LUKA 15 - EBAIBO INZIENUKHU

Olukano lwelikondi eliakora

¹ Litukhu elala basololi abobusuru nende aboni abenji batsia okhuhul'la Yesu nal'lomanga.

² Abafarisayi nende abebaali ba Malako nibachiaka okhumumuchil'la, nibaboola, “Omundu uyu abukulanga aboni nalia n'nabo.”

³ Yesu nababool'la olukano luno:

⁴ “Omundu khwinywe niyakhaba nende amakondi emia ndala ma akosiekhwo elala, yakhakhola sina? Alekhanga akasikaye amakhumi karano nakane nende karano nakane musitsiimi ma atsia okhuruna elikor're okhwola olwa alinyoola.

⁵ Nalinyooye aliretsanga khumabeka nobusangali.

⁶ Olwa yoolanga hango, ne alanga abalina baabe ma ababool'la, ‘Sangale n'nase sichila nyooye likondi lianje eliali nilikor're.’

⁷ Khandi mbwo mubool'langa, obusangali obwinji bwakhabe mwikulu khulwa owetsimbi mulala orul'le mutsimbi, okhuyomba khulwa abandu abalunji amakhumi karano nakane nende barano nabane nibabula okhurula mutsimbi.

Olukano olwesilingi eyakora

⁸ “Nohomba omukhasi nalebe niyakhaba nende etsisilingi likhumi ma akosiekhwo ndala, akholanga sina? Ahambianga etaya ma yeya munyumba nahengelesia okhwola achinyoole.

⁹ Niyakhachinyoola, alanganga abalina nende abamenyani baabe ma ababool'le, ‘Sangale n'nase sichila nyooye esilingi yanje eyali nekor're.’

¹⁰ Khandi mbwo, mubool'langa, nimbwo obusangali bwakhabe ho khubamalaika ba Nyasaye khulwa owetsimbi mulala orul'le mutsimbi.”

Olukano lwomusiani owakora

¹¹ Yesu natsilil'la okhuboola, “Yaliho omundu nalebe owali nende abasiani babili.

¹² Omusiani mutu namubool'la, ‘Papa, mbelesia omukabwa kwanje okwemiandu lunondi.’ Ma samwana nabakabul'la emiandu chichie.

¹³ Inyuma wamatukhu matu omusiani mutu uyo nakusia emianduchie chiosi ma narula hango nende amapesa, natsia musibala esiehale nasasichisiayo emiandu chichie mubulamu bwetsimbi.

¹⁴ Olwa yamala ebindu biosi, inzala ikhongo yamala neba musibala yisio ma nachiaka okhutiima.

¹⁵ Nareeba emilimo khumundu nalebe musibala yisio. Ne omundu uyo namuhila mumukunda kwe alisinjie tsimbitsi.

¹⁶ Yekomba okhwikura mukhulia ebiokhulia bietsimbitsi tsiahebwa okhulia, nebutswa omundu wosi siyamuhakhwo esiokhulia tawe.

¹⁷ Ne olwa yalaba tsimoni, yaboola, ‘Abarumikhili ba papa wanje nabenji, ne bekuranga ebiliibwa ebinji ma bibarama, ne nase inzala niyinzir'ra hano!

¹⁸ Narule nanzie khu papa wanje ma namubool'le; Papa, ndayon'na Nyasaye khandi ndakhwon'na ibe,

¹⁹ Kata singwan'ne okhulangwa omwanawo khandi tawe. Ukhole singa mulala khubarumikhili baabo.’

²⁰ Ma nachiaka oluchendo lwokhukalukha khu samwana. “Olwa yali nasili ehale ne samwana namulola, ne namubelel'la, natsia tsimbilo khuye, namukwaka nende okhumutsunzuuna.

²¹ Omusiani uyo namubool'la, ‘Papa ndayon'na Nyasaye khandi ndakhwon'na ibe. Singwan'ne kata okhulangwa omwanawo tawe.’

²² Nebutswa samwana yabool'la abarumikhili baabe, ‘Tsie bwangu mulere tsingubo tsindahi mum'biikhe! Khandi mum'biikhe ingaka nende ebilaro.

²³ Mwire esimoosi esianera, khulie khusangale.

²⁴ Sichila omwana wanje uyu yali niyafwa ne luno ali mwoyo, yali niyakora ne luno unyolekhele.’ Nibachiaka okhusangal'la lisabo.

²⁵ “Ne olwene yilwo omusiani wabwe yali nasili mumukunda. Olwa yali nachelelanga nali ahembi okhwola hango, yahul'la amayoosi ketsinyembo nende okhusalama.

²⁶ Nalanga mulala khubarumikhili namureeba, ‘Nisina esikwiye?’

²⁷ Omurumwa uyo naye namubool'la, ‘Omusiani wenywe ukalukhile hango ma papawo umwiriye esimoosi esianera sichila umunyooye nasili mwoyo.’

²⁸ “Omusiani mukhulundu uyo yamala nasinyikha okhusila ma nasuula okhwinjila munyumba. Samwana narula esioba okhumuhomba yenjile.

²⁹ Nebutswa naye nabool'la samwana, ‘Lola, emihika yichi chiosi nikhurumikhilanga, sili okhufunaka khwo lilako lilio kata elala tawe, nebutswa osili okhumbakhwo kata esimeme sieimbusi sangale nende abalina banje!

³⁰ Nebutswa omwanawo uyu owalia emianduchio nende amasambale, olwa yetsele umwiriye esimoosi esianera.’

³¹ Samwana namukalusia, ‘Mwana wanje, ibe obetsanga n'nase khasotso, ne ebiandi n'nabio biosi nebibio.

³² Kaali akobuha mbu khukhole lisabo nende okhusangala sichila omwana wenywe uyu yali niyafwa, ne luno ali mwoyo; yali niyakora ne luno unyoolekhele.’ ”