HOSEA 9 - EBAIBO INZIENUKHU

Hosea abool'la abandu akesinyasio khu Isiraeli

¹ Inywe Abaisiraeli, lekhe okhwesangasia mumasabo kenywe singa abanasibala. Mwalekha Nyasaye ma simusili abasubilwa khuye tawe. Musibala siosi inywe mwayekusia singa abatamba khunyasaye wa Baali ma mwayanza obuswache obwamupaalanga Baali yamurunga.

² Sinalube oluhono nimurali nende obuswache nende amafura komuseituni kata ewaini tawe.

³ Abaisiraeli sinabatsilil'le okhumenya musibala sio MWAMI tawe, nebutswa nabakalukhe Emisiri kata nabalie ebiokhulia biomusilo mu Asiria.

⁴ Mubibala biebucheni yibiu, sinabahaanekhwo emisango chiewaini khu MWAMI, nohomba okhuleerakhwo emisango chindi khuye tawe. Ebiokhulia biabwe biakhafwabie buli mundu olitsangakhwo singa ebiokhulia bilibwanga mumasika. Ebiokhulia yibio biakhurumikhilwe okhubekusia inzala yabwe yonyene; sibiakhahilwe mu Hekalu yo MWAMI singa omusango tawe.

⁵ Mwakhakhole sina olwe inyinga yobusangali yakhabe niyol'le; khunyinga eyelwa khulwokhuhaana oluyali khu MWAMI?

⁶ Kata nibaba nibelukhila Asiria okhurula khumunyakhano kwokhumululwa, Emisiri elababunjelesia, ma bayabilwe Memufisi. Obuyinda bwabwe bwetsahabu nende habundu habamenyanga, halakhulamwo obulimo nende amahwa.

⁷ Amatukhu komunyakhano kol'le, amatukhu akokhurunjibwa es'sialia, ne olwe yako na kekholekhe, Isiraeli nemanye. Mulaboola mbu, “Omuroobi uyu nomuhingwa, omundu wetsusibwa nende omwoyo uyu nomulalu.” Inywe muusuulanga sichila obwoni bwenywe nobukhongo.

⁸ Nyasaye yaaruma okhuchetsiyia Isiraeli, abandu baabe. Nikarali hosi hanzitsanga, muteemanga okhuureka singa linyonyi. Kata mu Hekalu ya Nyasaye abandu nabasuku babaroobi.

⁹ Bayeyononia okhusila singa bakhola m'matukhu ka Gibea. Nyasaye yakhetsul'le obubi bwabwe nabaler'ra omunyakhano khulwe tsimbi.

Tsimbi tsia Baisiraeli nende omurungo kwatsio

¹⁰ OMWAMI aboolanga mbu, “Olwa ndanyoola Isiraeli, kafwana singa obwonyoola emisabibu nitsikhulanga musitsiimi: Olwa ndalola abakuka benywe kafwana singa ololanga omukhuyu kwokhuranga nikwengele khumusaala khunyinga yakwo. Nebutswa olwa batsia khusikulu sia Peori bachiaka okhwekayakaya Baali, nibekhoyela esindu siokhubasimbia omurwe, ma nibaba abes'sinyo ol'la singa abanyasaye babayanza.

¹¹ Obukhongo bwa Isiraeli bulapulukha singa linyonyi, ne abaana sibalebulwa tawe, kata abakhasi sibalabelekha tawe nohomba abaana sibalabelekhwa tawe.

¹² Kata nibakhakhusia abaana babwe, ndalabanuula ma abuleho owakhaba mwoyo. Olwa mbalekha balanyoola omunyakhano omukali.”

¹³ OMWAMI, ndolanga singa abaana babwe bakhaabungwa nibeer'rwa.

¹⁴ Nisina esiandakhakhureeba okhol'le abandu yaba? Okhole abakhasi babwe okhuba abakumba! Obakhole balekhe okhununia abaana babwe!

OMWAMI yakhalachila Isiraeli Esiina

¹⁵ OMWAMI aboolanga mbu, “Obubi bwabwe bwachiachila Giligali. Habwene yaho niho ahandachiaka okhubabihil'lwa. Ne khulwe ebionono biabwe nambakhunge okhurula musibala sianje. Sinanzilil'le okhubayanza tawe, abemeli babwe bakholeye induli.

¹⁶ Abandu ba Isiraeli bafwana esirakwa esiemisi chiasio chioomele, esiranyala okhwama amatunde tawe. Sinabebule abaana tawe, nekata nibakhebula abaana, nanzire abaana ababayanza okhusila.”

Amang'ana aka Hosea yaboola khu Isiraeli

¹⁷ Nyasaye wanje owarumikhilanga alasuula abandube, sichila sibamuhul'la tawe. Balaba abandu bokhutimatima mumahanga.