HOSEA 5 - EBAIBO INZIENUKHU

¹ “Hulile kano, inywe abesaalisi. Rechelesie, inywe abandu ba Isiraeli! Reche amarwi, inywe abeinyumba yomuruchi! Okhuba mukhoyele okhukhalaka esiina habwene – kho esiina okhwola simufwile! Muli singa omureko mwitaala lia Misipa, khandi singa olububi olufumbilanga esikulu sia Tabori.

² Khandi muli singa obuko oburambi mwitaala lia Shitimu, ne namuhelesie, inywe mwesi esinyasio.

³ Ndaamanya obwa Isiraeli bafwananga, sibanyala okhwebisa okhurula khu ise tawe. Isiraeli babul'le okhuba abasubilwa khu ise ma abandu tsana sibakwan'ne okhundekayakaya tawe.”

Hosea yachetsiyia abandu balekhe okhwekayakaya abanyasaye bandi

⁴ Tsimbi tsiabandu bakhola tsibekal'langa okhukalukha khu Nyasaye wabwe. Obwekayakayi bwebiniini buli nobunyali khubo, bubekal'langa okhuhuchil'la OMWAMI.

⁵ Esunga yabandu ba Isiraeli elakayilanga mutsimoni tsiabwe. Tsimbi tsia Baisiraeli tsichilanga nibesikar'ra khandi nibakwa. Ne abandu ba Yuda bakwitsanga halala n'nabo.

⁶ Babukulanga amakondi kabwe nende tsing'ombe okhuhaana singa emisango khu MWAMI, nebutswa sichibakhonyanga tawe. Sibali abanyala okhunyoola OMWAMI tawe sichila wabalekha.

⁷ Sibali abasubilwa khu MWAMI tawe; abaana babwe sibali abo MWAMI tawe. Kho bo nende emikunda chiabwe chilamumwa.

Obulwani bwa Yuda nende Isiraeli

⁸ Khupe olwika lwobulwani mu Gibea! Khupe efirimbi mu Rama; khupe etsikhwisi tsielihe mu Betsaweni! Abandu ba Benjameni batsie mwihe!

⁹ Litukhu liesihesi litsanga ne Isiraeli elamumwa. Abandu ba Isiraeli, yaka kalekholekha!

¹⁰ OMWAMI aboolanga mbu, “Ndi nelirima sichila abemeli ba Yuda baseer're Isiraeli ma babukuye emikunda chiabwe. Kho nasundule oburima bwanje khubo singa amaatsi.

¹¹ Isiraeli esalilanga khulwo okhusandibwa; yanulwa emikunda chiabwe sichila yatsia okhureeba obukhonyi khu yabo abarali nobukhonyi bwokhuhana.

¹² Nandeere okhumumwa khu Isiraeli nende okhumalwa khwabandu ba Yuda.

¹³ “Olwa Isiraeli yalola obulwayebwe ne Yuda nalola ebitondabie, Isiraeli yatsia khu Asiria okhureeba omuruchi obukhonyi nebutswa ye sianyala okhumuhonia kata okhulesa ebitonda biabwe yibio tawe.

¹⁴ Naaseere abandu ba Isiraeli nende Yuda singa esimba. Ise omwene nambarandul'le ma nambalekhe sila obukhonyi. Olwa nambakhulul'le hasi, abulaho owanobasoole.

¹⁵ “Nakhupe abandu banje omukongo okhwola olwa nabaabe nibasaaliye okhuhela khulwe tsimbi tsiabwe ma nabeetse okhuuruna. Haundi mukhusalila khwabwe, balateema okhuuruna.”