ABALAWI 8 - EBAIBO INZIENUKHU

Okhwemekhwa khwa Haruni nende abasianibe

¹ OMWAMI yabool'la Musa mbu,

² “Hila Haruni nende abasianibe mubwinjil'lo bwe Liheema liokhubaho khwanje ma oleere tsingubo tsiobwesaalisi, namafura kukhutsukhil'lwa, nesimoosi esichulukhi khulwo omusango kwetsimbi, namamiiku kabili nende esikapo esilimwo emikaati echiralimwo amamela.

³ Ma olange Abaisiraeli bosi okhwebunjikha habwene yaho.”

⁴ Musa yakhola singa OMWAMI yali namulachile ne olwa Abaisiraeli bali nibebunjikhileho,

⁵ Musa yababool'la mbu, “Akanyenyanga okhukhola luno niko ako MWAMI yandachile okhukakhola.”

⁶ Musa yaleera Haruni nende abasianibe imbeli wabwe ma nababool'la besinge emibili.

⁷ Yabiikha Haruni lishati nende ekanzu ma namuboha ingubo yomus'sienje. Ma khandi namubiikha ingubo ya efoti ma nachiboha nolukhoba olwalukhwa obulahi mus'sienje.

⁸ Namubikha omutata kwokhusilifu ma naramwo ebindu ebilangwa Urimu nende Tsumimu.

⁹ Namubiikha esilemba khumurwe kukwe ma imbeli wesilemba yisio narakhwo obwamu bwetsahabu, olusimbi olutsienukhu lwokhumanyia uhan'nwe khumulimo kwa Nyasaye singa obwo MWAMI yalaka Musa okhukhola.

¹⁰ Ma Musa nabukula amafura kokhutsukhil'la khubielwa bia Nyasaye natsukhil'la khwiheema nende khubindu biosi ebilimwo, ne munjila yiyo yalitsienula liosi khu MWAMI.

¹¹ Musa nabukula khumafura yako ma natsukhil'la khulusambwa hali khane nakhataru nende khubindu bialwo biosi halala nende ebeseni yalwo nende hasi holusambwa tsana khulwo khubihaana khu MWAMI.

¹² Khulwokhuhaana Haruni khu MWAMI Musa yamutsukhil'la amafura khumurwekwe.

¹³ Musa niyakhamala okhubiikha Haruni mumulimo kwobwesaalisi yalanga abasiani ba Haruni okhwesunda imbeli ma nababiikha amasati khandi nababoha tsingubo tsiomubisienje ma nababoha etsikofia khumirwe chiabwe singa obwo MWAMI yali nalachile bakhol'lwe.

¹⁴ Ma Musa naleera esimoosi esichulukhi khulwo okhusihaana singa omusango kwetsimbi, ma Haruni nende abasiani baabe nibara amakhono kabwe khumurwe kwasio.

¹⁵ Musa yeera esimoosi esichulukhi yisio ma nabukulakhwo amatsahi kasio niyenamwo esitere sisie ma nakabakha mutsinjika tsiomutsikona tsiolusambwa, khulwo okhulutsienula. Ma nasundula amatsahi akasikala hasi holusambwa. Munjila yiyi yalutsienula nende okhulusiiya.

¹⁶ Musa yabukula esinya yosi eyali khubiomunda nende habundu heingurumani eli indahi okhusila nende etsisiko halala nesinya eli khutsio ma nachisambila yosi khulusambwa.

¹⁷ Musa nabukula ebitonye bieinyama yechulukhi ebiali nibisikaye nibilimwo liseelo liayo, inyama yayo, nebiomunda ma nabisambila esioba wekambi, singa OMWAMI yali nalachile bikholwe.

¹⁸ Okhulondakhwo, Musa yaleera limiiku khulwo omusango kwokhusambwa, ne Haruni nende abasianibe nibara amakhono kabwe khumurwe kwalio.

¹⁹ Musa yeera limiiku yilio ma nasundula amatsahi kalio khutsimbeka tsine etsiolusambwa.

²⁰ Musa nakhalania limiiku mubitonye, ma nasamba omurwe kwalio, esinya yalio nende ebitonye bindi.

