LUKA 19 - EBAIBO INZIENUKHU

Yesu nende Sakayo

¹ Yesu yenjila mwitaala lia Yeriko, ne olwa yali nabiranga khunjila mwitaala yimwo,

² omundu mulala yarul'la mwo owalangwa Sakayo. Omundu uyo yali omukhongo wabasololi bobusuru ma khandi yali omuhinda okhusila.

³ Yenya okhulola Yesu niwina, nebutswa siyali onyala okhumulola tawe sichila omukanda kwali omwinji khandi yali omwimbichiti.

⁴ Kho yamala niyelukha natsia imbeli, naniina khumukhuyu kho abe onyala okhulola Yesu, sichila yali nabir'ranga habwene yaho.

⁵ Olwa Yesu yoola habwene yaho, yahenga ikulu namubool'la, “Sakayo yikha bwangu, okhuba leelo nzia okhuhonga hango haho.”

⁶ Sakayo niyekha bwangu, namwinjisia nobusangali.

⁷ Abandu bosi olwa balola mbwo nibachiaka okhumumuchil'la nibaboola, “Utsiye okhubutsa homundu wetsimbi.”

⁸ Nebutswa Sakayo yasinjila nabool'la Yesu, “Hulila Omwami, nambelesie abatakha enusu yemiandu chianje. Nikali ndali okhunuula khwo esindu siomundu wosi, namukaluchisie esia khane.”

⁹ Yesu namubool'la “Leelo obuhoni bwol'le munyumba yiyi, sichila uyu naye khandi nowolubela lwa Aburahamu.

¹⁰ Okhuba Omwana wo Mundu yetsa okhuruna nende okhuhonia esiakora.”

Olukano lwefetsa

¹¹ Olwabandu bali nibasihuyia yako, Yesu yababool'la olukano. Yaho yali nali ahembi okhwola Yerusalemu, ne abandu yabo bapaalanga mbu Obwami bwa Nyasaye bwali nibuli ahembi okhwola.

¹² Kho yababool'la, “Yaliho omundu mulala omukhongo owalomba oluchendo okhutsia musibala siehale okhuhebwa obwami ma akalukhe.

¹³ Nasili okhurula yalanga abarumikhili baabe likhumi, nabahelesia simulala etsipaundi tsitaru nababool'la, ‘Mukhol'le obukhala okhwola olwa ndikalukha.’

¹⁴ Nebutswa abomusibala sisie bali nibamusuula ma nibaruma abarumwa batsie baboole; ‘Sikhwenya omundu uyu akhuruke tawe.’

¹⁵ “Omundu uyo yamala nakholwa omuruchi ma nakalukha, ne nalaka mbu abatiyi abayahelesia amapesa balangwe kho amanye simulala khubo yanyoola obukhala buhela mbwena.

¹⁶ Omurumikhili wokhuranga yetsa khuye naboola; ‘Omwami, amapesako kaleera etsipaundi etsindi likhumi.’

¹⁷ Naye namubool'la, ‘Nobulahi, omurumikhili omulahi. Khulwa mbu wali omusubilwa khu matititi, nobe omuruchi khumataala likhumi.’

¹⁸ Omurumikhili wakhabili niyetsa, naboola, ‘Omwami amapesako kaleera etsipaundi tsindi tsirano.’

¹⁹ Naye namubool'la, ‘Nawe nobe omuruchi khumataala karano.’

²⁰ “Omurumikhili undi niyetsa naboola, ‘Omwami, amapesa kaako ngakano. Ndakabiikha bulahi musitambaya.

²¹ Ndali okhukhuria ibe okhuba oli omululu. Ibe obukulanga ebirali ebibio khandi ochesanga ahoraraaka.’

²² Naye namubool'la, ‘Khukhalachiye okhurulana khumang'ana kaako kene, ibe omurumikhili omubi. Wamanya ise ndi omundu omululu, mbukulanga ebirali ebianje, khandi njesanga aharaaraka.

²³ Busina orabiikha efetsa yanje mwibiikhilo elebulana, ma ndanyoola nende injelesio yayo olwa njeleye.’

²⁴ Ma nabool'la abali nibaliho ‘Munuule amapesa yako muhelesie onyooye etsipaundi likhumi.’

