HOSEA 1 - EBAIBO INZIENUKHU

¹ Kano namang'ana ako MWAMI yamanyia Hosea omusiani wa Beeri mumatukhu ka Usia, Yotsamu, Ahasi, nende Hesekia olwa bali abaruchi ba Yuda khandi olwa Yeroboamu omusiani wa Yoashi yali omuruchi mu Isiraeli.

Omukhasi wa Hosea nende abaanabe

² Olwo MWAMI yal'loma khu Isiraeli olwokhuranga okhubir'ra mu Hosea yamuboola mbu, “Tsia oteesie omukhasi omutamba ma onyoole abaana n'naye. Ne abaana baabe nababe abatamba singa nyina wabwe. Munjila ndelwa yiyo, nimbwo abandu banje bandekha, ma bakholanga obuheyi khandi sibali abasubilwa khu ise tawe.”

³ Kho Hosea yateesia omukhasi owalangungwa Gomeri omukhaana wa Dibilaimu. Yabelekha, ma niyebula omwana omusiani.

⁴ OMWAMI yabool'la Hosea mbu, “Mukulikhe eliira mbu, ‘Yesereli’ sichila sinalube oluhono nisili okhuhaana esinyasio khumuruchi wa Isiraeli; sichila kukanyene Yehu yer'ra abandu ha Yesereli. Nambinie oburuchi khubeinzu ya Yehu.

⁵ Olwene yilwo, mwibanda lia Yesereli namulule abasikari ba Isiraeli bosi.”

⁶ Gomeri yabelekha khandi, niyebula omwana omukhaana. OMWAMI nabool'la Hosea mbu, “Mukulikhe mbu, ‘Oraayanzwa’ sichila sinanzilil'le okhuyanza Abaisiraeli nohomba okhubabeela tawe.

⁷ Nebutswa khubandu ba Yuda nabamanyie obuyanzi bwanje. Ise OMWAMI Nyasaye wabwe, nambahonie, nebutswa sinakhole mbwo khulwo khulwana netsinganga nohomba nobuyingo nende tsisele nohomba nende etsisululi nende abalwani bokhutsisululi tawe.”

⁸ Olwa Gomeri yali nalesisie omwanawe omukhaana okhununa, yabelekha niyebula omwana omusiani.

⁹ OMWAMI nabool'la Hosea mbu, “Mukulikhe mbu, ‘Abandu Barali Abanje Tawe’ sichila abandu ba Isiraeli sibali abandu banje tawe, nase sindi Nyasaye wabwe tawe.”

Abaisiraeli bakhakalukhile OMWAMI

¹⁰ Abaisiraeli bakhabe singa omuyekhe okwomunyanza, okuranyala okhuchelwa nohomba okhubasibwa tawe. Ne luno OMWAMI ababool'langa mbu, “Simuli abandu banje tawe” nebutswa litukhu litsanga elialibabool'la mbu, “Inywe muli abaana ba Nyasaye oli mwoyo.”

¹¹ Abandu ba Yuda nende Abaisiraeli bakhahambane. Bakheele omundu mulala okhubemel'la, ma bakhameetekhe nende okhuhindihala musibala siabwe. Yee, litukhu lia Yesereli liakhabe litukhu likhongo!