ABALAWI 26 - EBAIBO INZIENUKHU

Tsikhabi khulwo okhuhulila Nyasaye

¹ OMWAMI yaboola mbu, “Muralomba ebiniini kata murasinjisia ebiniini ebiabaatswa, nohomba etsisiilo, nohomba amachina amabaatse khulwo okhubiekayakaye tawe. Ise nise OMWAMI Nyasaye wenywe.

² Mwitsul'le okhukhola amasabo kemilukha chiedini ma muhaane oluyali habundu aha ndekayakayilwanga. Nise OMWAMI.

³ “Nimwakhamenya nimulondanga amalako kanje ne nimukhola akamubool'langa,

⁴ naamurumile ifula munyinga indahi kho mbu liloba liaame ebiamo ne emisaala chiaame amatunde.

⁵ Ebiamo bienywe biakhabe ebinji okhusila mbu mwakhatsilil'le okhubichesa kata munyinga yokhunoka emisabibu khandi namutsilil'le okhunoka emisabibu munyinga yokhuchesa obuswache. Namube nende biosi ebia mutakhanga okhulia, ma namumenye mumulembe musibala sienywe.

⁶ “Namuler're omulembe musibala sienywe, ne namukonenje sila okhuria omundu wosi. Nambinie musibala sienywe etsisolo tsimbalaba ne obulwanisinabubemwo khandi tawe.

⁷ Namulekenje abasuku benywe khasotso;

⁸ barano khwinywe nababe abanyala okhuleka abandu emia ndala, ne emia ndala khwinywe nababe abanyala okhuleka abandu etsielefu likhumi; khandi namulekenje abasuku benywe bosi.

⁹ Namulaamile ikhabi ma namuhe abaana abenji; nambesie indakano yanje eya ndalomba n'nenywe.

¹⁰ Ebichese bienywe nabibe ebinji okhusila mbu nabimalenje omuhika mulala, kata olwene yilwo namufubenje ebia nabibetsenje nibisikaye mwichesa likhulu kho munyoole obweyangu ahokhura ebichese ebihia.

¹¹ Namenyenje n'nenywe mwiheema lianje litsienukhu; ne sinarulekhwo khwinywe tawe.

¹² Nambetsenje n'nenywe; nambetsenje Nyasaye wenywe, nenywe namubetsenje abandu banje.

¹³ Ise, OMWAMI Nyasaye wenywe ndamuhinia Emisiri mbu muratsilil'la okhuba abasumba khandi tawe. Ndafunaka obunyali obwali nibwamura hasi ma nimutikulusia emirwe nimuchenda nimukhulumamile.”

Esinyasio khulwokhukhol'la Nyasaye esikala marwi

¹⁴ OMWAMI yaboola mbu, “Nimuralonda amalako kanje, namunyoole esinyasio.

¹⁵ Nimuba nimusuula okhulonda amalako kanje nende amang'ana kanje ma nimufunaka indakano eya ndalomba n'nenywe,

¹⁶ namuhelesie esinyasio. Namuleer're likhupako; namuleer're obulwaye oburali neindesi nende emirengo etsia natsimukhole ababofu ma obulamu bwenywe nabuhwelel'le. Namuraake imwo yenywe nebutswa sinemukhonye tawe sichila abasuku benywe nabalie ebia namube nimukhusisie.

¹⁷ Namukhupe omukongo ma namulekwe, ne yabo abali abasuku benywe nabamwamihe; namube neindenga ingali mbu namwilukhe olwo omundu wosi aramulondel'langa.

¹⁸ “Ne kata inyuma weyaka kosi nimuba nimurakhalonda amalako kanje, nameete okhukaliyia esinyasio sienywe okhuba hali khane nakhataru.

¹⁹ Nangalusia hasi omwekhonyo kwenywe; ifula sinekwekhwo tawe, ne esibala sienywe nasibe esiomu khandi esitinyu kakak'ka singa lichina.

²⁰ Emilimo echiamutiyanga butinyu sinachimukhonye tawe, sichila emikunda chienywe sinachiame ebiamo kata emisaala sinachiame amatunde tawe.

²¹ “Nimuba nimutsilil'la okhuufukula ise nimusuula okhulonda amalako kanje, khandi nameete okhukaliyia esinyasio sienywe hali khane nakhataru.

²² Namurumile etsisolo tsimbalaba, natsio natsire abaana benywe, natsimume tsing'ombe tsienywe ma natsilekhe batititi khwinywe kata tsinjila tsienywe sinatsichendwekhwo tawe.

²³ “Ne nikakhaba mbu inyuma wokhumukhol'la yaka kosi mulatsilil'la okhusuula okhumbulila, ne nimunjaaya,

²⁴ kho namukhupe omukongo ma namuhe esinyasio esitinyu hali khane nakhataru okhubira esiokhuranga.

