ABALAWI 21 - EBAIBO INZIENUKHU

Abesaalisi okhwola babe abatsienukhu

¹ OMWAMI yalaka Musa abool'le abesaalisi mbu, “Omwesaalisi wosi arekhola owomusilo khulwokhutsia mumasika olwomwikhowe aba nafwiye tawe,

² fwana abe nali nyina, samwana, omwanawe omusiani nohomba omukhaana, amwabowe,

³ nohomba mbotso nyene osili okhuteesibwa ma omenyanga n'naye munyumba ndala.

⁴ Arekhola owomusilo khulwa amasika keyabo abali abekhobe khulwomukhasiwe tawe.

⁵ “Omwesaalisi wosi areebeka olwale, nohomba okhubeka tsindefu nohomba kata okhwesalaka khumubili kukwe okhumanyia mbu ali musibeela siokhufwilwa tawe.

⁶ Okhwola abe omutsienukhu khandi araleera es'simba murwe khuliira lianje tawe. Ye ahaananga emisango chiebiokhulia khu ise kho okhwola abe omutsienukhu.

⁷ Omwesaalisi arateesiakhwo omukhasi owalinji omusambale nohomba orali omuchima nohomba kata owakhungwa khumusaatsa tawe; ye nomutsienukhu.

⁸ Okhwola abandu babale omwesaalisi okhuba omutsienukhu sichila ahaananga emisango chiebiokhulia khu ise. Ise nise OMWAMI; ndi omutsienukhu khandi nzienulanga abandu banje.

⁹ Omukhaana womwesaalisi niyakhakwa omusambale, aleeranga es'simba murwe khusamwana, okhwola asambwe m'mul'lo ma yerwe.

¹⁰ “Omwesaalisi Omukhongo watsukhilil'lwa khumurwekwe amafura kokhutsienulwa khandi owatsienulwa okhwebiikha tsingubo tsiobwesaalisi, kho aralekha liswi lilie limanyukhe sila okhulichanula nohomba okhurandula tsingubo tsitsie okhumanyia mbu ali musibeela siokhufwilwa tawe.

¹¹ Arenjilakhwo ahomufu ali tawe, kata arekholakhwo owomusilo khulwo okhufwa khwasamwana nohomba nyina tawe.

¹² Kata ararulakhwo mwiheema lio MWAMI litsienukhu tawe, sichila wamala okhutsienulwa khulwokhubakhwa amafura ko MWAMI. Ise nise OMWAMI.

¹³ Alateesia butswa omukhaana osili omuchima,

¹⁴ tawe omukhasi omulekhwa nohomba owakhungwa khumusaatsa nohomba kata owalinji omusambale. Ateesie butswa omukhaana omuchima owomulwibulo lwabwe.

¹⁵ Nikarali mbwo, abaanabe, abakwananga okhuba abatsienukhu balaba abomusilo. Ise nise OMWAMI ne mal'le okhumutsienula abe Omwesaalisi Omukhongo.”

¹⁶ OMWAMI yalaka Musa

¹⁷ abool'le Haruni mbu, “Omundu wosi khubolwibulo lulwo owalema aramban'nakhwo omusango kwebiokhulia tawe. Yaka kalondwe mumatukhu kosi aketsanga.

¹⁸ Omundu wosi olikhwo nobulema bwosi arahanakhwo omusango singa omwesaalisi tawe, mbu: omundu wosi omubofu, omutiecheli, owabetekha nohomba owasiama,

¹⁹ omundu wosi owakhalikha omukhono nohomba esilenje;

²⁰ owesikufu nohomba owakhuunya; wosi owalwala tsimoni nohomba owobuchele, kata owalatwa wosi.

²¹ Omundu wosi mubolwibulolwomwesaalisi Haruni olikhwo nobulema bwosi khumubilikwe aramban'na omusango kwebiokhulia tawe.

²² Omundu singa uyo anyala okhulia ebiokhulia ebihan'nwe singa esihanwa, mbu ebiokhulia biomusango omutsienukhu nende okuli omutsienukhu okhusila khubio,

²³ nebutswa khusifune mbu ali nobulema mumubili kukwe, arakhesundakhwo ahembi khupasia inzienukhu nohomba okhutsia ahembi khulusambwa tawe. Arakhaleera esibi khubindu ebitsienukhu yibi tawe, sichila ise nise OMWAMI ne khandi nise obatsienulanga.”

²⁴ Kho yaka niko aka Musa yabool'la Haruni, abasiani ba Haruni nende abandu ba Isiraeli bosi.