LUKA 24 - EBAIBO INZIENUKHU

Okhusimukukha kwa Yesu

¹ Litukhu liomwihonga, nikusili mukamba m'mabwebwe, abakhasi yabo bahuna hasilindwa, nibahila amafura akabali nibalombele.

² Nibanyoola lichina likongomibwe okhurula khusilindwa.

³ Olwa benjila musilindwa sibalola om'bili kwo Mwami Yesu tawe.

⁴ Olwa bali nibasing'ang'ala khulwa akene yako, abandu babili, abali nibebikhile tsingubo etsinyinanyinanga okhusila nibasinjila ahembi n'nabo.

⁵ Oburi bwahamba abakhasi yabo, nibenamia obweni bwabwe hasi. Abandu yabo nibababool'la, “Busina murunanga oli mwoyo mubafu?

⁶ Siali hano tawe; usimukukhile. Mwitsul'le obwa yamubool'la olwa yali n'nenywe Galilaya:

⁷ ‘Omwana wo Mundu okhwola arebwe mumakhono kabetsimbi, nabo bakhamubambe, ne litukhu liakhataru yakhasimukukhe.’ ”

⁸ Ma abakhasi yabo nibetsul'la amang'ana kaake,

⁹ nibarula hasilindwa, nibabool'la abarumwa likhumi namulala amang'ana yako kosi.

¹⁰ Nabo abahaana amang'ana yako bali Mariamu Magadalena, Joani nende Mariamu nyina Yakobo, halala nende abakhasi bandi abali halala n'nabo.

¹¹ Abarumwa babukula amang'ana yako singa tsisambo butswa, sibasubila tawe. [

¹² Nebutswa Petero yasinjila, niyelukha tsimbilo natsia hasilindwa; yenama nahenjel'la mwo ne yalola butswa tsingubo tsiekatani tsionyene. Nakalukha ingo nachenyanga khu kosi akali nikekhol'le.]

Oluchendo lwokhutsia Emau

¹³ Litukhu liene yilio, babili khubalondi ba Yesu bali nibatsitsanga mwitaala elilangwa Emau, oluchendo lwetsikilomita likhumi nende ndala okhurula Yerusalemu.

¹⁴ Bali nibatwakananga khwo khumang'ana akali nikekhol'le.

¹⁵ Olwa bali nibatwakananga ne nibareebana, Yesu omwene yesunda khubo nachenda n'nabo.

¹⁶ Bamulola netsimoni tsiabwe nebutswa sibamumanyilisia tawe.

¹⁷ Yesu nabareeba, “Nimang'ana sina aka mubool'lananga nimuchenda yaka?” Nibasinjila ne, obweni bwabwe nibufwilil'la khulwesibeela.

¹⁸ Mulala khubo, owalangwa Kiliopa namukalusia, “Ibe oli omucheni mu Yerusalemu oramanyile akekhol'le yo amatukhu kano?”

¹⁹ Naye nabareeba, “Mang'ana sina?” Nabo nibamubool'la “Amang'ana akakwiliye Yesu Omunasareti. Yali omuroobi wobunyali mumilimo nende mukhwibaala imbeli wa Nyasaye nende imbeli wabandu bosi.

²⁰ Abesaalisi abakhongo nende abaruchi befwe bamuhana akhalachilwe okhufwa, ma nibamubamba.

²¹ Ne ifwe khwali nikhunayanga mbu niye owakhanunuye Abaisiraeli. Ne okhuyomba kosi, leelo nelitukhu liakhataru okhurula akene yaka nikekhola.

²² Khandi abakhasi bandi abowefwe bakhuchenyisie. Batsiiye khusilindwa m'mabwebwe,

²³ ne sibanyooye om'bili kukwe tawe. Nibakalukha nibaboola mbu balutsi abamalaika, ne nibababool'la ali mwoyo.

²⁴ Ne abandi khubakhubetsanga n'nabo batsiye hasilindwa nibakobokhela akabakhasi yabo babooye; nebutswa ye sibamulutsi tawe.”

²⁵ Yesu nababool'la, “Busina muli abahingwa mbwo, ne khandi abenyoholi bemioyo okhusubila kosi akabaroobi baboola!

²⁶ Sikakwan'ne Masihi okhusalila, ma kho yenjile mubukhongo bubwe?”

