LUKA 3 - EBAIBO INZIENUKHU

Obukambi bwa Yohana Omubaputisi

¹ Mumuhika kwelikhumi nakharano okwobwami bwo Omuruchi Tiberio, Pontio Pilato yali nali Omukafuna we Buyahudi ne Herode nali omwami we Galilaya ne Filipu omusiani wabwe nali omwami womumbeka tsia Iturea nende Tarakoniti; Lusania naye nali omwami wa Abilene;

² ne Anasi nende Kayafa bali abesaalisi abakhongo. Olwene yilwo ling'ana lia Nyasaye liabisukha khu Yohana Omwana wa Sakaria nali musitsiimi.

³ Kho Yohana yatsia mumbeka tsiosi etsio omuchela kwa Yorodani, nakambanga, “Murule mutsimbi tsienywe, mubaputiswe, ne Nyasaye namulekhele tsimbi tsienywe.”

⁴ Singa obwa kahandikwa musitapu siomuroobi Isaya: “Omundu nalebe alanjisianga musitsiimi. ‘Mulombele Omwami injila yiye mulunjisie emihanda chichie

⁵ Siolubanda lwil'lusibwe siesianichisi nende esikulu simumulwe ahasiamu hosi hakol'losibwe, tsinjila tsia machinjili tsirelesibwe.

⁶ Ne abandu bosi bakhalole obuhoni bwa Nyasaye.’ ”

⁷ Yohana nabool'la emikanda eminji echietsa khuye khulwa okhubaputiswa, “Inywe olwibulolwe tsinzokha, niwina omuchetsihisie okhwilukha lirima eliitsanga?

⁸ Mukhole ebindu ebiakhamanyia mbu murul'le mutsimbi tsienywe. Ne murachiaka okhuboola khubwenywe, ‘Ifwe khuli nende Aburahamu kuka wefwe.’ Mubool'langa siahene mbu Nyasaye anyala okhubukula amachina yaka alombele Aburahamu abetsukhulu.

⁹ Nebutswa luno imbatso yerechekhele okhuremaka ebisina biemisaala. Siomusaala okuraama ebiamo ebilahi kularemakwa nikufuubwa mumul'lo?”

¹⁰ Omukanda kwabandu nikumureba, “Kho khukhole sina?”

¹¹ Nakalusia, “Wosi oli nende tsingubo tsibili akabul'le khwo obula ingubo, ne oli nende ebiokhulia khandi naye akhole mbwo.”

¹² Abasololi bobusuru betsa khuye mbu ababaputise, nibamureeba, “Omwibaali, khukhole sina?”

¹³ Naye nabakalusia, “Murasololenge obusuru okhuyomba obwa kalakwa tawe.”

¹⁴ Abasikari abalala nabo nibamureeba, “Nefwe khukhole sina?” Nabakalusia, “Murakhabukula ebindu biomundu wosi khulwe tsingufu nohomba okhuyaala omundu wosi khulwobubehi tawe. Omurungo kwenywe kumuhelenge.”

¹⁵ Bosi bali nibalindil'langa esindu nalebe ma nibachiaka okhupaala mumioyo chiabwe khuka Yohana, akhali niye Masihi noho?

¹⁶ Ma Yohana nababool'la bosi, “Ise mubaputisanga mumatsi, nebutswa aliho owitsanga oli nobunyali okhunyomba. Ise kata singwan'ne okhwinama okhubohol'la emikoye chiebilaro bibie tawe. Yakhamubaputise mu Mwoyo Omutsienukhu nomul'lo.

¹⁷ Ali nende olutelu lulwe mumukhonokwe khulwa okhuseesa nende okhwilula ingano yiye are musitela, ne omukhuutsi yakhasambe nende omul'lo okurasimanga.”

¹⁸ Yohana yatinyilisia abandu namang'ana amenji, nabatsuuba nende okhubakambila Amang'ana Amalahi.

¹⁹ Nebutswa Yohana yakondekhela Herode, owali Omuruchi sichila yali nabukuye Herodia omukhasi womusiani wabwe, ma khandi yali niyakhola akandi amenji amabi.

²⁰ Ma khandi Herode yameeta yili khu kandi kosi, yara Yohana mubuhambe.

Okhubaputiswa khwa Yesu

²¹ Olwa abandu bosi bali nibamal'le okhubaputiswa, Yesu naye nabaputiswa. Ne olwa yali nasaayanga likulu liekukha,

²² ne Omwoyo Omutsienukhu niyekha mukhufwana khwelikhulwi, nayela khuye; Omwoyo nikurula mwikulu nikuboola, “Ibe niwe Omwana wanje owa ndayanza, owasangal'langa okhusila.”

Abakuka nyene Yesu

²³ Olwa Yesu yachiaka emilimochie khumikanda yali nali ne mihika amakhumi kataru. Abandu bakanakananga no mwana wa Yosefu wa Eli.

²⁴ Eli yali omwana wa Matati, omwana wa Lawi, omwana wa Maliki, omwana wa Yanai, omwana wa Yosefu,

²⁵ omwana wa Matatsia, omwana wa Amosi, omwana wa Nahumu, omwana wa Esili, omwana wa Nagai,

²⁶ omwana wa Mati, omwana wa Matatsia, omwana wa Semeini, omwana wa Yoseki, omwana wa Yoda,

²⁷ omwana wa Yoanani, omwana wa Resa, omwana wa Serubabeli, omwana wa Shealitieli, omwana wa Neri,

²⁸ omwana wa Maliki, omwana wa Adi, omwana wa Kosamu, omwana wa Elimadama, omwana wa Eri,

²⁹ omwana wa Yoshwa, omwana wa Elieseri, omwana wa Yorimu, omwana wa Matati, omwana wa Lawi,

³⁰ omwana wa Simioni, omwana wa Yuda, omwana wa Yosefu, omwana wa Yonamu, omwana wa Eliakimu,

³¹ omwana wa Melea, omwana wa Mena, omwana wa Matatsa, omwana wa Natsani, Omwana wa Daudi,

³² omwana wa Yese, omwana wa Obedi, omwana wa Boasi, omwana wa Salumoni, omwana wa Nahashoni,

³³ omwana wa Aminadabu, omwana wa Adimini, omwana wa Haruni, omwana wa Hesironi, omwana wa Feresu, omwana wa Yuda,

³⁴ omwana wa Yakobo, omwana wa Isaka, omwana wa Aburahamu, omwana wa Tera, omwana wa Nahori,

³⁵ omwana wa Serugu, omwana wa Ragau, omwana wa Pelegu, omwana wa Eberi, omwana wa Shela,

³⁶ omwana wa Kainani, omwana wa Arafakasadi, omwana wa Shemu, omwana wa Noa, omwana wa Lameki,

³⁷ omwana wa Metsusela, omwana wa Enoka, omwana wa Yaredi, omwana wa Mahalaleli, omwana wa Kainani,

³⁸ omwana wa Enoshi, omwana wa Setsi, omwana wa Adamu, Omwana wa Nyasaye.