LUKA 20 - EBAIBO INZIENUKHU

Lireebo khukobunyali bwa Yesu

¹ Litukhu elala, olwa Yesu yali niyebaal'langa abandu mu Hekalu ne nabakambila Amang'ana Amalahi, abesaalisi abakhongo nende abebaali ba Malako halala nende abakhulundu batsia

² nibamubool'la, “Khubool'le, okholanga yaka mubunyali sina?”

³ Yesu nababool'la, “Nase ndamureeba lireebo:

⁴ Obunyali bwa Yohana khubaputisa bwarula khu Nyasaye nohomba khubandu?”

⁵ Nibachiaka okhuhingana abene khubene, nibaboola, “Nikhuboola bwarula khu Nyasaye yetsa okhukhureeba ‘Busina nimurasubila Yohana?’

⁶ Ne nikhuboola ‘Bwarula khubandu’ ne abandu bali hano yaba bosi betsa okhukhulasa namachina, sichila bosi basubilanga mbu Yohana yali omuroobi.”

⁷ Kho bamala nibamubool'la, “Sikhumanyile obunyali yibwo bwarula hena tawe.”

⁸ Yesu nababool'la, “Nase simubool'la kholanga yaka nabunyali sina tawe.”

Olukano lwabalimi bomukunda kwemisabibu

⁹ Yesu natsilil'la okhubool'la abandu olukano yilu: “Omundu nalebe yasimikha omukunda kwemisabibu, ma nakulekhela abalimi ne narula natsia musibala sie hale namenya yo oluhono.

¹⁰ Mumatukhu kelichesa, yaruma omurumikhiliwe khubalimi yabo bamuhekhwo ebiamo biomukunda kwemisabibu. Nebutswa abalimi yabo bakhupaka omurumikhili uyo nibamukhunga amakhono makhaya.

¹¹ Omundu uyo naruma omurumikhili undi; abalimi yabo khandi nibamukhupaka, nibamukhol'la obubi ma nibamukhungania amakhono makhaya.

¹² Ma naruma omurumikhili wakhataru, abalimi nibamukhupa tsinguma, nibamufuuba esioba amakhono makhaya.

¹³ Ma omwene omukunda kwe misabibu napaala, ‘Nakhole mbwena? Ndaruma omwana wanje owandayanza, haundi bakhamuria.’

¹⁴ Nebutswa olwabalimi yabo bamulola nibabool'lana ‘Uyu niye owakhalamilwe emiandu. Chende khumwire kho obulaamebwe bube obwefwe.’

¹⁵ Nibamuhinia esioba womukunda kwemisabibu, ma nibamwira.” Yesu nabareeba, “Omwene mukunda yakhabakhol'le mbwena abalimi yabo?

¹⁶ Aliitsa okhubamulula abalimi yabo, ma alahelesie abalimi bandi omukunda kwemisabibu yikwo.” Olwabandu bahul'la amang'ana yako bafukula, nibaboola: “Karabba mbwo tawe.”

¹⁷ Nebutswa Yesu yabahenga ma nabareeba, “Akahandikwa yaka kho kali nasifune sina? ‘Lichina eliabombokhi basuula, Eliene yilio likwiye eliobukhonyi obukali khunyumba!’

¹⁸ Omundu wosi niyakhakwa khwichina yilio yakhafunikha mubitonye; ne nililikwila omundu liakhamutubule singa olukukhi.”

Okhurunga obusuru khumuruchi wa Baroma

¹⁹ Abebaali ba Malako nende abesaalisi abakhongo benya okhumutiila habwene nahabwene sichila bamanya mbu olukano yilu yakhupanga khubo, nebutswa baria abandu.

²⁰ Ma nibachiaka okhuruna obweyangu obulahi. Nibahetsa abandu okhwekhola okhuba abalahi, nibabaruma okhutsia okhurechekha Yesu namarebo khe bamutile bamure mumakhono khandi mubunyali bwomukafuna we Buroma.

²¹ Abarunilisi bamang'ana yabo nibamubool'la, “Khwamanya mbu sioritsanga omundu wosi kata siohenganga khubukhongo bwomundu tawe, nebutswa wibaalanga injila ya Nyasaye habwene.

²² Khubool'le, nomusilo okhurunga obusuru khumuruchi wa Baroma nohomba tawe?”

