LUKA 5 - EBAIBO INZIENUKHU

Yesu yalanga abalubi bataru okhumulonda

¹ Litukhu elala Yesu yali nasinjiye khuluchinga lweinyanza ya Genasareti, ne abandu abenji bali nibaminananga okhwitsa khuye okhuhul'la ling'ana lia Nyasaye.

² Yalola amaaro kabili nikasinjisiibwe khuluchinga lweinyanza. Abalubi bali nibarul'le nibosianga amakoko kabwe.

³ Yesu yaniina muliaro elala khuko – eliali elia Simoni ma namureeba aliselechesie hatititi okhurula khuluchinga. Niyekhala muliaro niyebaal'la emikanda.

⁴ Olwa yamala okhul'loma yabool'la Simoni, “Selechesia eliaro olihile mulutungu lwamaatsi ma ibe nende abasio mwisie amakoko kenywe mumaatsi mutile tsisuche.”

⁵ Simoni namukalusia, “Omwami, khunyakhan'ne obutukhu bwosi, sikhutil'le isutse yosi tawe, nebutswa sichila ubooye ndesia amakoko.”

⁶ Nibeesia amakoko ma nibatila tsisuche tsinyinji okhusila ma amakoko kabwe nikachiaka okhukhalikha.

⁷ Bamala nibasima abasiabwe abali mumaro kandi okhubakhonya. Betsa ma nibetsusia amaro kabwe kosi netsisutse, nikenya okhweyinikha.

⁸ Olwa Simoni Petero yalola akali nikekhol'le, yasikama imbeli wa Yesu naboola, “Omwami, rula khwise, sichila ndi omundu wetsimbi.”

⁹ Ye nende aba yali n'nabo bosi bachenya khulwo obwinji bwetsisutse tsia bali nibahambile.

¹⁰ Khandi amatelwa yako kali khubasie Yakobo nende Yohana, abaana ba Sebedayo. Yesu nabool'la Simoni, “Oraria tawe, okhurula lunondi nobetsenje omulubi wabandu.”

¹¹ Bamala nibaleera amaaro kabwe khuluchinga ma nibalekha ebindu biosi, nibalonda Yesu.

Yesu yahonia omundu wobuchele

¹² Olundi Yesu yali mwitaala nalebe, omundu owali nobuchele khumubili kwosi yetsa khuye. Olwa yalola Yesu yamala nakwa hasi mafung'ama nahomba Yesu naboola, “Omwami noba noyanza onyala okhuusiiya.”

¹³ Yesu nanyiila omukhono kukwe, namutilakhwo ma naboola, “Nyanzile, osiiyikhe.” Ne bwangu obuchele niburula khumundu uyo.

¹⁴ Yesu namulaka butinyu, “Orakhabool'la khwo omundu wosi tawe, nebutswa otsie khumwesaalisi akhuhengelesie ma khulwa okhumanyia abandu mbu umal'le okhusiyikha, ohaane esihanwa esia Musa yalaka.”

¹⁵ Nebutswa oluyali lwa Yesu lwalanda habundu hosi. Emikanda emikhongo chiabandu chiebunjikha khulwa okhumuhul'la nende okhuhonibwa obutekhele bwabwe.

¹⁶ Nebutswa Yesu yeyahula natsia ha bandu barali, nasaayila ho.

Yesu yahonia omundu owakwa likara

¹⁷ Litukhu elala Yesu yali niyebaalanga, ne abalala khu Bafarisayi nende abebaali ba Malako mumataala kosi aka Galilaya, Ebuyahudi nende Yerusalemu bali nibekhayeho. Obunyali bwo Mwami bwali nibuli khuye obwokhuhonia abalwaye.

¹⁸ Abandu betsa nibachingile omundu owakwa likara nali khusirili, nibatema okhumwinjisia bamure imbeli wa Yesu.

