DANIELI 11 - EBAIBO INZIENUKHU

¹ “Nase m'muhika okwokhuranga okwo omuruchi Dario Omumede ndasinjila khulwokhumukhonya nokhumumeeta tsingufu.

² Ne akanzia okhukhubool'la luno nakatooto.” Om'malaika tsana naboola mbu, “Lola, baliho abaruchi bandi bataru abakharuke Perisia nibalondwanga nende omuruchi owakhane owakhabe omuhinda okhuyomba abandi bosi. Ne olwa yakhabe nali netsingufu tsinyinji nende obuhinda obwinji yakhalwane lihanga lia Bayunani.

Lihanga lie Misiri nende elia Siria

³ “Omuruchi owetsingufu yakhetse. Yakharuke esibala esikhongo nakhola kosi akayenya.

⁴ Ne namal'le okhuba nobunyali obukali, obwamibwe bwakhakwe nibwabukhana mubitonye bine. Abaruchi abarali abolwibulolwe balaruka musilenjesie, nebutswa sibalaba netsingufu singa etsia yali natsio tawe.

⁵ “Omuruchi we Misiri alaba owetsingufu. Ne mulala khubemelibe bamahe olaba netsingufu tsinyinji okhumuyomba ne alaruka esibala esikali okhumuyomba.

⁶ Olunyuma olwemihika nalebe, omuruchi we Misiri yakhalombe indakano yobuhambani nende omuruchi wa Siria, ma yakhabakhile omuruchi wa Siria omukhaanawe khulwo okhutinyilisia indakano iyio. Nebutswa indakano siyakhamenye oluhono tawe, ne omukhasi uyo omusaatsawe, no mwanawe, nende abakholi abayeetsa n'nabo baleerwa bosi.

⁷ Olunyuma lwamatukhu matititi mulala khubekho abomukhasi uyo alaba omuruchi. Alaseera abasikari bomuruchi wa Siria niyenjila muluhinga lwabwe nende okhubaleka.

⁸ Alachinga nahila Emisiri ebiniini ebia abanyasaye babwe, nende ebimanulwa biefetsa, nende etsahabu ebiahanwa khubanyasaye yabo. Olunyuma lwemihika eminji echiomulembe,

⁹ omuruchi wa Siria alaseera Emisiri, nebutswa kalamuhachia okhukalukha inyuma musibalasie.

¹⁰ “Ma abasiani abomuruchi wa Siria balerechekha okhulwana lihe nibabunjikha omukanda omukhongo kwa basikari abelihe. Omukanda mulala kwabasikari kulamwoma singa omukhula kwamaatsi nikuseera oluhinga lwabasuku.

¹¹ Ma mwirimalie, omuruchi we Misiri alatsia okhuseera omuruchi wa Siria, nafumila omukanda omukali kwabasikaribe.

¹² Alepaaka khulwobulechibwe, nende abasikari abenji abaamal'le okhwira, nebutswa sialatsilil'la okhunyoola obulechi tawe.

¹³ “Omuruchi wa Siria alakalukha musibalasie okhubunjelesia omukanda kwabasikari omukhongo okhuyomba okwokhuranga. Inyuma wemihika nalebe, aleetsa nabasikari abenji abali nebilasan'nwe ebinji.

¹⁴ Mumatukhu yako abandu abenji bakhakhol'le omuruchi we Misiri indiri. Abandu bandi abeindiri balarula mwihanga lienywe ibe Danieli ne balakhola indiri khulwelibisulo elia baluutsi, nebutswa balalekwa.

¹⁵ Kho omuruchi wa Siria aleetsa nabaiskari okhufumbila litookho liasirwa nende okhulileka. Abasikari be Misiri abetsingufu sibakhatsilil'le okhulwana tawe, kata omusikari omululu mubosi siyakhabe netsingufu tawe.

