LUKA 11 - EBAIBO INZIENUKHU

Yesu yebaala khukokhusaaya

¹ Litukhu elala Yesu yali nasaayanga habundu nalebe. Olwa yamala okhusaaya, mulala khubechi baabe namubool'la, “Omwami okhwibaal'le okhusaaya, singa obwa Yohana yebaal'la abechi baabe.”

² Yesu nababool'la, “Olwa musaaya, muboole mbu: ‘Papa: Eliiralio litsienukhu lifumibwe Obwami bubwo bwitse

³ Okhuhe ebiokhulia biefwe, biesielitukhu

⁴ Okhulekhele okhwona khwefwe sichila ifwe khulekhelanga bosi abakhwonelanga, Orakhuhila mukhutemwa tawe.’ ”

⁵ Ma Yesu nabool'la abechi baabe, “Nikakhaba mulala khwinywe ali nende omulinawe, ma atsie khuye mubutukhu hakari amubool'le, ‘Omulina wanje mambia khwo esibere umbe emikati chitaru,

⁶ sichila omulina wanje undi unzitsiye, ne ali khuluchendo, nase sindi khwo nende esiokhulia esianyala okhumuhelesia tawe.’

⁷ Ne nikakhaba omulinawo yakhakalusia nali munyumba aboole, ‘Oranyasia tawe. Mal'le okhwikala omuliango. Ise nende abaana banje khumal'le okhukona, sinyala okhubuukha khuhelesie tawe!’ Kakhaba mbwena?

⁸ Mubool'langa, kata narakhabuukha amuhelesie sichila no omulinawe, nebutswa yakhabuukha amuhe siosi esiarebele sichila ureleleye mukhureba.

⁹ “Khulwe yako mubool'langa; Musabe ne mulahebwa, murune ne mulanyoola, mukhong'onde ne mulekul'lwa.

¹⁰ Okhuba siomundu osabanga ahebwanga, orunanga anyoolanga, ne okhong'ondanga yekul'lwanga.

¹¹ Ali hena khwinywe abasamwana owomwana we yakhasaba isutse naye wamuha inzokha?

¹² Nohomba namusaba liyayi naye amuhelesie likatia?

¹³ Kho nikakhaba inywe abali ababi mwamanya obwo khuhaana ebindu ebilahi khubaana benywe, Papa wenywe womwikulu naye sialayombia okhuhaana Omwoyo Omutsienukhu khu yabo abamusabanga?”

Yesu nende Belisebuli

¹⁴ Litukhu elala Yesu yali nahinianga es'sieno esiasiluhala. Olwes'sieno yisio siarula muye ne omusilu uyo nachiaka okhul'loma, ma omukanda kwabandu nikuchenya.

¹⁵ Balala khubo baboola, “Ahinianga ebisieno khulwe tsingufu tsia Belisebuli, omukhongo webisieno.”

¹⁶ Ne abandi bamutema nibenya akhole akamangalimwa okhumanyia mbu ali nende obunyali oburula mwikulu.

¹⁷ Nebutswa sichila yali namanyile amapaalo kabwe, nababool'la, “Obwami bwosi obwabukhana mubituma ebikhupananga ebiene khu biene sibwakhamenya oluhono tawe; khandi kata inyumba eyabukhana khubwayo yakhatiba.

¹⁸ Kho nikakhaba obwami bwa Setani buli nemikanda echilwananga echiene khu chiene bwakhasinjila mbwena? Inywe muboolanga mbinianga ebisieno mubunyali bwa Belisebuli.

¹⁹ Nikakhaba nimbwo ise mbinianga ebisieno, kho abaana benywe nabo bahinichisianga ebisieno mubunyali bwa wina? Khulwe yako nibo abakhamukhalachile esiina abene.

²⁰ Nebutswa ise nimba nimbinianga ebisieno mubunyali bwa Nyasaye, khe mumanye mbu Obwami bwa Nyasaye bumal'le okhumwitsila.

²¹ “Olwomundu omukufu ali nebiesingo bie, nalindanga hango hahe, ebindu bibie biosi bili nomulembe.

²² Nebutswa omundu undi oli netsingufu okhumuyomba niyetsa okhumwinjil'la ma amuleche, anuulanga ebiesingo bia mwene hango yeletanga khwo ma akabulania ebiabetsanga nanul'le.

²³ “Wosi orali n'nase yafukulanga, ne wosi orakhonyanga okhubunjelesia, asalanianga.

Okhukalukha khwo omwoyo Kwesifwabwi

²⁴ “Olwo omwoyo kwesifwabwi kurulanga mumundu kubotokhananga khusibala esiomu nikuruna hakuhulukhila. Nikubula okhunyoola habundu ne kuboola, ‘Ndakalukha munyumba yanje eyandarula mwo.’

²⁵ Olwa kukalukhanga ne kunyoola inyumba niyeyelwe ma nekaasibwe obulahi.

²⁶ Ma kutsia okhulanga emioyo chindi echiesifwabwi chine nachitaru echili emibi okhukuyomba, ma chiosi chinjila mumundu uyo. Kho liiba liomundu uyo libetsanga libi okhusila okhuyomba olwokhuranga.”

Ikhabi ya tooto

²⁷ Olwa Yesu yali nasiboola amang'ana yako, omukhasi mulala mumukanda yikwo yahanzuukha naboola, “Noweikhabi omukhasi owakhwibula ma nakhununia.”

²⁸ Ne Yesu namukalusia, “Nabeikhabi okhusila yabo abahul'langa ling'ana lia Nyasaye, nibalifumila!”

