HOSEA 8 - EBAIBO INZIENUKHU

OMWAMI yakhalachila Isiraeli esiina khulwokhwekayakaya ebiniini

¹ OMWAMI aboolanga mbu, “Khupe olwika! Abasuku bayeyemanga khusibala sianje singa tsinditsu! Abandu banje bafunachile indakano eyandalomba n'nabo nibasuula okhulonda amebaalo kanje.

² Kata nikali mbu bananganga Nyasaye wabwe khandi baboolanga mbu bo nabandu banje khandi baimanya ise,

³ baasuula akali amalahi. Khulwa akene yako, abasuku babwe balabalondel'la.

⁴ “Abandu banje bahula abaruchi khubwabwe abene. Bemekha abemeli ise nirasangilekhwo tawe. Babukulanga efetsa netsahabu nibalombakhwo abanyasaye khulwo khweler'ra okhumumwa khwabwe abene.

⁵ Mbihil'lwanga etsichulukhi chietsahabu etsiekayakaywanga nabandu ba Samaria. Oburima bwanje khubo nobwinji. Nabatsilil'le okhwola lina nibasili okhulekha obwekayakayi bwebiniini?

⁶ Omubaatsi Omuisiraeli niye owalomba esiniini esiabekayakayanga, ne sisili Nyasaye tawe. Echulukhi yetsahabu eyekayakaywanga mu Samaria nayaranibwe mubitonye.

⁷ Olwa bakharaake obusindu, bakhachese imbumbuyeka. Omukunda okwobuswache oburali nemirwe sikunyala okhwama ebiokhulia tawe. Ne kata nikuba nikwakhama, abasuku nibo abakhabilie.

⁸ Isiraeli nelihanga eliamilwa; bali singa tsimbia tsindi khandi libula obukhala singa isongo eyatikha.

⁹ Batsitsanga okhukhaaba obukhonyi okhurula Asiria singa etsipunda tsiomubulimo. Barunganga tsinzibulo tsindi khulwokhubasoola.

¹⁰ Kata nikali barunganga abetsinzibulo, luno ise namusanye mwesi halala ma namuhelesie esinyasio. Olunyuma, balabinda mukhusalila olwomuruchi wa Asiria aletsa okhubasandia.

¹¹ “Olwa Baisiraeli bombokhanga tsisambwa tsinyinji etsiokhuhinia tsimbi nilwo olwa habundu hokhukhol'la tsimbi hametekhanga khubo.

¹² Nimbahandikila amalako kanje etsielefu likhumi, khubo kali butswa amacheni akabaranyala okhuhuchil'la.

¹³ Bamban'nanga emisango ne nibalia inyama yemisango tsana. Nebutswa ise OMWAMI sinyanzanga emisango yitsio tawe. Luno nzia okhwitsul'la obubi bwabwe ma mbahelesie esinyasio khulwabwo. Nambakalusie Emisiri.

¹⁴ Abandu ba Isiraeli banzibiliye ise omulonji wabwe ma bombokhele tsinyumba tsioburuchi. Abandu ba Yuda bombokhele amatookho akasirwa namasisi. Nebutswa narume omul'lo okwanakusambe tsinyumba tsiabwe tsioburuchi nende amatookho kabwe.”