¹⁶ Omusiria owitsanga okhubaseera alakhola akomwene ayanzile khubo, ne abulaho owokhumwikal'la tawe. Alasinjila khusibala esia Nyasaye yasubisia abandube, ne siosi p'pe silaba hasi hobunyalibwe.

¹⁷ “Omuruchi wa Siria alaloosia obwokhusiseera narumikhilanga abasikaribe bosi. Ne khulwo khumulula lihanga liomusukuwe, alalomba indakano yobuhambani n'naye, namubakhila omukhaanawe okhumutekhela nebutswa, obuloosiebwe sibwakhakhonye ling'ana liosi tawe.

¹⁸ Olunyuma alaseera tsimbia etsiokhunyanza naleka tsinyinji khutsio. Nebutswa omwemeli wesibala sindi yakhamuleke ne yakhamwikal'le khumanyekanoke; siahene yakhakalusie amanyekoke khuye omwene.

¹⁹ Omuruchi yakhakalukhe muluhinga lwomusibalasie omwene, nebutswa yakhalekwe, ne isio siakhabe esihesi sisie.

²⁰ “Kho omuruchi undi aleetsa musilenjesie owakharume omwami okhusandia abandu khulwokhusolola obusuru khulwokhumeeta emiandu mwihangalie. Ne m'matukhu matititi, omuruchi uyo yakherwe, nebutswa siyakher'rwe habulafu nohomba mwihe tawe.”

Omuruchi omubi wa Siria

²¹ Om'malaika natsilil'la okhwinoosia mbu, “Omuruchi wa Siria owakhalondekhwo yakhabe omundu omubi orakwan'ne okhuba omuruchi tawe. Nebutswa yakhetse mubwebisu olwabandu baramanyile, ne yakhabukule obwami munjila yob'batsa.

²² Omundu wosi owakhamufukule, kata abe Omwesaalisi Omukhongo wa Nyasaye alakhungwa ma yeerwe.

²³ Ne munjila eyokhulomba indakano yomulembe, yakhakaate amahanga kandi ma atsilil'le okhuba netsingufu kata nikali arukanga esibala esitititi.

²⁴ Yakhaseere olukongo lwabandu abahinda abali nomulembe barerechekhele tawe ne yakhakhole amang'ana kabakukabe barakholakhwo tawe. Ma yakhakabul'le abandube abamulonda, ebindu nende emiandu echiayaakile mwihe. Yakhaloosie obwokhuseera tsiminga, nebutswa amatukhu kakhahwe bwangu naraseera.

²⁵ “Yakhabukule abasikari abenji nakhulumamile nolutswoni olukali okhutsia okhuseera omuruchi we Misiri. Ne omuruchi we Misiri naye yakherechekhe okhulwana n'naye naali nabasikari abenji khandi abetsingufu. Nebutswa omuruchi we Misiri yakhakaatwe ne siyakhaleke tawe.

²⁶ Kata abachetsiyibe bokhumwoyo balamukaata. Abasikaribe abenji bakherwe ma omukanda kwabasikaribe kwosi kulamumwe.

²⁷ Ma nilwo olwabaruchi babili yabo bakhekhale nibaliila khumesa ndala nebutswa buli mundu yakhabe namapaalo kaake mumwoyo kukwe amabi khuwasie, ne bakhabool'lane akobubehi. Sibakhanyoole akabenya tawe, sichila inyinga yako eliuba nesili okhwola.

²⁸ Omuruchi we Siria yakhakalukhe musibalasie nemiandu eminji echia yakhabe nayaakile, nali nelichoomo liokhwira obwekayakayi bwabandu ba Nyasaye. Yakhakhole akayanzile ma akalukhe musibalasie.

²⁹ “Ne olunyumakhwo alaseera Emisiri khandi. Nebutswa olwene yilwo sikakhabe singa obwakali olwokhuranga tawe.

³⁰ Abaroma bakheetse netsimeeli okhumuseera ne bakhamuriisie. “Nilwo olwa yakhakalukhe inyuma mwirima nateema okhwira obwekayakayi bwabandu aba Nyasaye. Ma yakhalonde amebaalo kabandu abalekha edini yabandu ba Nyasaye.

