LUKA 6 - EBAIBO INZIENUKHU

Lireebo khukelitukhu lie Sabato

¹ Yesu yali nabir'ranga mumikunda chiobule khwitukhu lie Sabato. Abechi baabe nibachiaka okhunoka ebiangala biobule nibafulungusisia mumakhono nibalia.

² Abafarisayi abalala nibabareeba, “Busina mukholanga akomusilo mwitukhu lie Sabato?”

³ Yesu nabakalusia, “Musili okhusomakhwo aka Daudi yakhola halala nende abasie olwa bali neinzala?

⁴ Yenjila munyumba ya Nyasaye nabukula emikati echiahanwa khu Nyasaye ma nalia khandi nahakhwo abandu baabe. Ne nomusilo khumundu wosi okhulia khwo emikati yichio nibarali abesaalisi bonyene.”

⁵ Ma Yesu namalila nokhuboola, “Omwana wo Mundu niye Omwami we Sabato.”

Yesu yahonia omundu owomukhono kwanyela

⁶ Mu Sabato yindi Yesu yatsia musinakoki niyebaala. Omundu yalimwo owomukhono kukwe omusaatsa kwali nikwanyela.

⁷ Abebaali ba Malako nende Abafarisayi benyanga banyoole esifune esiokhumwinjil'la, ma nibalindil'la balole niyakhahonia mwitukhu lie Sabato.

⁸ Nebutswa Yesu yamanya amakani kabwe, nabool'la omundu womukhono kwanyela, “Sinjila, wesunde hakari womukanda.” Omundu uyo natsia nasinjila hakari.

⁹ Ma Yesu nababool'la, “Murebanga, nomusilo okhukhola amalahi mwitukhu lie Sabato nohomba okhukhola amabi? Okhuhonia obulamu nohomba okhwira?”

¹⁰ Yabahenga bosi ma nabool'la omundu tsana, “Nyiila omukhonokwo.” Ne naye nakhola mbwo, ne omukhonokwe nikuhona.

¹¹ Basinyikha okhusila ma nibabool'lana obwa nabakhol'le Yesu.

Yesu yela abechi likhumi nende babili

¹² Olwene yilwo Yesu yatsia khusikulu okhusaaya, ma namalayo obutukhu bwosi nasaayanga khu Nyasaye.

¹³ Olwa bwasia, yalanga abechi baabe, niyela mwo likhumi nababili aba yakulikha abarumwa:

¹⁴ Simoni (owa yakulikha Petero), nende Anderea omwana wabwe, Yakobo nende Yohana, Filipu nende Batsolomayo,

¹⁵ Matayo nende Tomasi, Yakobo omwana wa Alufayo, nende Simoni (owalangwa Selote),

¹⁶ Yudasi omwana wa Yakobo, nende Yudasi Isikariote owamala nasiemana Yesu.

Yesu yebaala nahonia abandu

¹⁷ Olwa Yesu yali niyekhele okhurula khusikulu halala nende abarumwa baabe, yasinjila habundu ahel'lekhe. Omukanda omukhongo okwabechi baabe nende abandu abenji abarula Ebuyahudi yosi nende Yerusalemu ma nende khutsinjinga tsia Turo nende Sidoni, bosi betsa okhumuhulila nende okhuhonibwa tsifu tsiabwe.

¹⁸ Khandi yahonia bosi abali nemioyo chiesifwabwi.

¹⁹ Abandu bosi batemanga okhumutiila khwo, sichila obunyali bwarulanga khuye, nibubahonia bosi.

Tsikhabi nende esibeela

²⁰ Yesu yahenga abechi baabe ma naboola, “Muli neikhabi inywe abatakha, sichila obwami bwa Nyasaye nobwenywe

²¹ “Muli neikhabi inywe abali neinzala luno; sichila mwakhekure. “Muli neikhabi inywe abalakayanga luno; sichila olweinyuma mwakhatsekhe.

²² “Muli neikhabi nyinga abandu bamubihil'lwanga, nibamusula, nibamunyeka, nende okhubihia amera kenywe, khulwo Mwana wo Mundu.

²³ Sangale mwitukhu yilio, mwetuute khulwo obusangali, sichila omukabwa kwenywe omukali kuli mwikulu. Okhuba nimbwo abakuka babwe bakhol'la abaroobi.

²⁴ “Nebutswa Mulitsiboolelwa inywe abahinda, sichila mumal'le okhunyoola obuhuluukhi bwenywe.

²⁵ “Mulitsiboolelwa inywe abekuranga luno, sichila olweinyuma mwakhahul'le inzala. “Mulitsiboolelwa inywe abatsekhanga luno, sichila mwakhabeelele nimulakaya.

²⁶ “Mulitsiboolelwa olwa abandu bosi bamuralanga obulahi, sichila abakuka babwe bakhol'la abaroobi bobubehi akene yako.

