LUKA 23 - EBAIBO INZIENUKHU

Yesu yahilwa imbeli wa Pilato

¹ Omukanda kwosi kwasinjila, nikuhila Yesu imbeli wa Pilato.

² Nibachiaka okhumuyaala nibamuchiikha nibaboola, “Khwanyoola omundu uyu naberulanga abandu befwe, nabakayanga okhuhana obusuru khumuruchi wa Baroma ne niyelanga mbu niye Masihi, Omwami.”

³ Pilato nareeba Yesu, “Kho oli Omwami Wa Bayahudi?” Yesu namukalusia, “Ibe ubooye.”

⁴ Pilato nabool'la abesaalisi abakhongo nende omukanda kwabandu, “Sindolakhwo liibi liosi khumundu uyu tawe.”

⁵ Nebutswa nabo nibatinyilisia nibaboola, “Akholanga inzoka mubandu, niyebaala mu Buyahudi mwosi; yachiakila Galilaya ma lunondi ali hano.”

Yesu yahilwa khu Herode

⁶ Pilato olwa yahul'la yako, nareeba, “Omundu uyu Nomugalilaya?”

⁷ Olwa yamanya mbu Yesu yali hasi woburuchi bwa Herode, yamuruma khu Herode, niye owali nali Yerusalemu mumatukhu yako.

⁸ Herode yasangala okhusila olwa yalola Yesu. Yali niyamala okhuhul'la amang'ana kaake, ne yali niyekombanga okhumulola moni na moni. Yakanakananga mbu Yesu alakhola khwo esilolelo siamangalimwa.

⁹ Ma Herode nareeba Yesu amarebo amenji nebutswa Yesu siyamukalusia khwo ling'ana tawe.

¹⁰ Abesaalisi abakhongo nende abebaali ba Malako nibasinjila, nibamusinjil'la netsingufu okhusila.

¹¹ Herode halala nabasikari baabe nibakhol'la Yesu inzekhelesi, nibamuchiaya, ma nibamubiikha tsingubo tsioburuchi, nibamukalusia owa Pilato.

¹² Herode nende Pilato, abali nibarambana, nebutswa bamala nibahambana nibaba abalina.

Yesu yakhalachilwa okhufwa

¹³ Ne Pilato yalanga omukhung'ano kwabesaalisi abakhongo nende abaruchi,

¹⁴ nababool'la, “Muler're omundu uyu khwise nimuboolanga mbu yabeye naberulanga abandu. Luno hulile! Inyuma wokhuhengelesia ling'ana yili imbeli wenywe, sindutsi khwo libi liosi khuye mukosi aka mubooye tawe.

¹⁵ Khandi sindi sienyene tawe, kata Herode sianyoye khwo libi liosi muye tawe sichila umukalusisie khwise. Kali kololi mbu omundu uyu siyakholakhwo esindu siosi esichila yerwe tawe.

¹⁶ Kho ndakhalaka mbu atiabwe eb'boko ma mubohol'le.” [

¹⁷ Buli mwisabo lia Pasaka, Pilato yali niyanala okhubohol'la omubohe mulala.]

¹⁸ Nebutswa abomukanda bosi bayoka butinyu nibaboola, “Wire uyo, ne okhuboholol'le Barabba!”

¹⁹ Barabba yali niyabohwa khulwe inzoka nende obwiri.

²⁰ Pilato yenya okhubohol'la Yesu, ma nal'loma n'nabo khandi;

²¹ nebutswa nabo nibayoka butinyu nibaboola, “Mubambe, mubambe.”

²² Pilato nababool'la olwakhataru, “Akhol'le likoso sina? Sindola khwo likoso khuye eliakhachila yerwe tawe; khulwe yako ndamutiaba eb'boko ma mubohol'le.”

²³ Nebutswa nabo bahanzukha nemioyo emikali mbu okhwola Yesu abambwe. Olweinyuma okhuhanzukha khwabwe khwamala nikhuleka.

²⁴ Ma Pilato nakhalaka mbu kabe singa benyele.

²⁵ Nabohol'la owabali nibenyele, owali okhubohwa khulwe inzoka nende obwiri; nahana Yesu khubo, bamukhol'le obwa bene benyele.

Yesu ubambilwe

²⁶ Olwa abasikari bali nibamuhilanga, bakaana nende omundu mulala, owalangwa Simoni Omukurene, owali narula musibala siehale niyetsanga mwitookho. Bamufumila nibamutukha omusalapa achinge inyuma wa Yesu.

²⁷ Omukanda omukali kwamulonda; nikulimwo abakhasi abali nibekhuulanga nibakhupa etsikhwisi.

²⁸ Yesu yasukhana nababool'la, “Abakhasi ba Yerusalemu, murandakayila ise tawe, nebutswa mwelekayile abene nende abaana benywe.

