HOSEA 3 - EBAIBO INZIENUKHU

Hosea nende omukhasi Orali Omusuubilwa

¹ OMWAMI yambool'la mbu, “Khandi tsia oyanze omukhasi oheyanga. Omuyanze butswa singa obwe ise OMWAMI nyanzanga abandu ba Isiraeli, kata olwa batsitsanga khubanyasaye bandi nibahaana emisango chiemisabibu emiomu khubiniini.”

² Kho ise ndali okhurunga ebitonye biefetsa likhumi nabirano nende etsikilo emia ndala namakhumi karano etsie shayiri khulwokhukula omukhasi uyo.

³ Ndamubool'la mbu, “Amatukhu amenji nobe omukhasi wanje noraheyanga nohomba norakholanga obutamba tawe, nase khandi nambe singa mbwo khuibe.”

⁴ Munjila indelwa singa iyi Abaisiraeli bakhamenye amatukhu amenji nibarali nabaruchi kata nabemeli; khandi bakhamenye nibarakhola emisango nohomba okhuba netsisiilo tsinzienukhu; kata khandi sibakhabekhwo nebiniini biokhurumikhila okhukhola obufumu tawe.

⁵ Olunyuma Abaisiraeli bakhakalukhe okhurumikhila OMWAMI Nyasaye nende okhurumikhila owolwibulo lwa Daudi oli omuruchi wabwe ma bakhahelesie OMWAMI oluyali ne nibanyoola ebihanwa ebilahi okhurula khuye.