ABALAWI 19 - EBAIBO INZIENUKHU

Amebaalo khukokhurumikhila OMWAMI nende owasio

¹ OMWAMI yabool'la Musa

² mbu abool'le abandu ba Isiraeli mbu, “Mube abatsienukhu sichila Ise OMWAMI Nyasaye wenywe ndi omutsienukhu.

³ Siamulala khwinywe kamuhel'le okhuhaana oluyali khu nyina nende khu samwana, khandi okhwola yetsul'le okhulinda Esabato singa obwa ndalaka. Ise nise OMWAMI Nyasaye wenywe.

⁴ “Murakhaakhupakhwo omukongo nimwekayakaya ebiniini tawe; murelombelakhwo ebiniini biebibia ma mubiekayakaye tawe. Ise nise OMWAMI Nyasaye wenywe.

⁵ “Olwa mwiranga omuruko khulwo omusango kwobuhambani mulonde amalako aka ndamuheye, nase nambuchil'le omusango yikwo.

⁶ Inyama elibwe khwitukhu eliomuruko kwiriywekhwo nohomba khwitukhu elilondakhwo. Inyama yosi esikalanga khwitukhu liakhataru, okhwola esambwe,

⁷ sichila ikwiye eyomusilo, ne omundu wosi niyakhachiliakhwo sindakhachihuchil'la singa omusango tawe.

⁸ Omundu wosi ochilitsanga alaba nesikha ne okhwola anyoole esinyasio khulwo okhubula okhuhaana oluyali khusihanwa esiahulwa khu ise OMWAMI, ne salabalwa singa mulala khubandu banje khandi tawe.

⁹ “Olwa muchesanga emikunda chienywe, murachesa obuswache obuli khutsindulo tsiemikunda chienywe tawe, khandi murakalukha okhuruluma ebisikalanga munyuma tawe.

¹⁰ Murakalukhila mumikunda chienywe chiemisabibu okhuruluma emisabibu echiasikala munyuma nohomba echiakwa hasi tawe; mulekhele abatakha nende abacheni abamenyibwa okhuchitoola. Ise nise OMWAMI Nyasaye wenywe.

¹¹ “Mureeba kata okhubatsa nohomba okhubeha omundu nowasie tawe.

¹² Murarumikhila eliira lianje okhwesuha busiamu tawe; ma khulwako muleere es'simba murwe khuliira lianje. Ise nise OMWAMI Nyasaye wenywe.

¹³ “Muralilil'la omundu wosi kata okhumwibila esindu tawe. Murahanda khumurungo kwomundu owamwahandika kata khulwe litukhu elala tawe.

¹⁴ Muralaka esilaamo siobubi khumundu owekala amarwi nohomba kata okhureka esindu imbeli womubofu okhumwesirasia tawe. Murie ise; sichila Ise nise OMWAMI Nyasaye wenywe.

¹⁵ “Mube omusubilwa khandi musinjile mubwatooto olwa mukhalakanga ling'ana liesiina; murakhola ebiela khumutakha ne nimuria omuhinda tawe.

¹⁶ Muralandia obubehi khumundu wosi tawe, ne olwomundu nalebe aba nateemwanga okhumalwa obulamu, oboole obukobokheli bubwo nikakhaba mbu bunyala okhumusoola. Ise nise OMWAMI.

¹⁷ “Orabikhila omundu wosi lirima, nebutswa mulosanie n'naye oburambane bwenywe kho obule okhukwa mutsimbi khulwa ye.

¹⁸ Oramala es'sialia khumundu wosi kata okhutsilil'la okhumusinyikhila tawe, nebutswa oyanze owasio singa obwa weyanzanga omwene. Ise nise OMWAMI.

¹⁹ “Mulonde amalako kanje. Muraruumia emiruko chiarukwa khumiruko chieimbila yindi tawe. Muraraaka tsimbila tsibili tsieimwo mumukunda mulala tawe. Murebiikha ingubo eyalombwa khutsimbila tsibili tawe.

²⁰ “Omundu naba naheya nomukhaana omusumba, owomusaatsa undi yahamba mbu amuteesie, ne omusaatsa tsana naba nasili okhurunga amapesa kokhumutesia nohomba omusumba uyo naba nasili okhulakhulwa, kho omukhaana omusumba uyo nende omundu owaheya n'naye uyo bahebwe esinyasio. Barerwa tawe sichila omukhaana uyo asili butswa omusumba.

²¹ Omusaatsa uyo alaleera limiiku habwinjil'lo bwe Liheema liokhubaho khwanje singa omusango kwokhuhanwa okhurunga ebirarungwa,

²² ne omwesaalisi alalibukula nalikhol'la omulukha kwokhusiiywa khulwo okhuhiinia tsimbi tsiomundu uyo, ne Nyasaye alamulekhela.

²³ “Olwa namwole musibala sia Kanaani ma musimikhe imbila yosi yomusaala kwelitunde mubale litunde yilwo singa eliomusilo khulwemihika chiokhurunga chitaru. Khumihika yitsio tsiosi murakhaliakhwo litunde yilio tawe.

²⁴ Mumuhika kwakhane amatunde kosi kalatsienulwa khu ise singa omusango khulwo okhunzitsoomia Ise OMWAMI.

²⁵ Nebutswa khumuhika kwakharano, munyala okhulia amatunde. Nimukhola yaka, emisaala chienywe nachiame amatunde amenji. Ise nise OMWAMI Nyasaye wenywe.

²⁶ “Muraliakhwo inyama esilimwo amatsahi tawe. Murakholakhwo obufumu bwosi bwosi tawe.

²⁷ Murabeka liswi khundulo khwomurwe nohomba okhubeka tsindefu

²⁸ nohomba okhwesalaka kata okhwekhalaka omubili khulwo khwekhuula abafu tawe. Ise nise OMWAMI.

²⁹ “Murafwabia abakhaana benywe khulwo okhubakhola abasambale bomuhekalu tawe; nimukhola mbwo namwekayakaye abanyasaye bandi ma esibala nasitsulemwo obusambale.

³⁰ Mwitsul'le okhulinda Esabato ma muhaane oluyali habundu aha ndekayakayilwanga. Ise nise OMWAMI.

³¹ “Muratsia okhurunilisia ling'ana khubandu abareebanga abebitsohela nende abafumu tawe. Nimukhola mbwo mulaba abomusilo. Ise nise OMWAMI Nyasaye wenywe.

³² “Muhaane oluyali khubasakhulu ma mubakoosie. Muurie ise, sichila nise OMWAMI.

³³ “Murasandia abacheni abamenyibwa musibala sienywe tawe.

³⁴ Mubakhol'le singa obwa mwakhakholeye Abaisiraeli basienywe, ma mubayanze singa obwa mweyanzanga abene. Mwitsul'le mbu mwalinji abacheni abamenyibwa musibala sie Misiri. Ise nise OMWAMI Nyasaye wenywe.

³⁵ “Murakaata omundu wosi khulwo okhurumikhila ebichelo biobubehi nohomba echiratili chiobubehi nende obusiro bwobubehi tawe.

³⁶ Murumikhile ebichelo biahabwene nende obusiro bwahabwene. Ise nise OMWAMI Nyasaye wenywe, khandi nise owamuhinia Emisiri.

³⁷ Mufumile amalako kanje nende amebaalo kanje. Ise nise OMWAMI.”