ETSISABURI 4 - EBAIBO INZIENUKHU

Obusaayi bwamukolooba obwokhureeba obukhonyi

¹ Ungalusie olwa saaya khuibe, E Nyasaye, omusooli wanje! Olwa ndali musibi, ibe wali okhuukhonya. Umbeele tsimbabasi luno ma ohulile okhusaaya khwanje.

² Abandu inywe mulatsilil'la okhunyeka okhwola lina? Mulatsilil'la okhuyanza akabutswa, ne nimurunilisia akobubehi okhwola lina?

³ Mwitsul'le mbu OMWAMI wayela omulunji okhuba ouwe, khandi yambulilanga olwa nanganga khuye.

⁴ Nohambwa noburima orona tawe; mukanil'le khuko abene, olwa mweyalisia khubitanda bienywe masilisi.

⁵ Muhaane emisango etsienyekhanga khu MWAMI ma mumusubile.

⁶ Baliho abenji abasaayanga nibaboola: “Okhuhelesie tsikhabi tsinyinji E OMWAMI. Okhuhengekhwo oluboni ol'lahi!”

⁷ Nebutswa obusangali obworeye mumwoyo kwanje, buyomba obusangali bwabwe olwa bali nobuswache obwinji nende ewaini inyinji.

⁸ Olwa ndeyalisianga, ngonanga tsindoolo nindi nomulembe; OMWAMI, ibe wenyene niwe ousoolanga okhurula musibi.