²³ Yesu yamanya okhuteema khwabwe, nababool'la,

²⁴ “Mumanyie efetsa ndole. Eli nende likondo nende olwanzilo lwa wina?” Nibamukalusia, “Nebiomuruchi wa Baroma.”

²⁵ Yesu nababool'la, “Kho muhelesie Omuruchi wa Baroma ebili ebiomuruchi, ne muhe Nyasaye ebili ebia Nyasaye.”

²⁶ Bakhumbulwa okhufumila ling'ana liosi imbeli wabandu nibachenya masiling'ana khumakalusio kaake.

Lireebo khukokhusimukukha khwabafu

²⁷ Abasadukayi ababoolanga mbu abafu sibanyala okhusimukukha betsa khu Yesu, nibaboola;

²⁸ “Omwibaali; Musa yakhuhandichila mbu omwana wanga omundu nalebe nafwa ne nalekha omukhasiwe narali no mwana, omwana wabwe akalusie omukhasi omulekhwa uyo, yebul'le omwana wabwe abaana.

²⁹ Khale baliho abasiani bomundu mulala bane nabataru. Owokhuranga yateesia omukhasi, ma nafwa nasili okhunyoolakhwo omwana.

³⁰ Omusiani wabwe wakhabili nakalusia omukhasi uyo, naye khandi nafwa,

³¹ ne owakhataru khandi naye mbwo. Nikatsilil'la mbwo okhwola bosi bane nabataru nibafwa sila okhulekhakhwo omwana.

³² Olweinyuma omukhasi uyo khandi naye nafwa.

³³ Litukhu liokhusimukukha khwabafu, omukhasi uyo yakhabe owa wina? Bosi bane nabataru bamutesia khwo.”

³⁴ Yesu nababool'la, “Abandu bamatukhu kano batesianga nibatesibwa;

³⁵ nebutswa yabo aba Nyasaye yakhanyal'le okhwola khukhusimukukha sibakhatesie nohomba okhutesibwa tawe.

³⁶ Bakhabe singa abamalaika, ne sibakhafwe khandi tawe. Nabaana ba Nyasaye sichila basimukukha okhurula mubafu.

³⁷ Nebutswa akokhusimukukha khwabafu kata Musa yamanyia habulafu musitonye sia Mahandiko Amatsienukhu aha kahandikwa khusitsakha esiali nisiakhanga omul'lo, amuralanga singa Nyasaye wa Aburahamu, Isaka nende Yakobo.

³⁸ Kho siali Nyasaye wabafu tawe, nikarali ni Nyasaye we yabo abali mwoyo; okhuba khuye bosi bali mwoyo.”

³⁹ Abalala khubebaali ba Malako, nibaboola, “Omwibaali, ukalusisie obulahi okhusila.”

⁴⁰ Sichila sibali neikholo yokhumureeba amarebo kandi tawe.

Lireebo khu Masihi

⁴¹ Yesu nabareeba, “Busina kaboolekhanga Masihi ne es'soni sia Daudi?

⁴² Okhuba Daudi mwene aboolanga mu Saburi, ‘Omwami yabool'la Omwami wanje yikhala khumukhono kwanje omusaatsa.

⁴³ Okhwola olwandikhola abasukubo balabe singa indebe yokhulambisia khwo ebilenjebio.’

⁴⁴ Daudi amulanganga ‘Omwami’; kho yakhaba mbwena khandi es'soni sie?”

Yesu yachetsiyia abandu khukabebaali ba Malako

⁴⁵ Yesu yabool'la abechi baabe imbeli wabandu bosi,

⁴⁶ “Mwelinde khubebaali ba Malako abayanza okhuchendachenda nibebiikhile etsikanzo. Bayanza okhusiesibwa noluyali nabandu mubiiro, bekhalanga khutsindebe etsioluyali mutsisinakoki, nibabukula obwikhalo bweimbeli mumasabo.

⁴⁷ Beyinjisianga mutsinyumba tsiabakhasi abalekhwa nibabanuula emiandu chiabwe, ne nibekhola okhuba abalahi mukhusaaya khwabwe okhurambi. Litukhu liokhukhalachilwa esiina bakhanyoole esinyasio esikali okhusila!”