BAEFESO 6 - EBAIBO INZIENUKHU

Obwa abaana nende abebuli babwe bakwana okhumenya halala

¹ Abaana, muhulile abebuli benywe mu Mwami okhuba yili neling'ana lilahi okhulikhola.

² “Helesinjia papawo nende mamawo oluyali” nilio lilako liokhuranga elili nende liusubisio:

³ “Kho obe nol'lahi mumang'ana ko kosi, khandi olamenya oluhono musibala.”

⁴ Nenywe abebuli murachema abaana benywe oburima tawe. Harali mubalele nimubebaal'la nokhubachetsiyia singa Omukristo akwan'ne okhukhola.

Obwa abahambe nabaami babwe bakwana okhumenya

⁵ Inywe abahambe, mubahul'lenje nokhuria nokhutechela yabo abali abaami benywe musibala muno. Mukhole mbwo musilongole esiomwoyo singa abarumikhilanga Kristo.

⁶ Burabba oburumikhi obwokhulolwa butswa netsimoni khulwa okhubayanzisia tawe, habula murekhwo emioyo okhukhola aka Nyasaye yenya, singa abahambe ba Kristo.

⁷ Rumikhenje nobusakulukhu singa abarumikhila Omwami tawe abandu butswa.

⁸ Mumanye mbu Omwami alahaana omukabwa khumundu wosi omuhambe kata omulakhuule khulwa omulimo omulahi okwakholanga.

⁹ Nenywe, abaami, mubakhol'le singa mbwo yabo abali abahambe benywe ne murakharumikhila ebirisio tawe. Mwitsul'le mbu nenywe singa bo muli no Mwami mulala mwikulu okhalachilanga abandu bosi obuhelani.

Ebiesingo biosi bia Nyasaye

¹⁰ Eliesihesi, mukufuhale mu Mwami nende munjila yetsingufu tsiobunyalibwe.

¹¹ Mwebiikhe ebiesingo biosi bia Nyasaye kho munyale okhuleka okhubehelesia khwa Setani.

¹² Okhuba sikhulwananga nabandu tawe, habula khulwananga nende amahe kokhwikulu akobubi musibala siomwikulu; noburuchi, nende obunyali, nende abaruchi besibala sino esiesiilima.

¹³ Khulwe yako, mwebiikhe ebiesingo bia Nyasaye luno! Ma olwe litukhu liobubi liola mube abanyala okhuralila olwa omusuku amwinjil'la; ma nimumal'le okhulwana okhwola khusihesi mube nimusili abaralilu.

¹⁴ Kho musinjile buralilu; nimuli nobwatooto, nimwekhakile olukhoba mubisienje bienywe, ne obulunji singa esitsengwa siokhusilifu.

¹⁵ Khandi mubukule obwerechekhu bwenywe okhulandia Amang'ana Amalahi akomulembe singa ebilaro ebia mwebikhanga.

¹⁶ Ne halala nende yaka kosi, mubukule obusubili singa ekuuri, eya munyala okhwesinga khutsisele tsitsiomul'lo etsilaswangwa nende Omubi.

¹⁷ Bukule obuhonia singa esikutu nende ling'ana lia Nyasaye singa olukanga lwo Mwoyo amuhetsanga.

¹⁸ Mukholenje yaka kosi munjila yokhusaaya nimureeba obukhonyi bwa Nyasaye. Musaaye buli lwosi ne nimuba meso mukhwesimilisia nokhusaaya khwosi murafwa omwoyo tawe; musaayile abandu ba Nyasaye bosi.

¹⁹ Khandi nase musaayilekhwo, mbu Nyasaye yambelesie amang'ana olwa mba ninyenya okhuboola, mbu kho mbe nolutswoni niribula amabiso aka Amang'ana Amalahi.

²⁰ Khulwa Amang'ana Amalahi yako, ndi omurumwa, habula luno ndi mububohe. Musaayenge mbu mbe nolutswoni okhul'loma Amang'ana Amalahi singa obwa ngwan'ne okhuboola.

Amasiesi kokhumal'likha

²¹ Tukiko omwana wefwe omuyanzwa khandi omurumikhili omusubilwa mumulimo kwo Mwami alamubool'la amang'ana kanje kosi mumanye singa obwa nzilil'langa.

²² Ndamurumile khwinywe khulwe esifune yisi mbu amubool'le obwa khutsilil'langa fwesi, khandi amatinyilisie emioyo chienywe.

²³ Nyasaye Papa nende Mwami Yesu Kristo bahaane omulembe nobuyanzi halala nobusubili khubasubili bosi.

²⁴ Esirenda sia Nyasaye sibe halala nabandu bosi abayanzanga Omwami wefwe Yesu Kristo, nobuyanzi oburasimanga tawe.