BAEFESO 4 - EBAIBO INZIENUKHU

Obulala bwa bakristo m'mubili kwa Kristo

¹ Kho Ise oli omubohe khulwo okhurumikhila Omwami, musaayanga okhumenya obulamu obukwan'ne okhulondokhana nokhulangwa khwenywe okhwa mwalanjilwa.

² Mubetsenge abokhwetutuyia, abahoma, nokhwesimilisia. Mumanyie obuyanzi bwenywe khulwo khwefwil'lana abene khubene.

³ Mukhole esinani okhulinda obulala obwo Mwoyo ahaananga munjila yomulembe okumubohanga halala.

⁴ Kuliho omubili mulala, khandi Omwoyo mulala, singa obwa mwalangwa mukhunaya khulala okhwa Nyasaye yamulanga inywe.

⁵ Aliho Omwami mulala obusubili bulala, obubaputisi bulala;

⁶ aliho Nyasaye mulala khandi Papa wabandu bosi, oli Omwami ikulu khubosi, akholanga emilimo mu bosi ma amenyanga mubosi.

⁷ Buli mulala khwifwe wahebwa esirenda okhuhelana nesichelo siesihanwa sia Kristo yali okhuhana.

⁸ Singa Amahandiko kaboolanga, “Olwa yanichila natsia ikulu okhusila, yatsia nende abahambe abenji; nahelesia abandu ebihanwa.”

⁹ Ne ling'ana yili, mbu “Yanichila ikulu” liboolanga sina? Liboolanga mbu olwokhuranga yali niyekha khusibala hasi bwene.

¹⁰ Kho mulala mwene uyo owekha khandi niye omwene uyo owanichila ikulu muno okhuyomba likulu liosi, yetsusie obulongi bwosi nokhubaho khukhwe.

¹¹ Niye owaha abandu ebihanwa: Abalala yabakhola abarumwa, abandi okhuba abaroobi, abandi okhuba abalandia nabandi okhuba abakambi ba Mang'ana Amalahi, nende abebaali.

¹² Yakhola mbwo okhurechekha abandu ba Nyasaye khulwe emilimo chioburumikhi Bwesikristo kho bombokhe omubili kwa Kristo.

¹³ Ma kho fwesi khulahambana halala khubulala yibwo mubusubili bwefwe nende mubumanyi bwefwe obwo Mwana wa Nyasaye; ma khulaba abandu abakhul'le, okhwola khuburambi bwokhuhela okhwitsula khwa Kristo.

¹⁴ Ma sikhulaba abaana abatoro khandi tawe, abatutwa iyi nibayilwa hosi hosi nende omuyeka kwamebaalo akabandu ababehi, abachemelanga abandi nibenjila mubukaati nobubehi bwokhukosia.

¹⁵ Nebutswa khulwo okhuboola obwatooto mubuyanzi, okhwola khukhula musieinjila yosi mu Kristo, ouli niye omurwe.

¹⁶ Okhurula khubukhongo bwe, ebitonye biosi bionganibwa ne omubili kwosi nikuhambanibwa halala bulahi khulwo obukhonyi bwa buli obwonjelo. Kho olwa buli esitonye sikholanga emilimo singa kakwan'ne, omubili kwosi kukhulanga.

Obulamu obuyia mu Kristo

¹⁷ Kho, muliira lio Mwami muchetsiyianga: Muratsitsachil'la okhumenya singa abarasubilanga khandi tawe, abamapaalo kabwe kali akabutswa,

¹⁸ ne amakani kabwe kali musiilima. Beyakukha khubulamu bwa Nyasaye, khulwo obusilu obuli mumioyo chiabwe emiomu.

¹⁹ Sibasimba emirwe khu amabi kabakholanga tawe; behaananga abene okhukhola obusoti, nibalangukhila okhukhola esifwabwi sietsimbi tsiosi sila okhwekaya.

²⁰ Yako sikali niko akamweka khu Kristo tawe!

²¹ Kali kol'lani mbu mwahul'la amang'anake khandi singa abalondi baabe mwebaal'lwa akatooto akali mu Yesu.

²² Kho mulekhe ifwo yenywe ya khale, eyachila nimumenya singa mwalinji – ifwo ikhulu yakhale iyo eyamalwanga khulwa obwekombi bwokhukaatwa khwayo.

²³ Mukholwe abayia mumakani nende mumioyo chienywe.

²⁴ Okhwola mwebiikhe liiba liyia elialongwa mukhufwana khwa Nyasaye niyebisula mubulamu bwatooto obuli obulunji khandi obutsienukhu.

²⁵ Khulwe yako mulekhe obubehi. Buli omundu abool'le owasie akatooto, sichila siamulala khwifwe nesiimo siomubili kwa Kristo.

²⁶ Nimuba nimusinyikha, muralekha lirima lienywe limukhole okhukhola tsimbi tawe. Kata murasinyikha litukhu liosi tawe.

²⁷ Muralekhela Setani obweyangu tawe.

²⁸ Uyo owali niyebanga, areba khandi tawe, habula akhola emilimo namakhonoke, mbu anyoole omukabwa kwokhumenya okhulahi ma abe onyala okhukhonya uyo oli omutakha.

²⁹ Amal'lomo amabi kararula m'minwa chienywe, harali akali amalahi akokhwombokha nikabaler'ra akakwan'ne, kho aka muboola kakhonye yabo abakahulilanga.

³⁰ Murabeelesia Omwoyo Omutsienukhu wa Nyasaye tawe; okhuba Omwoyo uyo nesimanyilo sia Nyasaye khwinywe singa esihambilo khwitukhu liokhuhonibwa khwokhumal'likha.

³¹ Kho mulekhe obululu bwosi, nobwekombi, noburima, neliyoka, nobuchiikhi namanyeko, ne amakani kobusuku bwosi karabbaho khandi tawe.

³² Mube abemioyo emilahi echiokhubel'lana tsimbabasi abene khubene, ma mubel'lanenge abene khubene singa Nyasaye yamubeela tsimbabasi mu Kristo.