HOSEA 13 - EBAIBO INZIENUKHU

Obukhalachi Bwokhumal'likha khu Isiraeli

¹ Mumatukhu kabira olwa abesilibwa sia Efuraimu bal'lomanga, abandu bebilibwa bindi bia Isiraeli batechela, yali niyaribwa mu Isiraeli. Nebutswa abandu bakhola tsimbi khulwo khwekayakaya Baali ne khulwe yako okhwola bafwe.

² Bametekhanga mukhukhola obwoni khulwo khwelombela ebiniini biemikasa khulwo khubiekayakaya – ebiniini bie tsahabu ebiakulukunzwa namapaalo kabandu, nibilombwa namakhono kabandu. Ne baboolanga mbu, “Haane emisango khutsio!” Abandu bakhatsunzuna mbwena ebiniini yibi – ebiniini bialombwa mufwano kwechulukhi!

³ Khulwe yako, balakhamulukha singa litumbi eliamukamba tsuli nohomba singa eliime elianguhanga okhukhamulukha mubasu. Balafwana singa omukhuutsi okuhilwa neimbumbuyeka, khandi singa omwosi okutuumanga okhurula munzu.

⁴ OMWAMI aboolanga mbu, Ise nise OMWAMI Nyasayewo owakhuhiinia musibala sie Misiri. Sialiho Nyasaye undi nirali ise sienyene, Ise sienyene nise omuhonia uwo.

⁵ Ise ndakhumanya olwa wali musitsiimi, musibala esioma esili nobuluho obwinji.

⁶ Nebutswa olwa mwola musibala esikaasu mwali khwikura nende okhwehul'la bulahi ma mwamala nichiaka okhwelola nende okhunzibil'la.

⁷ Khulwe yako, namuseere singa esimba. Singa ingwe ndakhamweekonekhele khunjila yamubirangakhwo.

⁸ Ndamuseera singa etubu efiliywe abaana bayo, ndamurandulania. Singa esimba ndamukamul'la habwene yaho ma murandulanie mubitonye singa inyama nabulimo.

⁹ “Namulule inywe abandu ba Isiraeli! Kho niwina onyala khumusoola?

¹⁰ Mwali khureeba muhebwe omuruchi nende abemeli, kho bakhasoola mbwena lihanga?

¹¹ Ndamuhelesia abaruchi nindi nelirima khandi nimunuula nindi noburima obukali.

¹² “Tsimbi tsia Isiraeli nende obusiamu bubwe bwahandikwa musitapu ne esitapu tsana siabikhwa bulahi.

¹³ Isiraeli bali nobweyangu bwokhumenya musibala, nebutswa khulwobuhingwa bwabwe basuuye khububukula bafwana omwana owelitukhu liokhwibulwa liol'le, ne usuuye okhurula mulubelekhelo.

¹⁴ Sinzia okhuhonia abandu yaba okhurula mubunyalibwe Emakombe nohomba okhubasoola okhurula khulufu tawe. Baleer're likhupako liokhufwa! Ibe esibala sie Emakombe, baleer're okhumumwa! Sinambekhwo netsimbabasi khubandu yaba tawe.

¹⁵ Kata nikakhaba mbu Isiraeli akhulanga bwangu singa libanze, narume omuyeka kwokhusamba okhurula ebukwe musitsiimi, ne nakukhamie emichela chichie nebitaho bibie. Kulabukula ebindu biosi ebiobukusi.

¹⁶ Samaria okhwola ahebwe esinyasio khulwo khukhol'la induli. Abandu ba Samaria bakhafwile mwihe; abaana batoro balafuubwa hasi, ne abakhasi bali tsinda bularandulwa tsinda.”