ETSISABURI 12 - EBAIBO INZIENUKHU

Obusaayi bwokhureeba obukhonyi

¹ OMWAMI okhukhonye! Abandu abalunji bahweye; abasubilwa nabo sibanyala okhunyoolekha khandi tawe.

² Baboolilananga obubehi abene khubene, bakaatana omundu nowasie nokhubehelesia.

³ Osiling'anie tsinimi tsiababehelesi yitsio E OMWAMI! Wikale eminwa chiobwekhonyi echiboolanga,

⁴ “Khunyoolanga aka khwenyanga khulwa amang'ana kefwe abene. Khulal'loma kosi akakhwenya, ne abulaho owakhakhwikal'la.”

⁵ OMWAMI aboolanga mbu: “Nebutswa luno nanzitse, sichila abatakha basandibwanga, nabo abakhupibwanga esibi babindanga khulwa okhusaal'la. Nambahe obulindi obwabakhabanga.”

⁶ Amasubisio ko MWAMI kanyala okhusubilwa, namasiyikhu singa efetsa eteemelwe mus'sambilo eyitsienuywe esiakhane nakhataru.

⁷ E OMWAMI, okhulinde, ne okhusoole khubandu ababi yabo khulwe inziayo.

⁸ Abandu ababi bali habundu hosi, ne siomundu yetsoomianga akali amabi.