ABALAWI 3 - EBAIBO INZIENUKHU

Emisango chiobuhambani

¹ Omundu wosi niyakhahaana khu MWAMI ndala khutsing'ombe tsitsie singa omusango kwobuhambani okhwola ebe echulukhi nohomba etwasi eralikhwo nobulema bwosi tawe.

² Omundu uyo are omukhono kukwe omusaatsa khumurwe kwayo, ma atsiir're habwinjil'lo bwe Liheema liokhubaho khwo MWAMI. Abesaalisi banyul'lusie amatsahi kayo khutsimbeka tsiosi etsiolusambwa

³ ma bahaane ebitonye bieing'ombe bino singa ebiokhulia ebihanwanga khu MWAMI: esinya yosi eli khubiomunda,

⁴ etsisiko tsibili nende esinya eli khutsio, ma nende habundu aheingurumani eli indali okhusila.

⁵ Abesaalisi balasamba yibi biosi khulusambwa halala nemisango chiokhusambwa. Okhuhunya khwebiokhulia ebihanwanga yibi khuyanzisianga OMWAMI.

⁶ Likondi nohomba imbusi nerumikhilwa singa omusango kwobuhambani, okhwola libe lisaatsa nohomba likhasi, nebutswa lirabakhwo nobulema bwosi tawe.

⁷ Omundu niyakhahaana likondi singa omusango khu MWAMI,

⁸ okhwola are omukhono kukwe omusaatsa khumurwe kwalio ma aliir're imbeli we Liheema. Abesaalisi betsa okhusundula amatsahi kalio khutsimbeka tsine tsiolusambwa

⁹ ma bahaane ebitonye bielikondi bino singa ebiokhulia ebihanwanga khu MWAMI: esinya, isembe nekhalachiywe ahembi khumukongo, esinya yosi eli khubiomunda,

¹⁰ etsisiko tsibili nende esinya eli khutsio, nende aheingurumani eli indahi okhusila.

¹¹ Omwesaalisi orumikhanga olwene yilwo asambe yibi biosi khulusambwa singa ebiokhulia ebihanwanga khu MWAMI.

¹² Omundu naba nahaana imbusi singa omusango, khu MWAMI,

¹³ okhwola abiikhe omukhono kukwe omusaatsa khumurwe kwayo ma atsiir're imbeli we Liheema. Abesaalisi balasundula amatsahi kayo khutsimbeka tsiosi etsiolusambwa

¹⁴ ma bahaane ebitonye bieimbusi bino singa ebiokhulia ebihanwanga khu MWAMI: esinya yosi eli khubiomunda,

¹⁵ etsisiko tsibili nende esinya yatsio ma nende aheingurumani eli indahi okhusila.

¹⁶ Omwesaalisi alasamba yibi biosi khulusambwa singa esihanwa siebiokhulia ebiyanzisianga OMWAMI. Esinya yosi neyo MWAMI.

¹⁷ Omuisiraeli wosi araliakhwo esinya nohomba amatsahi tawe; yili nelilako elia Abaisiraeli bakwana okhulinda amatukhu kosi habundu hosi habamenyele.