HAGAI 1 - EBAIBO INZIENUKHU

Lilako lio MWAMI okhwombokha Ehekalu

¹ Mumuhika kwakhabili olwomuruchi Dario yali narukanga Perisia, khwitukhu liokhuranga mumwesi kwakhasasaba, OMWAMI yal'loma okhubir'ra mumuroobi Hagai. Amang'ana yako karumwa khu Serubabeli omusiani wa Shelitieli owali omukafuna wa Yuda nende khu Yoshwa omusiani wa Yehosadaki, owali Omwesaalisi Omukhongo.

² OMWAMI Wokhunyala Biosi yabool'la Hagai mbu, “Abandu yaba baboolanga mbu inyinga esili okhwola eyokhwombokha Ehekalu obuhia.”

³ Kho OMWAMI yamala abool'le abandu amang'ana kano okhubir'ra mumuroobi Hagai mbu,

⁴ “Esichilanga inywe nimumenya mutsinyumba tsiombokhwa bulahi, olwe Ehekalu yanje yabungulukha nisina?

⁵ Simulolanga akekholekhanga khwinywe tawe?

⁶ Mwali okhuraaka amatuma amenji, nebutswa mwachesa matititi okhusila. Mulitsanga ebiakhulia nebutswa sibiliho ebiamwakhekura tawe. Munywetsanga ewaini nebutswa semuhelanga echila mukholwe tawe! Mwebikhanga tsingubo, nebutswa sitsibetsangamwo oluya tawe. Kata uyo owahandikwa emilimo sianyoolanga amapesa kamuhela okhurumikhila tawe.

⁷ Simulolanga akachilanga yaka nikekholekha tawe?

⁸ Luno tsie mubikulu, mwende emisaala ma munyombokhele Ehekalu; nase ndakhasangala nende okhwekayakayilwamwo singa kakhoyele kabe.

⁹ “Mwanaaya mwakhachesa ebinji, nebutswa kanyoolekha mbu muchesele ebitititi okhusila. Olwamwaleera hango, ndabipulusia okhutsia ehale. Esiachila nikhola mbwo nisina? Sichila Ehekalu yanje yakwa olwa buli mundu atiyanga butinyu khunyumba yiye.

¹⁰ Niko akachilanga ifula sienyala okhukwa tawe, khandi sibulaho esinyala okhukhula mumukunda.

¹¹ Mal'le okhuleera esimi khusibala; khubikulu biasio, mumikunda chiamatuma, khuwaini, khumafura nende khubiosi ebikhulanga mwiloba, kata nende khubandu nende tsinyama nende khusiosi esiamuteemanga okhuraaka.”

Abandu bahuchil'la okhumwombokhela OMWAMI Ehekalu

¹² Kho Serubabeli nende Yoshwa nende abandu bosi abarula mubuhambe musibala sia Babulonia, bahuchil'la okhukhola ako MWAMI yali nabalachile mbu kakholwe. Bali noburi ma nibahuchil'la okhukhola okomuroobi Hagai omurumikhili wo MWAMI, yali nababooleye.

¹³ Kho Hagai yababool'la amang'ana ko OMWAMI yali nabooye mbu, “Nambe ninenywe; iyo niyo indakano yanje.”

¹⁴ OMWAMI niyetsusia buli mundu nende omwoyo kwokhutiya khu Hekalu. Serubabeli omukafuna wa Yuda nende Yoshwa, Omwesaalisi Omukhongo nende bosi abakalukha okhurula mubuhambe bali nomwoyo yikwo. Bosi bachiaka okhwombokha Ehekalu yo MWAMI Wokhunyala Biosi, Nyasaye wabwe,

¹⁵ omwesi wakhasasaba nikuli amakhumi kabili na khane, mumuhika kwakhabili muburuchi bwa Dario.