HOSEA 4 - EBAIBO INZIENUKHU

OMWAMI aboola amabi ka Isiraeli

¹ Hulile ako MWAMI aboolanga amabi ka inywe abandu ba Isiraeli. OMWAMI amuyaalanga inywe abandu abamenyele musibala muno. Aboolanga mbu: “Obusubilwa nohomba obuyanzi sibili musibala tawe, kata khandi abandu sibamanyile mbu ise nise Nyasaye tawe.

² Besuhanga, nibarahesia akebiesuho biabwe, bakaatanga, nibeera, nibeeba, khandi nibaheya. Amabi kameetekhanga ne obwiri bumeetekhanga khubundi.

³ Khulwe yako esibala nasiome k'ka ne biosi ebimenyangamwo nabifwe. Etsisolo tsiosi namanyonyi kokhwikulu halala nende tsisuche etsiomunyanza biosi nabifwe.”

OMWAMI aboola amabi ka Besaalisi

⁴ OMWAMI aboolanga mbu, “Omundu wosi arakhalachilakhwo abandu nohomba okhubalul'la tawe – amekaano kanje kali khwinywe abesaalisi.

⁵ Mwesiraalanga m'mubasu nende mubutukhu ne abaroobi nabo khandi besiraalanga singa inywe. Ndakhakhuye Isiraeli mama wenywe.

⁶ Abandu banje bamumwanga khulwokhubula okhumanya mbu ise nise Nyasaye wabwe. Nenywe abesaalisi mwasuula okhuumanya ise khandi simwenya okhuhul'la amebaalo kanje tawe, nase khandi musuuye inywe, khandi sinambuchil'le abaana benywe okhuba abesaalisi tawe.

⁷ “Obwe inywe abesaalisi mumeetekhanga okhuba abenji nimbwo tsimbi tsienywe tsimeetekhanga imbeli wanje; khulwe yako nangalukhanie oluyali lwenywe lube es'simba murwe.

⁸ Muhindihalanga khulwe tsimbi tsiabandu banje ma kho mwenyanga batsilil'le okhukhola tsimbi okhusila.

⁹ Inywe abesaalisi mulanyoola esinyasio, singa abandu bandi bosi! Namuhelesie esinyasio nimurungia khumabi kamwakhola.

¹⁰ Mulalia ebiokhulia biokhumisango ne simurekura tawe. Mulekayakaya abanyasaye bokhumeeta olwibulo, nebutswa simulanyoola abaana tawe, sichila mwaikhupa ise omukongo nimulonda abanyasaye bandi.”

OMWAMI akhalachila obwekayakayi bwebiniini esiina

¹¹ OMWAMI aboolanga mbu, “Ewaini ikhulu nende ewaini imbia echilanga abandu banje nibakosia okhumanyilisia.

¹² Abandu banje bakhaabanga amebaalo okhurula khumusaala omwomu. Indabusi yabwe niyo ebahelesianga amalako! Baikhupa omukongo. Singa omukhasi owakwa omutamba nimbwo nabo behaananga khubanyasaye bandi.

¹³ Bahaananga emisango chiabwe khubutenje bwebikulu, ne balombelanga obwali bwabwe khubikulu ebimbichiti hasi wemikhuyu sichila esiinikha siachio nesilahi. “Ma khulwako abakhaana benywe barumikhanga singa abatamba ne abakhasi babasiani benywe nibakhola obusambale.

¹⁴ Sinambane esinyasio khubakhaana benywe nohomba khubakhasi babasiani benywe olwa bakhola yaka tawe, sichila inywe bene mukholanga obusambale nabatamba bomuhekalu, khandi muhaananga emisango tsiabetsimbia tsindi. Singa obwe tsinjelo tsiboolanga, ‘Abandu barali nokhumanya bakhatibe.’

¹⁵ “Kata nikali mbu inywe abandu ba Isiraeli simuli abasubilwa khu ise tawe, Yuda arakhanyoolekhakhwo nesikha singa yisio tawe. Nenywe murakhatsia okhwekayakayakhwo mu Giligali nohomba Betsaweni tawe, kata murakhesuha nimurumikhilanga eliira lia Nyasaye oli mwoyo tawe.

¹⁶ Abaisiraeli bayikala amarwi singa obwe tsinyumbu tsili etsiesikala marwi. Ndakhanyala okhubaaya mbwena singa amakondi akali musiayo esibambukhu?

¹⁷ Abaisiraeli basanganga khumisambwa echiinamilungwa, lekha babe.

¹⁸ Nibamal'le okhunywa ewaini inyinji behaananga khubutamba, nibekhoyela es'simba murwe okhuyomba oluyali.

¹⁹ Omuyeka kulabakinga nikubahila ehale, balasimbibwa emirwe khulwe emisango chiabwe chiesinasibala.