Okhuyanza Abasuku

²⁷ “Nebutswa mubool'langa inywe abambul'langa; Muyanze abasuku benywe, mukhol'le yabo abamubihil'lwanga obulahi,

²⁸ mubalamile ikhabi yabo abamulamanga esilamo siobubi, mubasaayile abamunyekanga.

²⁹ Omundu naba nakhukhupaka oluhi khuluseya, omusukhanichisie oluseya lundi khandi akhupake khwo; Omundu nabukula likoti, omulekhele lisati khandi.

³⁰ Omundu wosi nakhusaba esindu omuhelesie, ne omundu naba nakhunuula emianduchio oramubanza tawe.

³¹ Mukhol'le abasienywe akamwenyanga nabo bamukhol'le.

³² “Nimuba nimwakhayanza abandu abamuyanzanga bonyene, neikhabi sina eyamwakhanyoola? Kata abetsimbi bayanzanga yabo aba bayanzanga.

³³ Ne nimuba nimukhol'la obulahi yabo abamukhol'langa obulahi bonyene, neikhabi sina eyamwakhanyoola? Kata abetsimbi bakholanga mbwo.

³⁴ Ne nimuba nimwakhahambia libere khu yabo aba munaayanga mwakhatoolakhwo injelesio, neikhabi sina eyamwakhatoola? Kata abetsimbi bahambianga libere khubetsimbi basiabwe, khe babakaluchisie singa mbwo.

³⁵ Tawe, nebutswa muyanze abasuku benywe, ma mubakhol'lenge obulahi. Muhambie libere sila okhunaya okhukaluchisibwa, nilwo olwa mwakhanyoole amatani amenji ma mwakhabe abaana ba Nyasaye Oweikulu Okhusila. Okhuba ye nomulahi khu abarali nende embwo nende khubabi.

³⁶ Mube abetsimbabasi singa Papa wenywe ali owetsimbabasi.

Okhukhalachila abandi

³⁷ “Murakhalachila abandi esiina, kho Nyasaye alekhe okhumukhalachila esiina; murakhalachila abandi obubi, kho Nyasaye arakhamukhalachila obubi tawe; mulekhele abasienywe, kho Nyasaye amulekhele.

³⁸ Muhaane khubasienywe, ne Nyasaye yakhamuha omuchelo omulahi, okwikar'rwe, okusungusilwe ma okubungulukhile. Omuchelo okwa murumikhilanga okhuchel'la mwo abasienywe nikwo okwa Nyasaye yakhamuchel'lemwo.”

³⁹ Yesu Nababool'la olukano luno, “Omubofu siyakhanyala okhwemel'la omubofu wasie tawe. Nakhola mbwo bombi bakhakwa mubuko.

⁴⁰ Omwechi siayomba omwibaali we tawe, nebutswa omwechi wosi niyakhamala ameko kaake ne ahelana nende omwibaaliwe.

⁴¹ “Busina ohenganga oluswaswi oluli mumoni yomwana wenywe nebutswa siololanga omukul'lo okuli mumoni mwo tawe.

⁴² Nohomba, wakhabool'la mbwena omwana wenywe, ‘Mwana wefwe, lekha khuhinie oluswaswi mumoni mumwo,’ ne siololanga omukul'lo okuli mumoni mumwo tawe? Omukalama ibe, orange ohinie omukul'lo mumoni mumwo, khe olole bulahi okhuhinia oluswaswi oluli mumoni yomwana wenywe.

Omusaala nende ebiamo biakwo

⁴³ “Omusaala omulahi sikwamanga ebiamo ebibi tawe, nohomba omusaala omubi sikwamanga ebiamo ebilahi tawe.

⁴⁴ Siomusaala kumanyikhanga khulwe ebiamo ebia kwamanga. Sionyala okhunoka amakhuyu khumahwa tawe, nohomba sionyala okhunoka emisabibu khumarakalu tawe.

⁴⁵ Omundu omulahi ahinianga akali amalahi mwibiikhilo lilie lilahi elio mumwoyo kukwe; nebutswa omundu omubi ahinianga amabi. Okhuba ako omwoyo kwasilana n'nako niko akomunwa kuboolanga.

Omwombokhi omuchesi nende omuhingwa

⁴⁶ “Busina munanganga ‘Omwami, Omwami,’ ne simukholanga akamubool'langa tawe?

⁴⁷ Wosi owitsanga khwise, nahulila amang'ana kanje, ne nakakhola, ndakhamumanyia obwa afwana.

⁴⁸ Afwana nende omundu owombokha inyumbaye, nayaba hasi okhusila, nara omuse khulwanda. Olwe ikhumaatsi yarul'lamwo, omuchel'la kwelumba khunyumba tsana nebutswa sikwachitechesia tawe, sichila yali niyombokhwa obulahi.

⁴⁹ Nebutswa omundu wosi ohul'langa amang'ana kanje ne narakalonda, afwana nende omundu owombokha inyumba hasi sila okhuyaba omuse. Olwomuchel'la kwelumbakhwo yamala ekwe bwangu – ne okhukwa khwayo khwali okhukali okhusila.”