ETSISABURI 9 - EBAIBO INZIENUKHU

Okhukhupila Nyasaye embwo khulwo bukhalachi bwe obwahabwene

¹ Nakhwitsoomia ibe, OMWAMI nomwoyo kwanje kwosi; Naribule khukemilimo chichio echiamakana.

² Nanyembe nobusangali khulwe milimo chichio. Nanyembe nikhwitsoomia ibe OMWAMI Wokhunyala Biosi.

³ Abasuku banje bakalukhanga inyuma olwa bakhulolanga; bakwitsanga hasi nibatiba.

⁴ Obukhalachibwo nobwahabwene khandi nobwatooto, khandi ukhalachiiye khulwo obulunji bwanje.

⁵ Ukondokheye abetsinzibulo tsindi nomulula ababi; sibaletsul'lwakhwo khandi tawe.

⁶ Abasuku befwe batibile khulwe inziayo; Ibe umuluye amatookho kabwe kosi. Ma amatookho tsana siketsul'lwangakhwo kata hati tawe.

⁷ Nebutswa OMWAMI niye omuruchi inziayo, ye ulombele oluruba lulwe khulwo okhukhalaka esiina.

⁸ Yamihanga esibala mubwatooto; akhalachilanga amahanga mubulunji.

⁹ OMWAMI nobwilukhilo khubasandibwanga, habundu homulembe munyinga tsiesibi.

¹⁰ Yabo abakhumanyile Ibe OMWAMI balakhusubila; ibe siobanzukhilanga yabo abakhurunanga Ibe tawe.

¹¹ Mwembe nimwitsoomianga OMWAMI owamihanga mu Sayuni! Mubool'le amahanga kosi ako MWAMI amal'le okhukhola!

¹² Nyasaye yetsul'langa yabo abakhupanga esibi; siyebil'langa okhulakaya khwabwe tawe, ne ahaananga esinyasio khubosi ababakhol'langa obubi.

¹³ Umbeele tsimbabasi E OMWAMI! Olole amanyakhano akabasuku banje bander'ranga! Umbonie khulufu, E OMWAMI,

¹⁴ mbu sinjile imbeli wabandu ba Yerusalemu, mbabool'le kosi akachilanga nikhwitsoomia. Nasangale sichila ibe wambonia.

¹⁵ Abetsinzibulo tsindi bakwiye mubuko obwa bayaba abene; batil'lwe nemibero chiabwe abene.

¹⁶ OMWAMI webisuuye omwene mubukhalachi bubwe obwatooto, ne ababi nabo batil'lwe mububi bwabwe.

¹⁷ Olufu nilwo esihesi siababi bosi, khandi esie yabo bosi abafukulanga Nyasaye.

¹⁸ Abatakha sibalebil'lwa khasotso tawe; kata okhunaaya khwababisandu sikhulatiba inziayo tawe.

¹⁹ Obuukhe, OMWAMI! Oralekha abandu banyoole obulechi tawe! Lekha abetsinzibulo tsindi bakhalachilwe esiina imbeliwo.

²⁰ Obabikhe mukhuria, E OMWAMI; obamanyie mbu bo nabandu abafwitsanga.