¹⁹ Nebutswa khulwo obwinji bwabandu, sibanyoola obwa bamwinjisia tawe. Bamala nibaniina khusilama nibasambula habundu nibechis'sia ho omundu owakwa likara halala nesirili sie, nibamura imbeli wa Yesu.

²⁰ Olwa Yesu yalola obwa bali nobusubili obukali, yabool'la omundu owakwa likara, “Omulina, tsimbi tsitsio tsilekheywe.”

²¹ Abebaali ba Malako nende Abafarisayi nibachiaka okhubool'lana abene khu bene, “Uyu ni mundu sina onyekanga Nyasaye? Abulaho onyala okhulekhela tsimbi narali Nyasaye yenyene.”

²² Nebutswa Yesu yamanya amapaalo kabwe ma nababool'la, “Busina mukanakananga yaka mumioyo chienywe?

²³ Nobutoro okhuboola, ‘Tsimbi tsitsio tsilekheywe;’ nohomba okhuboola, ‘Sinjila ochende?’

²⁴ Kho nyenyanga mumanye mbu Omwana wo Mundu ali nende obunyali musibala okhulekhela tsimbi.” Ma nabool'la owakwa likara, “Sinjila obukule esirili sisio otsie ingo.”

²⁵ Ne bwangu bwangu omundu owakwa likara nasinjila, nabukula esirili sisie, narula natsia ingo niyetsomianga Nyasaye.

²⁶ Bosi nibachenya nibaba nende oburi, nibafumia Nyasaye nibaboola, “Khulol'le akokhuhuka olwaleelo.”

Yesu yalanga Matayo okhumulonda

²⁷ Inyuma we yaka Yesu yatsia nalola omusololi wobusuru owalangwa Lawi niyekhaye ha yasolol'langa obusuru. Yesu namubool'la, “Nonda.”

²⁸ Lawi nasinjila, nalekha biosi, ma namulonda.

²⁹ Lawi yalombela Yesu lisabo likali hango hahe. Ne abasololi bobusuru abenji nende abandu bandi bali nibekhaye halala n'nabo khubiokhulia.

³⁰ Abafarisayi nende abebaali ba Amalako nibekan'na abechi ba Yesu nibaboola, “Busina mulitsanga nimunywa nende abasololi bobusuru nende abetsimbi?”

³¹ Yesu nabakalusia, “Abandu abali abalamu sibarunanga omulesi tawe, nebutswa abarunanga omulesi na abalwaye.

³² Ise sindaitsa okhulanga abalunji tawe – nebutswa abetsimbi khe baabe abanyala okhwekalukhania.”

Lireebo khukokhuhonga okhulia

³³ Abandu bandi babool'la Yesu, “Abechi ba Yohana bahonganga okhulia hali khasotso, nibasaaya, khandi abechi ba Bafarisayi nabo bakholanga mbwo; nebutswa abechi baabo baliitsanga butswa nibanywa.”

³⁴ Yesu nabakalusia, “Muli abanyala okhuhachia yabo abalanjilwe mus'selelo okhuhonga okhulia olwo omusaatsa mwene s'selelo ali n'nabo?

³⁵ Nebutswa amatukhu kakhole olwa omwene es'selelo yakhahinibwe khubo, nilwo olwa balihonga okhulia.”

³⁶ Yesu nababool'la olukano yilu: “Abulaho omundu orandulanga esilaka khungubo imbia nanabila khungubo ikhulu. Nakhola mbwo yakharandula ingubo ne khandi esilaka esihia yisio sisiakhafwanana nende ingubo tsana tawe.

³⁷ Khandi abulaho omundu otsukhanga ewaini imbia mumitata chiamaseelo emikhulu, sichila ewaini enyala okhurandula amaseelo ma esundukhe hasi, ma emitata chiononokhe.

³⁸ Nebutswa ewaini imbia okhwola etsukhwe mumitata chiamaseelo emihia.

³⁹ Abulaho omundu owenyanga ewaini imbia namal'le okhunywa ewaini ikhulu sichila yakhaboola ‘Eyakhale neindahi okhuyomba imbia.’ ”