LUKA 4 - EBAIBO INZIENUKHU

Okhutemwa khwa Yesu

¹ Yesu yarula mumuchela kwa Yorodani niyetsuye nende Omwoyo Omutsienukhu ma niyemel'lwa no Mwoyo okhutsia musitsiimi,

² omwa yatemelwa nende Setani khulwa amatukhu amakhumi kane. Mumatukhu yako kosi siyaliakhwo esindu siosi tawe, ma naba nende inzala ingali.

³ Setani namubool'la, “Noba noli Omwana wa Nyasaye, laka lichina yili likwe obusuma.”

⁴ Nebutswa Yesu namukalusia, “Akahandikwa kaboolanga, ‘Omundu siamenyanga khulwobusuma bwonyene tawe.’ ”

⁵ Ma Setani namwanichisia namumanyia obwami bwosi obwomusibala mudakika ndala

⁶ ma Setani namubool'la, “Nyala okhukhuhelesia obunyali yibu bwosi nende obuhinda yibu bwosi, sichila ndahebwa yibi biosi, ninyenya okhuhelesia omundu nemuhelesia.

⁷ Yibi biosi biakhaba ebibio noba niundekayakaya.”

⁸ Yesu namukalusia, “Akahandikwa kaboolanga, ‘Wekayakaye Omwami Nyasayewo ma omurumikhile ye yenyene.’ ”

⁹ Setani namuhila Yerusalemu, namusinjisia khus'suli sie Hekalu, namubool'la, “Noba noli Omwana wa Nyasaye, welumbe hasi,

¹⁰ sichila kahandikwa, ‘Nyasaye yakharume abamalaika baabe bakhulinde.’

¹¹ Khandi kahandikwa, ‘Balakhuletel'la mumakhono kabwe, khase wakhesikar'ra esilenje sisio khwichina.’ ”

¹² Nebutswa Yesu namukalusia, “Kahandikwa: ‘Oratema Omwami Nyasaye uwo tawe.’ ”

¹³ Olwa Setani yali namal'le okhutema Yesu mutsinjila tsiosi, yamulekha khulwe inyinga ehel'le.

Yesu achiachila omulimo kukwe mu Galilaya

¹⁴ Yesu yakalukha Galilaya, ne tsingufu tsio Mwoyo Omutsienukhu tsiali nitsili khuye. Oluyali lulwe lwalanda mutsimbeka tsiosi etsiesibala yisio.

¹⁵ Niyebaala mutsisinakoki tsiabwe, ne bosi nibamufumia.

Yesu yasulwa Nasareti

¹⁶ Kho Yesu yatsia Nasareti, aha yakhul'la; ne khwitukhu lie Sabato yatsia musinakoki singa yali niyanala. Yasinjila okhusoma amahandiko

¹⁷ ma nahebwa esitapu siomuroobi Isaya, nasibambula ma nanyoola habundu aha kali nikahandikwa mbu,

¹⁸ “Omwoyo wo Mwami ali khwise, sichila unzel'le mbu ngambile abatakha amang'ana amalahi. Yarumile okhukamba obulakhuule khubabohe, ababofu balole, okhuboholola abachiaywanga,

¹⁹ Nende okhulandia omuhika kwo Omwami ayanzile khubandu baabe.”

²⁰ Namal'le okhusoma, yafumba esitapu ma nakalusisia omurumikhili, ma niyekhala. Abandu bosi abali musinakoki bamureela tsimoni.

²¹ Nachiaka okhubabool'la, “Akahandikwa yaka aka muhuliye nikasomwa, leelo kahesiibwe.”

²² Bosi bakobokhela aka yaboola mbu namalahi ma nibachenya khulwo obulwenyukhu bwamang'ana akarula mumunwa kwe, nibaboola, “Uyu siali omwana wa Yosefu?”

²³ Nababool'la, “Manyile mwakhambool'la olukano yilu: ‘Omulesi wehonie omwene.’ Khandi mwakhaboola, ‘Amang'ana aka khwahul'la wakhola Kaperinaumu, okakholekhwo hano musibala sienywe.’