Abakhongo ba Bayahudi benya esilolelo

²⁹ Olwo omukanda kwabandu kwatsilil'la okhwebunjikha khuye Yesu yababool'la, “Lisuba liamatukhu kano nelibi, lirunanga esilolelo, nebutswa siliakhahebwekhwo esilolelo siosi tawe nisirali esia Yona.

³⁰ Singa obwa Yona yali esilolelo khubandu ba Nineve, nimbwo Omwana wo Mundu yakhabe esilolelo khwisuba yili.

³¹ Khwitukhu liesiina, omwami omukhasi wa Sheba yakhasinjile okhukhalachila abandu abelisuba yili sichila yarula khundulo khwesibala niyetsa okhuhul'la obuchesi bwomuruchi Solomoni. Ne mubool'langa, omukhongo oyombele Solomoni ali hano.

³² Litukhu liesiina abandu ba Nineve bakhasinjile okhumukhalachila inywe esiina, okhuba abandu ba Nineve bekalukhania okhurula mutsimbi tsiabwe olwa Yona yabakambila. Nebutswa mubool'langa, omukhongo oyombele Yona ali hano.

Etaya yom'bili

³³ “Abulaho omundu ohambianga etaya ma achibisa nohomba afunikhila musipaala, nebutswa achiretsanga khusihani siayo, kho abenjilanga balole obulafu.

³⁴ Tsimoni tsitsio tsili singa etaya yomubili kwo. Nitsiba nitsili habwene nomubili kukwo kwitsulamwo obulafu; nebutswa nitsiba tsimbi ne omubili kukwo kwosi kulaba musiilima.

³⁵ Kho olole mbu obulafu buli mwiwe sibuli esiilima tawe.

³⁶ Om'bili kukwo kwosi nikuba nikuli nobulafu, ne esitonye siosi nisiralikhwo musiilima tawe, omubili yikwo nakube nobulafu mubwitsulu singa obwetaya ekhulabichisianga mukhwakha khwayo.”

Yesu yachetsiyia abandu khuka Abafarisayi nende Abebaali ba Malako

³⁷ Olwa Yesu yamala okhul'loma, Omufarisayi yamulanga atsie okhulia n'naye munyumba mwe. Natsia ma niyekhala n'naye khubiokhulia.

³⁸ Omufarisayi uyo yahuka okhul'la mbu Yesu aliitsanga naresaabile amakhono.

³⁹ Ma Omwami namubool'la, “Inywe Abafarisayi mwosianga es'sanda nende esahani ikulu, nebutswa mukari mwenywe mwaitsula mwo obunuli nende obubi.

⁴⁰ Abahingwa inywe, owalomba ikulu siali niye owalomba mukari khandi?

⁴¹ Nebutswa muhaane khubatakha ebia muli n'nabio mukari ne ebindi biosi nabibe ebisiyikhu khwinywe.

⁴² “Nebutswa mulitsiboolelwa inywe Abafarisayi, sichila muhaananga esielikhumi khumurele nende emiro nende tsifwa tsiosi, ne simuhendel'langa akatooto nende obuyanzi khu Nyasaye tawe. Ne yaka kenyekhanga mukakhole sila okhumayia akandi.

⁴³ “Mulitsiboolelwa inywe, Abafarisayi! Sichila mwayanza tsindebe tsieimbeli mutsisinakoki, nende okhusiesibwa mubiiro.

⁴⁴ Mulitsiboolelwa inywe, sichila muli singa ebilindwa ebiebisa, abandu bachendanga khubio nibaramanyile.”

⁴⁵ Mulala khubebaali ba Malako namubool'la, “Omwibaali, nyinga oboolanga yaka okhurindilanga nefwe khandi.”

⁴⁶ Yesu namukalusia, “Nenywe abebaali ba Malako, mulitsiboolelwa, sichila mutukhanga abandu ebilinga ebia baranyala okhuchinga, ne nenywe abene simutila khwo kata esitere sionyene okhubakhonya tawe.

⁴⁷ Mulitsiboolelwa, sichila mwombokhanga ebilindwa biabaroobi ababakuka benywe bera.

⁴⁸ Inywe abene mukobokhelanga okhuhuchilisania khwenywe nende emilimo chiabakuka benywe, sichila nibo abeera abaroobi, ne nenywe mwombokhanga ebilindwa biabwe.

⁴⁹ Khulwe sifune yisi obuchesi bwa Nyasaye bwaboola, ‘Ndakhabarumile abaroobi nende abarumwa, nebutswa bakhere abalala khubo ne nibakhupia abandi esibi.’

⁵⁰ Kho lisuba yili liakhanyoole esinyasio khulwa amatsahi kabaroobi bosi aberwa okhurula esibala nisilombwa;

⁵¹ okhurula khukhwirwa khwa Habili okhwola khukhwirwa khwa Sakaria ower'rwa hakari holusambwa nende Habundu Hatsienukhu. Yee mubool'langa lisuba yili liakhanyoole esinyasio khulwe ebikhole yibi biosi.

⁵² “Mulitsiboolelwa inywe abebaali ba Malako, sichila mwabisa olufungo lwomuliango kwobuchesi; inywe abene simwakhenjile mwo tawe, khandi mwikal'langa abatemanga okhwinjila mwo.”

⁵³ Olwa Yesu yarulaho, Abebaali ba Malako nende Abafarisayi nibachiaka okhumwinjil'la butinyu, nibamureeba amarebo khumang'ana amenji,

⁵⁴ khe bamureke ma bamutile naboolanga ling'ana lisiamu.