²⁵ Nebutswa nabo nibamubool'la, ‘Omwami uyo ali netsipaundi likhumi!’

²⁶ Naye nabakalusia ‘Wosi oli nesindu yakhamet'twe. Nebutswa obulakhwo esindu, kata situ esiali n'nasio siakhabukulwe.

²⁷ Ne luno abasuku banje yabo abarayanzanga mbe omuruchi wabwe, mubalere hano muber're imbeli wanje.’ ”

Yesu yenjila Yerusalemu nomwekhoyo

²⁸ Yesu yaboola yako ma niyemela okhutsia Yerusalemu imbeli wabwe.

²⁹ Olwa yali nali ahembi okhwola Betsifage nende Betsania, ahembi nende esikulu sia Miseituni, yaruma abechi baabe babili,

³⁰ nababool'la, “Tsie mwitaala elili imbeli wenywe. Olwa namube nimwinjilangamwo, namunyoole esimoosi siesikhili nisibohelwe, esiomundu asili okhuniina khwo tawe. Musibohol'le, musileere hano.

³¹ Omundu naba namureeba esichilanga nimusibohol'la, mumubool'le, Omwami asirunanga.”

³² Nibatsia, nibanyoola ebindu biosi nibili singa Yesu yali nababooleye.

³³ Olwa bali nibabohol'langa esimoosi siesikhili yisio, abene sio nibabareba, “Busina mubohol'langa esimoosi yisi?”

³⁴ Nabo nibakalusia, “Omwami asirunanga.”

³⁵ Ma nibahila esimoosi siesikhili yisio khu Yesu. Nibaala tsingubo tsiabwe khusimoosi yisio, ma nibaniinia khwo Yesu.

³⁶ Yesu natsilil'la noluchendolwe naniin'ne khusimosi siesikhili; ne abandu nibaala tsingubo tsiabwe khunjila.

³⁷ Olwa yoola ahembi nende Yerusalemu, khusikongomo siesikulu sia Miseituni, omukanda omukali okwabechi baabe nibachiaka okhusangala nende okhwitsomia Nyasaye nemioyo emikali khulwebindu ebikhongo ebia bali nibaluutsi;

³⁸ nibaboola, “Nyasaye alamile omuruchi owitsanga muliira lio Mwami ikhabi. Omulembe kube mwikulu ne oluyali khu Nyasaye!”

³⁹ Abafarisayi abali mumukanda yikwo nibabool'la Yesu, “Omwibaali, laka abechi baabo babune.”

⁴⁰ Yesu nabakalusia, “Mubool'langa, nibabuna ne amachina kene nako kakhachiaka okhuhanzukha.”

Yesu yalakaya khulwa Yerusalemu

⁴¹ Olwa yoola ahembi Yerusalemu ma nalola litaala, Yesu yalilakayila,

⁴² naboola, “Olaba nomanyile litukhu lino akakwan'ne emilembe chichio! Nebutswa luno kebisile mutsimoni tsitsio.

⁴³ Okhuba amatukhu ketsanga olwa basuku baabo bakhakhubotokhanie nende lisisi, bakhakhwikal'le nende okhukhwinjil'la mutsimbeka tsiosi.

⁴⁴ Bakhakhumulule ibe nende bosi abali mwibe; sibakhalekhekhwo kata lichina elala khulindi tawe, sichila siwamanyilisia inyinga eya Nyasaye yetsa okhukhuhonia tawe!”

Yesu yenjila mu Hekalu

⁴⁵ Ma Yesu niyenjila mu Hekalu nachiaka okhukhunga abakholi bobukhala.

⁴⁶ Nababool'la, “Kahandikwa, ‘Ehekalu yanje elaba inyumba yokhusaaya’; nebutswa inywe muchikhol'le oluhangaywa lwabanuli.”

⁴⁷ Sielitukhu Yesu yebaalanga mu Hekalu. Abesaalisi abakhongo, abebaali ba Malako nende abemeli babandu baruna okhumwira,

⁴⁸ nebutswa sibalola eliokhukhola tawe, sichila abandu bosi bali nibamuhuyianga mubweyinikhu okhusila.