BAHEBURANIA 1 - EBAIBO INZIENUKHU

Ling'ana lia Nyasaye okhubir'ra mu Mwanawe

¹ M'matukhu kakhale, Nyasaye hali khenji khandi munjila tsindi netsindi, yabool'lana nabakuka befwe okhubir'ra mubaroobi,

² nebutswa mumatukhu kokhumal'likha kano abool'lane n'nefwe okhubir'ra mu Mwanawe. Nyasaye yamwahula mbu abe mwene ebindu biosi khandi nalonga esibala siosi okhubir'ra muye.

³ Ye niye okhwakha khwene khwoluyali lwa Nyasaye, khandi niye likondo liene eliokhufwana khwa Nyasaye achinganga nalinda ebindu biosi khulwe ling'ana lilie eliobunyali. Ne olwa yali namal'le okhulekhela abandu tsimbi tsiabwe, yekhala mwikulu khumukhono musaatsa kwa Nyasaye, wo Bunyali Obukhongo.

Obukhongo obwo Mwana wa Nyasaye

⁴ Omwana yakholwa omukhongo muno okhubira abamalaika, singa obweliira elia Nyasaye yamukulikha nelikhongo okhuyomba amera kabwe.

⁵ Okhuba Nyasaye siyabool'lakhwo om'malaika uwe wosi mbu, “Niwe omwana wanje, leelo ngwiye Papa uwo tawe.” Khandi mbu, “Ndaba Papa uwe naye alaba Omwana wanje.”

⁶ Nebutswa olwa Nyasaye yenya okhuruma omwanawe owokhuranga musibala, yaboola mbu, “Abamalaika bosi ba Nyasaye bamwekayakaye.”

⁷ Ne khukabamalaika yaboola mbu, “Nyasaye akholanga abamalaika baabe okhuba emiyeka. Nabarumikhili baabe okhuba tsimemo tiomul'lo.”

⁸ Nebutswa khuko Mwana yaboola mbu, “E Nyasaye, oburuchibwo bubetsangaho inziayo! Orukanga abandubo mubwatooto.

⁹ Ibe oyanzanga obulunji ne obihil'lwa obubi. Niko akachila Nyasaye, oli Nyasayewo ukhwahuye ibe, ma ukhuheeye obusangali bwoluyali okhuyomba abasio.”

¹⁰ Khandi yaboola mbu, “Nawe Omwami niwe owalomba esibala mukhuchiaka, khandi namakhonoko omwene wali okhulomba likulu.

¹¹ Yibio biosi biakhahwe nebutswa ibe wakhamenye inziayo. Yibio biosi biakhakhunguhe singa tsingubo.

¹² Olabifumba singa ekanzo, ne bilakalukhanibwa singa ingubo. Nebutswa ibe obetsangaho khasotso, kata emihika chichio sichilihwa tawe.”

¹³ Nyasaye siyabool'lakhwo Om'malaika wosi, “Yikhala hamukhono kwanje omusaatsa okhwola olwa ndakhare abasukubo hasi webilenjebio tawe.”

¹⁴ Kho abamalaika nemioyo echirumikhanga, aba Nyasaye arumanga okhukhonya yabo abakhanyoole obuhonia.