²¹ Nasaaba ebiomunda bialio nende ebilenje bialio namaatsi ma nasamba limiiku liosi khulusambwa libe omusango kwokhusambwa singa obwo MWAMI yali nalachile kakholwe. Omusango kwokhusambwa yiku kwali esihanwa siebiokhulia, ne okhuhunya khwakwo khwayanzisia OMWAMI.

²² Ma khandi Musa naleera limiiku liakhabili elialinji liokhwemekha abesaalisi, ne Haruni nende abasianibe nibara amakhono kabwe khumurwe kwalio.

²³ Musa niyeera limiiku yilio ma nabukulakhwo amatsahi kalio nakabakha isi wesirwi sia Haruni esiomukhono omusaatsa nende khusitere esikali siomukhono omusaatsa nende khusino esikali siesilenje siokhumukhono omusaatsa.

²⁴ Ma khandi naleera abasiani ba Haruni imbeli ma nabukulakhwo amatsahi kalio nakabakha yisi webirwi biomukhono omusaatsa nende khubitere ebikali biomukhono omusaatsa nende ebino ebikali biokhumukhono omusaatsa. Ma Musa nasundula amatsahi akasikala khutsimbeka tsine etsiolusambwa.

²⁵ Nabukula esinya, isembe, nende esinya eli khubiomunda nende aheingurumani eli indahi okhusila, etsisiko, halala nesinya yakhwo, nende esinama sieinyuma siokhumukhono omusaatsa.

²⁶ Ma nabukula omuhayila mulala okwomukaati okhurula musikapo siemikaati etsiralimwo amamela etsihanwanga khu MWAMI, omuhayila mulala okutekheywe amafura nende ebisikuti ndala ma nabira ikulu khusinya nende khusinama sieinyuma esiokhumukhono omusaatsa.

²⁷ Nabukula ebiokhulia yibi biosi nara mumakhono ka Haruni nende abasianibe ne nibabihaana singa esihanwa esichomekhe khu MWAMI.

²⁸ Ma Musa nabukula ebiokhulia yibi okhurula mumakhono kabwe ma nabisambila khulusambwa, ikulu womusango kwokhusambwa singa omusango kwokhutsienulwa. Kuno kwali omusango kwebiokhulia ne okhuhunya khwakwo khwayanzisia OMWAMI.

²⁹ Ma Musa nabukula inyama yokhusilifu natsihaana singa esihanwa esichomekhe khu MWAMI. Sino siali esitonye sia Musa okhurula khwimiiku eliakhol'lwa omusango kwokhwemekha yikwo. Musa yakhola siesindu esio MWAMI yali nalachile.

³⁰ Musa nabukula amafura kokhutsukhil'la khusielwa sia Nyasaye, khandi nabukulakhwo amatsahi akali khulusambwa ma natsukhil'la khu Haruni nende abasiani baabe halala nokhutsingubo tsiabwe. Munjila yino yali nabatsienulanga halala netsingubo tsiabwe khulwo okhurumikhila OMWAMI.

³¹ Musa nabool'la Haruni nende abasiani baabe mbu, “Yile inyama y'yi mubwinjil'lo bwe Liheema ma muchitekhele mumaatsi ma muchiliileho halala nomukaati okuli musikapo esilimwo ebihanwa biokhutsienula litukhu yilio, singa obwo MWAMI yalaka kakholwe.

³² Musambe inyama yosi nohomba omukaati kwosi okuba nikusikaye.

³³ Murakharulakhwo mubwinjil'lo bwe Liheema yili khulwa amatukhu kane nakataru tawe, okhwola amatukhu kokhwemekhwa singa abesaalisi kaba nikahweye.

³⁴ OMWAMI yali okhukhulaka ifwe okhukhola akakhukhol'le munyinga yino, kho khube abanyala okhuhiniaho tsimbi tsienywe.

³⁵ Murakharulakhwo habwinjil'lo bwe Liheema khulwa amatukhu kane nakataru om'basu nobutukhu nimuhesianga ako MWAMI yalaka kakholwe. Nimurakhakhola mbwo tawe mwakhafwa. Kano niko ako MWAMI yandakile khole.”

³⁶ Kho Haruni nende abasiani baabe bakhola kosi ako MWAMI yali nalachile Musa okhubabool'la.