²⁷ Ma nabenoosia amang'ana kosi khuye akali mu Mahandiko Amatsienukhu okhurula khubitapu bia Musa okhwola khumahandiko kabaroobi bosi.

²⁸ Olwa bali ahembi okhwola mwitaala elia bali nibatsitsangamwo, Yesu yakhola singa ositsilil'la noluchendo.

²⁹ Nebutswa nabo nibamuhomba nibaboola, “Yikhala n'nefwe, sichila bwil'le, isi ibir're.” Ma niyenjila mwitaala, niyekhala n'nabo.

³⁰ Olwa yekhala n'nabo khubiokhulia, yabukula omukaati, nakulamila tsikhabi, namekania ma nabahelesia.

³¹ Tsimoni tsiabwe tsiamala nitsikukha, nibamumanyilisia, nebutswa naye nakhama khubo.

³² Nibabool'lana, “Emioyo chiefwe sichifwan'nenje singa echiatukhanga olwal'lomele n'nefwe khunjila nakhuribul'la Amahandiko?”

³³ Nibarula esaa yene yiyo, nibakalukha Yerusalemu, nibanyoola abechi likhumi nende mulala nibali halala nende abandu bandi,

³⁴ nibaboola, “Tooto Omwami usimukukhile. Alolekheye Simoni.”

³⁵ Abalondi babili yabo bamala nibababool'la akali nikekhol'le khunjila nende singa bamumanyilisia olwa yamekania omukaati.

Yesu yalolekha khubechi baabe

³⁶ Olwa bali nibababool'langa amang'ana yako, Yesu mwene nasinjila hakari wabwe, nababool'la, “Emilembe chibe n'nenywe.”

³⁷ Nibekosa ma nibaria okhusila, nibapaala baluutsi esinasukhila.

³⁸ Nebutswa naye nababool'la, “Busina mung'ang'al'le, khandi busina muli nende honzoni mumioyo chienywe?

³⁹ Lole amakhono kanje nende ebilenje bianje, nise omwene. Mbabasie mulole, sichila esinasukhila sisili nende om'bili nende amakumba singa mulolanga ise nindi n'nabio tawe.” [

⁴⁰ Namal'le okhuboola yako ne nabamanyia amakhonoke nende ebilenjebie.]

⁴¹ Olwa bali nibasili okhuhuchil'la khulwobusangali, ne nibasichenya, yabareba, “Muli khwo nende esiokhulia hano?”

⁴² Nibamuhelesia esitonye sieisuche isianikhe.

⁴³ Nasibukula, nalia bosi nibalola.

⁴⁴ Ma nababool'la, “Yaka niko aka ndamubool'la olwa ndali nisili n'nenywe, mbu khatimba kahesibwe kosi akahandikwa khwise mumalako ka Musa nende mubitapu biabaroobi ma nende musitapu sia Saburi.”

⁴⁵ Ma niyekula tsinganakani tsiabwe okhumanyilisia Amahandiko Amatsienukhu.

⁴⁶ Nababool'la, “Nimbwo kahandikwa mbu Masihi okhwola asaal'le ne khwitukhu liakhataru yakhasimukukhe okhurula mubafu,

⁴⁷ khandi nakobuha mbu muliira lilie obweyami nende obulekhelwi bwetsimbi okhwola bukambwe khutsimbia tsiosi, okhuchiachila Yerusalemu.

⁴⁸ Inywe muli abakobokheli ba mang'ana yako.

⁴⁹ Nase mwene ndakhamuler're uyo owa Papa yamulaka. Nebutswa okhwola mulindil'le mwitookho okhwola olwobunyali okhurula mwikulu bwitsa khwinywe.”

Yesu yapulukha okhutsia mwikulu

⁵⁰ Ma nabemel'la okhurula mwitaala okhwola Betsania, nachinga amakhonoke ikulu, nabalaamila tsikhabi.

⁵¹ Olwa yali nabalaamilanga tsikhabi, yarula khubo, nabukulwa ikulu mwikulu.

⁵² Nabo nibamwekayakaya, nibakalukha Yerusalemu nibali nobusangali obukali;

⁵³ nibamenya mu Hekalu tsinyinga tsiosi nibetsoominjia Nyasaye.