²⁹ Okhuba amatukhu ketsanga olwabandu bakhaboole; ‘Nabeikhabi abakumba abarayibulakhwo abaana, ma abaranunia khwo abaana!’

³⁰ Olwene yilwo nilwo olwabandu bakhabool'le ebikulu, ‘Khukwile,’ ne tsinjengulukho ‘Khubise.’

³¹ Okhuba nikakhaba abandu bakhakhola akene yako khumusaala om'bisi, bakhakhola mbwena khumusaala omwomu?”

³² Abandu bandi babili abali abakholi bobubi khandi nabo bahilwa halala nende Yesu okhwirwa.

³³ Olwa boola habundu ahalangwanga, “Hasihanga,” nibabambilaho Yesu halala nende abebi babili yabo, mulala khumukhonokwe omusaatsa ne oundi khumukhonokwe omukhasi.

³⁴ Yesu naboola, “Papa, obalekhele, sichila sibamanyile eliabakholanga tawe.” Ma nibakabana tsingubotsie khulwa okhutsikhupila imbulu.

³⁵ Abandu bali nibasinjiyeho nibahenganga. Abakhongo bamukokonyela nibaboola, “Yahonia abandi; yehonie khwo omwene naba nali Kristo wa Nyasaye, omwelwa wa Nyasaye!”

³⁶ Abasikari bamukhol'la inzekhelesi, batsia khuye nibamuhelesia ewaini

³⁷ nibaboola, “Noba noli Omwami wa Bayahudi tooto, wehonie omwene.”

³⁸ Khandi olwanzilo lwahandikwa ikulu uwe niluli khwo amang'ana kano “Uyu niye Omwami wa Bayahudi.”

³⁹ Mulala khubakholi bobubi ababambwa khumusalapa, yanyeka Yesu, naboola, “Sioli niwe Kristo? Okhehonie omwene, ma okhuhoniekhwo nefwe khandi.”

⁴⁰ Nebutswa owali omukholi wobubi undi nakondokhela owasie naboola, “Ibe sioritsanga khwo Nyasaye tawe? Ibe okhalachiywe amafwanani n'naye?

⁴¹ Ibe n'nase khukhalachiywe kololi, sichila khutooye omurungo okhuhelana nende okhukhola khwefwe, nebutswa uyu siyakholakhwo ling'ana liosi libi tawe.”

⁴² Ma naboola, “Yesu, unzitsul'le nyinga otsia mu Bwami bubwo.”

⁴³ Yesu namukalusia, “Khubool'langa tooto mbu, leelo witsa okhuba n'nase mu Paradiso.”

Okhufwa khwa Yesu

⁴⁴ Tsiali singa etsisaa tsisasaba etsia m'basu olwe eliuba lialekha okhwakha, esiilima nisiba khusibala siosi okhwola etsisaa tsirano natsine,

⁴⁵ ne ingubo eyasinganga mu Hekalu yarandukha hakari.

⁴⁶ Yesu nahanzukha nomwoyo omukali, naboola, “Papa, retsanga omwoyo kwanje mumakhono kaako.” Olwa yamala okhuboola akene yaka, omwoyokwe kwarula.

⁴⁷ Yaho olwe etswoni yalola akali okhwekhola, yetsoomia Nyasaye naboola, “Siahene omundu uyu yali omulunji.”

⁴⁸ Abandu bosi abali nibebunjikhileho khulwa okhulola akene yako, olwa balola akali okhwekhola, bakalukha mungo mwabwe nibetil'le khutsiseya tsiabwe khulwesibeela.

⁴⁹ Abandu bosi abali nibamanyana nende Yesu, halala nende abakhasi abalondananga n'naye okhurula Galilaya basinjila ehale nibahengelayo akene yako.

Okhuyabilwa khwa Yesu

⁵⁰ Yaliho omundu mulala owalangwa Yosefu okhurula Arimatsia litaala lia Bayahudi. Omukhulundu omulahi, omulunji.

⁵¹ Siyahuchil'la okhukhalaka omuse kwabwe nende okhukhola khwabwe tawe. Yali nalindil'langa okhwitsa khwo Bwami bwa Nyasaye.

⁵² Kho yatsia khu Pilato nareeba ahebwe om'bili kwa Yesu.

⁵³ Ma niyakula om'bili yikwo okhurula khumusalapa, nakuboha mungubo yekatani, nakura musilindwa esiali nisiayabwa mwichina, esiali nisisili okhurebwa mwo omundu.

⁵⁴ Liali litukhu liomuchirano, ne esabato yali neli ahembi okhuchiaka.

⁵⁵ Abakhasi abali nibalon'de Yesu okhurula Galilaya balonda Yosefu, nibalola esilindwa nende obwom'bili kwa Yesu kwarebwa mwo.

⁵⁶ Ma nibakalukha ingo wabwe nibalomba obusakasaki nende amafura akahunya esuswa betse okhubakha om'bili kukwe. Mwitukhu lie sabato bahulukha singa lilako lili.