ESEKIELI 1 - EBAIBO INZIENUKHU

Amabisulo kokhuranga aka Nyasaye yamanyia Esekieli Oluruba lwa Nyasaye

¹ Mumuhika kwamakhumi kataru, mumwesi kwa khane, khwitukhu lia kharano, Ise Esekieli halala nende abandu abali nibatisibwa khwali nikhuli hamuchela kwa Kebari, likulu liekukha, ma nindola amabisulo ka Nyasaye.

² Khwitukhu liakharano liomwesi (Kwali omuhika kwakharano okhurula omuruchi Yehoyakini, niyatisibwa okhutsia mubuhambe).

³ Habwene yaho, musibala sia Babulonia, hamuchela kwa Kebari ise omwesaalisi Esekieli omusiani wa Busi, ndahul'la OMWAMI nal'lomanga n'nase ma nimbul'la obunyali bwo MWAMI nibuli khu ise.

⁴ Olwa ndahenga, ndalola omuyeka kweimbuutsa nikwiitsanga okhurula esinyolu. Olweni lwali nilwakhanga okhurula mwilumbesi likali, ne likulu eliali ahembi nelilumbesi tsana liakha obulafu. Alolweni lwali nilwakhanga, esindu siang'inang'inaho singa omukasa.

⁵ Ne hakari homuyeka yikwo, ndalola ebindu ebifwana ebili mwoyo bine ne biali nelikondo singa eliabandu,

⁶ nebutswa siasilala khubio siali nende obweni bune nende tsimbaha tsine.

⁷ Ebilenje biabio biali ebikol'lokhu ne bialikhwo tsimbakayu singa etsiechulukhi. Natsio tsiang'inang'inanga singa omukasa okwaruutwa.

⁸ Ise wetsimbaha tsiabio etsili khutsimbeka tsiabio tsine biali nende amakhono singa akomundu. Yibi bimeetanga khubweni bwabio bune nende tsimbaha tsiabio tsine.

⁹ Tsimbaha tsibili etsia buli silala khubio siabambulwa ma obutsunzu bwetsimbaha tsiabio nibutilana okhulomba tsimbeka tsine tsimbelani. Olwa biesunda, bitsia halala sila okhusukhania emibili chiabio tawe.

¹⁰ Buli esili mwoyo siali nobweni bune obwabukhan'ne singa: obweni bwomundu imbeli wasio, obweni bwesimba khumukhono musaatsa, obweni bwechulukhi khumukhono mukhasi nende obweni bweinditsu emukongo wasio.

¹¹ Tsimbaha tsibili tsiabuli silala khubio chiekinga ikulu ma obutsunzu bwatsio nibwefiila khubutsunzu bwetsimbaha tsiesilonje sindi esialondokhana n'natsio, ne tsimbaha tsindi tsibili tsiafunikha emibili chiabio.

¹² Buli silala siahenga tsimbeka tsiosi tsine, ma khulwako biosi biatsitsanga hosi ahabienya, sila okhusukhana.

¹³ Hakari tsana sialiho esindu esiafwana amanda komul'lo akatukhanga, singa etsitochi etsikhosianga iyi ne bikalukha iyi. Omul'lo kwali omwang'al'lu, ne okhurula mumul'lo yikwo oluheni lwarulangamwo singa tsinzekhele.

¹⁴ Ne ebili mwoyo yibio bielukhanga nibitsia iyi ne iyi singa oluheni.

¹⁵ Olwa ndali nimenganga ebili mwoyo bine yibio, ndalola amakurutumu kane nikasingiye khwiloba hasibafu siabuli silala khubio.

¹⁶ Ne amakurutumu kosi kali amafwanani buli elala khuko lianyinanyina singa lichina liobukusi obutinyu ne buli elala khuko liali nelikurudumu lindi hakari walio mutsikona etsialunjikha,

¹⁷ Kho mbu amakurutumu yako kabe akanyala okhutsia mutsimbeka tsiosi tsine nikarasukhanakhwo tawe.

¹⁸ Amakurutumu yako kali netsirimu ne tsiali nitsietsulakhwo tsimoni.

¹⁹ Ne nyinga ebili mwoyo yibio biesundanga amakurutumu yako nako nikesunda halala n'nabio; ne nyiinga ebili mwoyo yibio biabuukha okhurula khwiloba ne amakurutumu nako nikabuukha.

²⁰ Ebili mwoyo biatsitsanga hosi hosi aha biali nibienyele, ne amakurutumu nako khandi nikabilonda sichila ebili mwoyo bielusia amakurutumu yako.

²¹ Kho buli lwosi olwe ebili mwoyo biatsitsanga nohomba okhusinjila nohomba kata okhubuukha nibitsia mumiiya nimbwo amakurutumu nako kakholanga sichila ebili mwoyo biemel'langa amakurutumu okhukhola mbwo.

²² Ikulu wemirwe chiebili mwoyo sialiho esindu esifwananga singa esilang'i nohomba epakuli esibambukhu esialombwa khumachina akang'inang'inanga.

²³ Ne isi wesilama tsana ebili mwoyo biasinjilaho, tsimbaha tsibili tsiabuli esilonje nitsikol'lolekhele okhuchomanga netsimbaha tsiesilonje sindi esilondokhana n'nasio, ne siafuunikha omubili kwasio netsimbaha tsindi tsibili.

²⁴ Ne nyinga biapulukha, ndahul'la amayoosi ketsimbaha tsiabio; ne amayoosi tsana kali singa akeinyanza ehukumanga, singa ikhupa ya Nyasaye Owokhunyala Biosi, khandi singa amayoosi kabasikari abenji. Olwa bialekha okhutsia biakalusia tsimbaha tsiabio khumubili,

²⁵ nebutswa omwoyo okwarula ikulu wesilama esiali ikulu wemirwe chiabio kwali nikusihul'likha.

²⁶ Ne hekulu wesilama esiali ikulu wemirwe chiabio, sialiho esindu esiali singa oluruba olwalombwa okhurula khwichina liesafira; ne owali niyekhaye khuluruba yafwana singa omundu.

²⁷ Omwene uyu yaakha singa omukasa okuli mumul'lo hakari. Yaakha habundu hosi nobulafu obukali okhusila.

²⁸ Obulafu tsana bwalimwo namakondo kosi kesitsaahi sieifula. Yibu bwali obulafu obukali obumanyianga okhubaho khwo MWAMI. Olwa ndalola akene yako, ndakwa hasi mafungama, ma nimbul'la omwoyo nikul'lomanga.