³¹ Abalala khubasikaribe bakhafwabie Ehekalu. Bakhekal'le emisango echihanwanga bulitukhu nibaraho Esiniini sie Es'sinyo.

³² Munjila yobukaati, omuruchi, yakhanyoole okhubukilwa ne yabo abalekha edini yabwe. Nebutswa abandu abamanya Nyasaye wabwe, bakhatinye nibamufukula.

³³ Abemeli abachesi mubandu balebal'la abandi abenji khukobuchesi bwabwe. Ne kata mbwo khulwamatukhu matititi, abalala khubo bakher'rwe mwihe, nohomba okhusambwa nomul'lo ne abandi bakhayakwe nibabohwa.

³⁴ Olwa bakhabe nibeerwanga, abandu ba Nyasaye bakhahabinwekhwo hati, ne abenji bakheyonge n'nabo khulwokhubakaatilisia.

³⁵ Abalala khubemeli abachesi yabo bakherwe, ma khulwako, abandu bakhasiiywe. Kano kakhatsil'le okhwola khwitukhu eliesihesi, litukhu elia Nyasaye yalaka mbu liakhetse.

³⁶ “Omuruchi wa Siria yakhakhole singa obwa ayanzile. Yakhekhonye naboola mbu nomukhongo okhuyomba nyasaye undi wosi niyekaliyia okhuyomba kata Nyasaye Oweikulu Okhusila. Alakhola yaka okhwola olwa Nyasaye amuhelesia esinyasio. Nyasaye yakhakhole kosi akayalaka.

³⁷ Omuruchi uyo yakhachaaye nyasaye wabakukabe, khandi nende nyasaye owabakhasi bayanza. Akatooto kali mbu yakhachaaye omunyasaye wosi sichila yakhapaale mbu nomukhongo okhuyomba abanyasaye bosi.

³⁸ Ne musilenje sieyako yakhahaane oluyali khumunyasaye olindanga oluhinga. Yakhahaane etsahabu, efetsa, oruchina orwobukusi, nende ebihanwa ebiobukusi obukali khu munyasaye owabakukabe baramanyakhwo tawe.

³⁹ Khulwokhulinda oluhingalwe, yakharumikhile abandu abekayakayanga omunyasaye omucheni. Yakhahaane oluyali khuyabo abamuhuchil'la singa omuruchi ne yakhabahelesie tsindebe tsingali nabahelesia liloba singa esihanwa.

⁴⁰ “Olweinyinga yokhumal'likha yomuruchi wa Siria yakhabe niyool'le, omuruchi we Misiri yakhamuseere. Ma omuruchi wa Siria yakhalwane n'naye, netsingufutsie tsiosi narumikhilanga amakaari, etsisululi, nende etsimeeli tsinyinji. Yakhaseere eb'bala ebinji singa amaatsi komukhula.

⁴¹ Kata khandi yakhaseere esibala esia Nyasaye yasubisia abandube ma yeere abandu etsielefu amakhumi namakhumi. Ne ebibala bia Edomu, Moabu, nende obwinji bwabandu abasikala Amoni bakhahonokokhe.

⁴² Ne olwa yakhaseere ebibala bino, esibala sie Misiri sisilalekhwa tawe.

⁴³ Yakhabukule obuhinda bwe Misiri yabiikha obwetsahabu, efetsa, nende ebindu bindi biosi ebiobukusi. Yakhaleke Libia nende Kushi.

⁴⁴ Nebutswa amang'ana okhurula ebukwe nende esinyolu kakhamutechesie, ne yakhalwane nelirima lilulu niyeera abandu abenji.

⁴⁵ Kata khandi yakhombokhe amaheemake koburuchi hakari weinyanza nende esikulu esitsienukhu esiombokhwakhwo Ehekalu. Nebutswa yakhafwe omundu wosi owokhumukhonya naralikhwoho tawe.”