LUKA 7 - EBAIBO INZIENUKHU

Yesu yahonia omurumikhili wetswoni

¹ Olwa Yesu yali namal'le okhuboola amang'ana yako kosi khubandu, yatsia Kaperinaumu.

² Omurumikhili wetswoni nalebe, owa yali niyayanza, yali nalwala nali ahembi okhufwa.

³ Olwetswoni yahul'la aka Yesu, yaruma khuye abakhulundu ba Bayahudi okhumusaaya yetse okhuhonia omurumikhiliwe.

⁴ Olwa boola khu Yesu bamuhomba buuli nibaboola, “Omundu uyu akwan'ne omukhol'le singa obwa akhusaayile.

⁵ Wayanza oluyia lwefwe ma kata omwene wakhwombokhela esinakoki yefwe.”

⁶ Yesu yamala natsia n'nabo. Olwa yali nali ahembi okhwola, etswoni yamurumila abalina okhumubool'la, “Omwami, oranyakhana tawe. Okhuba singwan'ne ibe unzitsile munyumba mwanje tawe.

⁷ Niko akachil'le nindola sindi onyala okhwitsa khuibe omwene tawe; haana butswa ling'ana ne omurumikhili wanje alahona.

⁸ Okhuba ise khandi ndi omundu owabikhwa inyuma wobunyali, ma ndi nende abasikari inyuma wanje. Mbool'langa mulala ‘Tsia’, ne atsia; ne oundi ‘Yitsa’ naye niyetsa; khandi mbool'langa omurumikhili wanje, ‘Khola yili’ ma akhola.”

⁹ Yesu yachenya olwa yahul'la mbwo, nasukhana nabool'la omukanda okwali nikumulondanga, “Mubool'langa sili okhunyoolakhwo obusubili singa buno, kata mu Isiraeli mwosi.”

¹⁰ Abali okhurumwa olwa bakalukha ingo wetswoni banyoola omurumikhili tsana nahon'ne.

Yesu yasimukusia omwana womulekhwa

¹¹ Inyuma khwo hatititi, Yesu yatsia mwitaala elialangwa Naini, nali nende abechibe ma nende omukanda omukali.

¹² Ne olwa yoola butswa musilibwa sielitaala, abandu barul'la mwo nibachingile om'bili kwomusiani, owali omwana omutelwa womukhasi omulekhwa. Abandu abenji abomwitaala bali nende omukhasi uyo.

¹³ Olwo Omwami yamulola, yamubool'la, “Oralakaya tawe.”

¹⁴ Niyesunda ahembi n'naye, ma natsia natila khwisanduku liomufu ma abandu abali nibalichingile nibasinjila. Yesu naboola, “Omusiani, khubool'langa buukha.”

¹⁵ Owali nafwiye yekhala nachiaka okhul'loma. Ne Yesu namuhana khunyina.

¹⁶ Oburi bwabahamba bosi, nibetsoomia Nyasaye, nibaboola, “Omuroobi omukhongo ubuukhile mwifwe. Nyasaye witsile okhuhonia abandu baabe.”

¹⁷ Amang'ana yako kalanda musibala sie Buyahudi siosi nomumbeka tsindi.

Abarumwa okhurula khu Yohana Omubaputisi

¹⁸ Olwa abechi ba Yohana bamubool'la amang'ana yaka kosi, yalanga babili khubo,

¹⁹ ma nabaruma khu Mwami bamurebe, “Ibe niwe owaboolwa owitsanga nohomba khulindil'le oundi?”

²⁰ Olwa abechi babili yabo boola khu Yesu bamubool'la, “Yohana Omubaputisi akhurumile khukhurebe noli niwe owa yaboola witsanga nohomba khulindil'le oundi?”

²¹ Olwene yilwo Yesu yahonia abandu abenji abali nobulwaye, nende tsifu nende ebisieno khandi nahaana okhulola khubali nibabofula.

²² Nakalusia abarumwa ba Yohana nababool'la “Tsie, mubool'le Yohana aka mulutsi khandi nende aka muhuliye. Ababofu balolanga ne abalema bachendanga, yabo abali nobuchele basiywanga, abasilu bahul'langa, abafwa basimukusibwanga, ne abatakha bakambilwanga Amang'ana Amalahi.

²³ Noweikhabi omundu orali na honzoni khwise.”

²⁴ Olwa abarumwa ba Yohana bali nibatsiye, Yesu yachiaka okhubool'la emikanda aka Yohana. “Olwa mwatsia musitsiimi mwenyanga okhulola sina? Mwenyanga okhulola obunyasi butswa obunuywanga nomuyeka?

²⁵ Kho mwatsia okhulola sina? Mwenyanga okhulola omundu owebikhile tsingubo tsindahi? Abandu abebiikhanga tsingubo tsindahi nibalia obwale, bamenyanga mutsinyumba tsiabaami.

²⁶ Mbool'le, inywe mwatsia okhulola sina? Mwatsia okhulola omuroobi nohomba? Yee, mubool'langa mbu mwalola uyu oyombele omuroobi.

