HOSEA 6 - EBAIBO INZIENUKHU

Okhwekalukhania khwabandu okhurali okhulunji

¹ Abandu baboolanga mbu, “Hambe khumukalukhile OMWAMI! Ye ukhusalisisie, nebutswa alakhulesa ma khuhone. Ukhuratsisie esitsahi nebutswa alaboha ebitonda biefwe.

² Khumatukhu kabili alakhubuusia, khwitukhu liakhataru alakhusimukusia, nefwe khulamenya imbeliwe.

³ Chende khumumanye OMWAMI. Aleetsa khu ifwe olwa bwitsa okhuba nibusietsanga singa butswa obwe ifula yomuhika esundukhanga nesama esibala.”

⁴ Nebutswa OMWAMI aboolanga mbu, “Isiraeli nende Yuda, nisina esiandakhakhola n'nenywe? Obuyanzi bwenywe bufwana singa lilumbesi liamukamba tsuli, elikhamulukhanga bwanga singa eliime.

⁵ Niko akachil'le mal'le okhuruma abaroobi banje khwinywe namang'ana kanje akokhumukhalachila esiina nende okhumumuma. Akanyenyanga khwinywe kali kololi khandi habulafu:

⁶ Ise sangal'langa obuyanzi obweinikhu, tawe emisango chiemiruko chienywe. Kakhaba amalahi khu ise niiba abandu banje bakhaamanya ise okhuyomba okhunder'ra emisango emisambe.

⁷ “Nebutswa singa Adamu, bali okhufunaka indakano yanje n'nabo, nibabula okhuusubila.

⁸ Gileadi nelitookho elietsulamwo abandu ababi nende abeeri.

⁹ Abesaalisi bali singa omukanda kwabanuuli abekonekheye omundu nalebe. Kata khunjila eyokhutsia Shekemu habundu hatsienukhu, ber'rangayo abandu. Bakholanga yaka kosi neinjinia.

¹⁰ Ndaluutsi esies'sinyo mwihanga lia Isiraeli: abandu banje baefwabia khulwokhwekayakaya abanyasaye bandi.

¹¹ “Nebutswa inywe abandu ba Yuda, ndamala okhumurechekhela inyinga yokhumuhelesia esinyasio khulwamang'ana akamukholanga.