AYUBU 2 - EBAIBO INZIENUKHU

Setani yateema Ayubu olwakhabili

¹ Olwa bamalaika ba Nyasaye beetsa okhwelolesia imbeli wo MWAMI litukhu lindi, Setani naye khandi yeetsela mubo.

² OMWAMI nareeba Setani mbu, “Orul'le hena?” Setani nakalusia OMWAMI naboola mbu, “Rula okhulambuula esibala y'yi nokhuchenda khusio siosi.”

³ OMWAMI namureeba mbu, “Wahengelesisiekhwo omurumikhili wanje Ayubu? Abulaho omundu wosi khusibala siosi ofwana singa ye. Nomundu omulunji khandi orali nesikha. Yandekayakayanga ise narakhola obubi bwosi tawe. Asilinji butswa omusubilwa singa obwa yalinji kata olwa wanzuuba okhumusuula sila esifune.”

⁴ Setani nakalusia OMWAMI naboola mbu, “Tila khumubilikwe! Omundu alakusia biosi biali n'nabio khulwokhutsilil'la okhuba mwoyo.

⁵ Nebutswa luno noba niwakhasalisia omubilikwe ye alakhunyeka habulafu.”

⁶ Kho OMWAMI nabool'la Setani mbu, “Lola, ali mubunyali bwo, nebutswa oramwira tawe.”

⁷ Setani yamala arule imbeli wo OMWAMI ma nakhola omubili kwa Ayubu kwosi okhusimbakhwo amabondo okhurula khus'sisilo okhwola khulwotosi.

⁸ Ayubu yamala nabukula esikonjio khulwo khweyakila m'mabondo kaake ma niyekhala mwikokhe.

⁹ Kho omukhasiwe namubool'la “Osilinji butswa nobusubilwa bubwo? Busina oranyeka Nyasaye ma ofwe?”

¹⁰ Nebutswa Ayubu yamukalusia naboola, “Ol'lomanga butswa singa mulala khubakhasi abahingwa. Busina khuhuchil'lenje amalahi konyene okhurula khu Nyasaye, nikhurahuchil'lakhwo nende amabi okhurula khuye?” Mumanyakhano yako kosi Ayubu siyaboolakhwo ling'ana liosi liibi khu Nyasaye tawe.

Abalina ba Ayubu betsa khuye

¹¹ Ne olwa abalina ba Ayubu bataru bahul'la khumabi kosi akali nikamukwiliiye, beetsa buli mundu okhurula ingowe. Nabo bali Elifasi okhurula mwitookho lia Temani, Bilidadi okhurula musibala sia Shuha nende Sofari okhurula musibala sia Naama. Bali okhulakana okhutsia okhuhotselesia Ayubu nokhumulemia omwoyo.

¹² Olwa bali nibasilikhwo ehale balola Ayubu nebutswa sibamumanyilisia tawe. Ne olwa bamanyilisia mbu niye, bachaaka okhukhupa etsikhwisi nibalakaya. Khandi barandula tsingubo tsiabwe khulwe esibeela niboha olukhuukhi mwikulu nende khumirwe tsiabwe.

¹³ Kho bekhala n'naye mulukuukhi oluhono lwamatukhu kane nakataru om'basu nobutukhu. Omundu wosi siyaralakhwo esindu khuye tawe, sichila balola nali mukhutsunwa okhukali okhusila.