²⁷ Yohana uyu niye owa Amahandiko Amatsienukhu kaboolanga, ‘Ndakharume omurumwa wanje imbeliwo, mbu akhulombele injila.’

²⁸ Mubool'langa, Mubaana babandu bosi sialikhwoho omukhongo okhuyomba Yohana Omubaputisi tawe. Kata mbwo oli omutu mu Bwami bwa Nyasaye nomukhongo okhuyomba Yohana.”

²⁹ Abandu bosi halala nende abasololi bobusuru olwa bamuhulila bahuchil'la obulunji bwa Nyasaye, ma bali nibabaputiswa nende Yohana.

³⁰ Nebutswa Abafarisayi nende abebaali ba Malako basula obuloosie bwa Nyasaye khubwabwe ma sibabaputiswa nende Yohana tawe.

³¹ Yesu natsilil'la okhuboola, “Ndakhafwanania abandu belisuba yili nende sina? Nabandu bambila sina abene yaba?

³² Bafwana singa ababuukha abekhaye musiiro. Omukanda mulala kuhanzukhilanga okundi nikuboola, ‘Khumwembeye tsinyembo tsiebisel'lo ne simusin'ne tawe, khumwembeye tsinyembo tsiesibeela ne simulakayile tawe.’

³³ Yohana Omubaputisi yetsa ne siyalachila khwo obusuma nohomba okhunywa ewaini tawe, ne inywe nimuboola, ‘Ali nes'sieno!’

³⁴ Omwana wo Mundu niyetsa nalachilanga ne nanywa, nimuboola, ‘Lole omundu omulangu khandi omunywi uyu, omulina wabasololi bobusuru nende aboni.’

³⁵ Kata mbwo obuchesi bwa Nyasaye bumanyibwanga okhuba obulunji nende yabo bosi ababuhuchil'langa.”

Yesu yatsia munyumba mwa Simoni Omufarisayi

³⁶ Omufarisayi mulala yalanga Yesu atsie okhulia munyumba mumwe. Yesu natsia munyumba yimwo ma niyekhala khubiakhulia.

³⁷ Mwitaala yimwo yalimwo omukhasi owamenyanga obulamu bwetsimbi. Olwa yahul'la mbu Yesu ali munyumba yo Omufarisayi uyo, yabukula echupa ya amafura akahunyanga esuswa

³⁸ niyetsa nasinjila inyuma wa Yesu ahembi nebilenjebie, nalakaya nasaaba ebilenje bia Yesu nende amasika kaake. Ma niyeya ebilenje bia Yesu nende liswi liokhumurwe kukwe, nabitsunzuna ma nabibakha amafura tsana.

³⁹ Omufarisayi owamulanga olwa yalola yaka ne napaala mumwoyokwe, “Omundu uyu alaba nali omuroobi tooto yakhamanyile omukhasi uyu noweimbila sina, mbu nowetsimbi.”

⁴⁰ Yesu nabool'la Omufarisayi uyo, “Simoni, ndi nende ling'ana elia nyenya okhukhubool'la.” Ne Simoni naye namukalusia naboola, “Yee omwibaali, boola.” Yesu naboola,

⁴¹ “Omuhambia libere nalebe yali nabandu abali namakobi babili. Mulala yali nelikobi etsidinari etsimia tsirano, ne oundi etsidinari amakhumi karano.

⁴² Olwa baramwa okhurunga amakobi kabwe, omundu uyo yabalekhela bombi. Niwina mubo owakhayanza omundu uyo okhusila?”

⁴³ Simoni namukalusia naboola, “Mbaalanga nowalekhelwa tsinyinji.” Yesu namubool'la “Oli habwene.”

⁴⁴ Ma nasukhana khumukhasi uyo ne nabool'la Simoni, “Ololanga omukhasi uyu? Olwa nyinjiye munyumba mwo siumbeye khwo amaatsi kokhwesaaba ebilenje bianje tawe; nebutswa omukhasi uyu usaabile ebilenje bianje nende amasika kaake ne nabieya nende liswi lilie.

⁴⁵ Ibe siwali okhunyinjisia nende okhunzunzuna tawe, nebutswa ye okhurula olwa nyinjiye sialekhele khwo okhutsunzuna ebilenje bianje tawe.

⁴⁶ Ibe siumbakhile khwo amafura khumurwe kwanje tawe, nebutswa ye umbakhile ebilenje bianje amafura.

⁴⁷ Niko akachil'le nikhubool'la, obuyanzi obwinji obwa amanyisie bumanyianga mbu tsimbi tsitsie tsinyinji tsilekheywe. Nebutswa uyo owalekhelwa tsindititi amanyianga obuyanzi obutititi butswa.”

⁴⁸ Ma Yesu nabool'la omukhasi uyo, “Tsimbi tsitsio tsilekheywe.”

⁴⁹ Ne abali nibekhaye n'naye khubiokhulia nibachiaka okhurebana, “Uyu nimundu wambila sina onyala okhulekhela abandu tsimbi?”

⁵⁰ Nebutswa Yesu yabool'la omukhasi uyo, “Obusubili bubwo bukhuhonisie; tsia nomulembe.”