachiaka okhukona tsindoolo. Imbutsa ingali yamala nechiaka okhuhungutsa ma eliaro liabwe nilichiaka okhwitsulamwo amaatsi, ma nibaba khusibi esikali.

²⁴ Abechi nibatsia okhumubuusia nibaboola, “Omwami, Omwami, khutibanga!” Ma nabuukha nakondekhela omuyeka nende ebikubuli biamaatsi nibikhalisia, ma khwaliho okhulenjela okhukali.

²⁵ Nababool'la, “Obusubili bwenywe buli hena?” Ma nibaria okhusila. Nibachenya nibabool'lana, “Niwina omwene uyu, alakanga omuyeka nende amaatsi ma bimuhul'la?”

Yesu yahonia omundu webisieno

²⁶ Yesu nende abechibe bambukha inyanza muliaro liabwe niboola musibala sia Gerasi esili oluchelekha lweinyanza ya Galilaya.

²⁷ Olwa Yesu yali niyekhele khuluchinga okhurula muliaro, omundu mulala okhurula mwitaala owali nebisieno yakaana n'naye. Khuluhono olurambi omundu uyo siyayebiikhanga tsingubo tawe, ne siyamenyanga munyumba tawe. Yamenyanga mubilindwa.

²⁸ Olwa yalola Yesu, yahanzuukha nakwa imbeliwe naboola. “Oli nasina n'nase, Yesu, Omwana wa Nyasaye Oweikulu Okhusila? Khusaayanga oranyasia tawe.”

²⁹ Yaboola mbwo sichila Yesu yali nalachile omwoyo kwesifwabwi okhurula muye. Hali khasotso kwamutilanga, ne kata niyabohwangwa nende eminyol'lo yachikatulanga ma es'sieno simukhunga nisimuhenjisie musitsiimi.

³⁰ Yesu namureeba, “Eliira lilio niwe wina?” Naye nakalusia “Eliira lianje ni Ligioni”; okhuba ebisieno ebinji biali nibienjila muye.

³¹ Ebisieno nibireba Yesu alekhe okhubilaka okhutsia mubilindwa.

³² Esiayo esikali esie tsimbitsi siali ahembi habwene yaho nisiayanga hasikulu. Ebisieno nibimuhomba Yesu abihuchil'le binjile mutsimbitsi yitsio ma naye nabihuchilil'la.

³³ Ma ebisieno nibirula mumundu uyo ne nibinjila mutsimbitsi. Esiayo siosi sielukha nisiselengera nisikwa munyanza, ma nisitibila mwo.

³⁴ Olwabandu abali nibayanga tsimbitsi balola akali nikekhol'le, belukha, nibakalandia mwitaala nende mumichitsi.

³⁵ Abandu bamala nibatsia okhulola akali nikekhol'le, ne nibanyoola omundu owebisieno biali nibirul'le mwo niyekhaye habilenje bia Yesu, niyebikhile ma nakungumile; ma nibaria okhusila.

³⁶ Ne yabo abali nibakalutsi babenoosia singa owali nebisieno yahonibwa.

³⁷ Ma abandu bosi abesibala sia Gerasi nibamuhomba okhurula musibala siabwe, sichila batilwa nende oburi obukali, ma niyenjila muliaro narula yo.

³⁸ Omundu owebisieno biali nibirul'le mwo yamuhomba abe n'naye halala. Nebutswa Yesu yamukaya naboola,

³⁹ “Kalukha ingo oboole aka Nyasaye akhukholeye.” Ma omundu uyo natsia nalandianga mwitaala liosi kosi aka Yesu amukholeye.

Omukhaana wa Jairo nende omukhasi owatila khulusiche lweingubo ya Yesu

⁴⁰ Olwa Yesu yakalukha khuluchelekha lweinyanza, omukanda kwabandu kwamwinjisia nobusangali, sichila bosi bali nibamulindanga.

⁴¹ Ne omundu yetsaho owalangwa Jairo, owali omwemeli wesinakoki yabwe. Nakwa hasi habilenje bia Yesu ma namusaaya atsie munyumba mumwe,

⁴² sichila omukhaana uwe omutelwa, owemihika likhumi nende chibili, yali nafwitsanga. Olwa Yesu yali natsitsanga yo abandu beminan'na khuye okhusila.

⁴³ Ne omukhasi mulala owali naratsanga amatsahi, khulwemihika likhumi nende chibili yali mumukanda kwabandu yikwo; ne yali niyamal'la biosi ebia yali n'nabio khubalesi, ne abulaho owanyala okhumuhonia.

⁴⁴ Omukhasi uyo yalonda Yesu munyuma ma natila khulusiche lweingubo yiye, ne okhuratsa khwamatsahi kaake nikhukhalisia.

⁴⁵ Yesu naboola, “Niwina oundil'lekhwo?” Bosi nibaboola abulaho omundu omutil'le khwo. Ma Petero naboola, “Omwami omukanda kwabandu nomwinji khuibe.”

⁴⁶ Nebutswa Yesu yaboola, “Omundu undil'lekhwo, sichila manyile tsingufu tsirul'le khwise.”

⁴⁷ Olwomukhasi uyo yalola mbu siyali onyala okhwekoyokoyia tawe, yetsa natechelanga, niyelumba imbeli wa Yesu. Namanyia imbeli wabandu bosi esifune esiachila namutila nende singa obwa yali nahon'ne bwangubwangu.

⁴⁸ Yesu namubool'la, “Omukhaana wanje, obusubili bubwo bukhuhonisie, otsie nomulembe.”

⁴⁹ Olwa yali nasil'loma, omurumwa yetsa okhurula munyumba yomwemeli wesinakoki naboola, “Omukhaanawo ufwiye. Oranyasia Omwibaali khandi tawe.”

⁵⁰ Nebutswa Yesu yakahul'la ma nabool'la Jairo, “Oraria tawe, subila busubila, ne yetsa okhuhona.”

⁵¹ Olwa yoola munyumba, siyahuchil'la omundu wosi okhwinjila n'naye tawe narali Petero, Yohana, Yakobo nende abebuli bomukhaana uyo.

⁵² Abandu bosi bali nibalakayanga, nibekhuula khulwo okhufwa khwomwana uyo. Ne Yesu nababool'la, “Muralakaya tawe, sichila omwana uyu siafwiye tawe, nebutswa akonanga.”

⁵³ Nabo nibamutsekhel'la sichila bali nibamanyile ufwiye.

⁵⁴ Nebutswa Yesu yamutila omukhono ma naboola, “Buukha omwana wanje!”

⁵⁵ Omwoyo kukwe nikukalukha muye, nabuukha bwangubwangu. Yesu nabalaka mbu bamuhe esiokhulia.

⁵⁶ Abebuli baabe bachenya, nebutswa Yesu nabakaya barakhabool'lakhwo omundu wosi akali nikekhol'le yako tawe.