²⁴ Mubool'langa akatooto, omuroobi siayanzwanga musibala siabwe siene tawe.

²⁵ “Hulile: nitooto mbu baliho abakhutsakhali abenji mu Isiraeli mumatukhu ka Elija, olwe ifula yabula okhukwa khulwemihika chitaru nende emiesi chisasaba, ma inzala ingali neba musibala siosi.

²⁶ Ne kata mbwo Elija siyarumwakhwo khumukhutsakhali undi wosi narali omukhasi omukhutsakhali wa Sarefatsi, musibala sia Sidoni.

²⁷ Ne baliho abachele abenji musibala sia Isiraeli mumatukhu komuroobi Elisha. Ne kata mbwo abulaho owasiiywa narali Naamani Omusiria yenyene.”

²⁸ Olwabandu abali musinakoki bahul'la akene yaka oburima bwabahamba okhusila.

²⁹ Nibasinjila ma nibakhwesa Yesu esioba welitaala nibamuhila khubutenje bwesikulu sielitaala liabwe liombokhwakhwo. Bachoomanga okhumulumba hasi okhurula khusikulu,

³⁰ nebutswa Yesu yabir'ra hakari wabwe natsia.

Omundu owomwoyo Kwesifwabwi

³¹ Yesu yamala natsia Kaperinaumu, litaala elili mu Galilaya, ma naba yebaal'langa abandu litukhu lie Sabato.

³² Bosi bahuka singa obwa yebaalanga, sichila yebaalanga nende obunyali.

³³ Musinakoki tsana yalimwo omundu owali nende omwoyo kwesifwabwi, yahanzuukha butinyu naboola,

³⁴ “Bayaye. Orunanga sina khwifwe, Yesu wa Nasareti? Witsile okhukhuye nohomba? Manyile ibe oli Omutsienukhu wa Nyasaye.”

³⁵ Yesu nakondekhela es'sieno yisio naboola, “Siling'ana ma orule mumundu uyu.” Es'sieno siamala nisimulumba hasi imbeli wabwe ma nisirula muye sila okhumusaalisia.

³⁶ Abandu bosi bachenya ma nibabool'lana abene khubene, “Yaka ni mang'ana sina? Omundu uyu alakanga emioyo chiesifwabwi nobunyali ma nende tsingufu ne chirula.”

³⁷ Oluyali lwa Yesu lwalanda mumbeka tsiosi.

Yesu yahonia abandu abenji

³⁸ Yesu yarula musinakoki ma natsia niyenjila munyumba ya Simoni. Nyakhusala Simoni yali nalwala omurengo omukali, nibamuhomba amuhonie.

³⁹ Yatsia nasinjila ahembi n'naye nalaka omurengo okhurula muye. Omurengo kwamala nikurula muye ma nabuukha bwangu nachiaka okhubarumikhila.

⁴⁰ Nyinga eliuba liali niliyeelanga, bosi abali nabalwaye abobulwaye tsimbila lukano bamuler'ra, naye nara amakhonoke khu siamulala khubo, nabahonia bosi.

⁴¹ Ebisieno biarula mubandu abenji nibihanzukha, “Ibe oli Omwana wa Nyasaye.” Yesu yakondekhela ebisieno, ne siyabihuchil'la okhul'loma tawe, sichila biamanya mbu niye Masihi.

Yesu yakamba mutsisinakoki

⁴² Omukamba okwalondakhwo mumabwebwe Yesu yarula natsia habundu ahebisu yenyene. Emikanda chiabandu chiachiaka okhumuruna, ne olwa bamunyoola batema okhumwikal'la alekhe okhurula khubo.

⁴³ Nebutswa nababool'la, “Okhwola ngambe Amang'ana Amalahi ako Bwami bwa Nyasaye mumataala kandi, sichila yako niko aka Nyasaye yaruma okhukhola.”

⁴⁴ Ma nakamba mutsisinakoki musibala siosi.