²⁵ Narume obulwani khwinywe okhumuhelesia esinyasio khulwo okhufunaka indakano yanje n'nenywe, ne nimwakhebunjikha mumatookho okhwehonokosia, namurumile obulwaye oburahonanga, nenywe nakamuhachie okhuchinga amakhono nimwehaana khubasuku benywe.

²⁶ Nanditiyie ebiokhulia ebiamunyoolanga kho mbu obusuma obuhela butswa khubeinyumba ndala nabulachilwenje nende abetsinyumba likhumi. Nabukabulanibwe khusiamulala khwinywe ne kata olwa namubetsenje nimumal'le okhubulia bwosi, namubetsenje nimusili neinzala.

²⁷ “Ne nikakhaba mbu inyuma we yaka kosi mulatsilil'la okhunjaaya nimusuula okhulonda amalako kanje,

²⁸ kho mwirima lianje namusukhane ma nameete okhukaliyia esinyasio sienywe hali khane nakhataru okhubakhwo esibi okhuyomba ebiokhuranga.

²⁹ Inzala yenywe nebe ingali okhusila ma kata namulie abaana benywe bene.

³⁰ Nandikulile habundu henywe ahamwekayakayilanga khubikulu, nasambule tsisambwa tsienywe tsiobwali, ma nafuube emilambo chienywe khubiniini bienywe ebiakwa. Musibeela esikali

³¹ nakhole amatookho kenywe nakakwe likunda, namulule obwekayakayilo bwenywe, ne nasuule okhuhuchil'la emisango chienywe.

³² Namume esibala sienywe okhusila ma kata abasuku aba nabamenye musio nabachenye olwa nabalole okhumumwa yikhwo.

³³ Nandeere obulwani khwinywe ma namusalanie mubibala biebucheni. Esibala sienywe nasilekhwe sila omundu ne amatookho kenywe nakakwe amakunda.

³⁴ Ma liloba nalinyoole abuhuluukhi olwa nalibe nilikoneye olwa nenywe namube nimuli musibala siabasuku benywe.

³⁵ Ne oluhono lwosi olwa nalibe nilikoneye nalinyoole obuhuulukhu obwa murakhachiheye emihika eminji.

³⁶ “Narimule ikholo ye yabo khwinywe abali mubuhambe mbu kata okhutechela khwelisafu mubusindu nakhumwilusie. Namwilukhe ol'la abalondel'lwanga mwihe, ne namukwe hasi olwa omusuku arali ahembi.

³⁷ Namwesikar're omundu khuwasie nimwilukhanga mwihe olwa omundu aramulondel'langa, ne sinamunyale okhulwana omusuku wosi tawe.

³⁸ Namufwile mubuhambe, namumilwe nesibala siabasuku benywe.

³⁹ Bati khwinywe aba nabahonokokhe musibala siabasuku benywe nabahwetsekhel'le khulwe tsimbi tsiabwe abene nende tsimbi tsiabakuka benywe.

⁴⁰ “Nebutswa abolwibulo lwenywe nabeyame tsimbi tsiabwe nende tsimbi tsiabakuka babwe, abali okhufukula ise ma nibakhol'la indiri,

⁴¹ nibachila nimbakhupa omukongo ma nimbahila mubuhambe musibala siabasuku babwe. Mukhumalila, olwa abolwibulo lwenywe nababe nibetutuyisie ma nibanyooye esinyasio khulwe tsimbi tsiabwe nende indiri yabwe,

⁴² nanzitsul'le indakano yanje nende Yakobo, na Isaka nende Aburahamu, khandi nanzienule esiesuho sianje okhuha abandu banje esibala.

⁴³ Ne okhuranga, okhwola esibala tsana sihinibwemwo abandu basio, kho sinyoole obuhuulukhi bwasio obwa kupu, ne okhwola banyoole esinyasio khulwo okhusuula amalako kanje nende amang'ana kanje.

⁴⁴ Nebutswa kata mbwo, olwa basili musibala siabasuku babwe, sinambakhupe omukongo kupu nohomba okhubamuma tawe. Yako kanyala okhuleera esihesi khu indakano yanje, ne nise OMWAMI Nyasaye wabwe.

⁴⁵ Nanzienule indakano eya ndakhola nabakuka babwe olwa ndamanyia obunyali bwanje khumahanga kosi khulwa okhuhiinia abandu banje okhurula Emisiri, kho mbu, Ise OMWAMI mbe Nyasaye wabwe.”

⁴⁶ Yaka kosi namalako nende amang'ana ako MWAMI yahelesia Musa nali khusikulu sia Sinai khulwokhukahaana khubandu ba Isiraeli.