ABALAWI 17 - EBAIBO INZIENUKHU

Obutsienukhu bwamatsahi

¹ OMWAMI yalaka Musa

² mbu ahelesie Haruni nende abasianibe halala nabandu ba Isiraeli bosi amalako kano:

³ Omuisiraeli wosi owakheer'ra habundu hosi ing'ombe, kata likondi nohomba imbusi singa omusango khu MWAMI

⁴ narakher'ra habwinjil'lo bwe Liheema liokhubaho khwo MWAMI, umal'le okhufunaka Lilako. Uratsisie esitsahi ne sanyala okhubalwa singa mulala khubandu ba Nyasaye tawe.

⁵ Esifune sielilako yili sili mbu abandu ba Isiraeli leelo nabaleerenje khu MWAMI emiruko etsiaber'ranga musikuuri. Leelo nabatsileerenje khumwesaalisi habwinjil'lo bwe Liheema ma bachiire singa emisango chiobuhambani.

⁶ Omwesaalisi nasundulenje amatsahi khutsimbeka tsiolusambwa habwinjil'lo bwe Liheema nasamba esinya khulwokhuhaana esuswa ehunyanga bulahi eyokhuyanzisia OMWAMI.

⁷ Abandu ba Isiraeli baratsilil'la okhubula okhuba abasubilwa khu MWAMI khulwo okhwir'ra emiruko chiabwe mubikuuri okhuchihaana singa emisango khubisieno ebifwananga tsimbusi tawe. Abandu ba Isiraeli okhwola balonde amalako yaka amatukhu kosi aketsanga.

⁸ Omuisiraeli wosi nohomba kata omucheni owamenyibwa mubo ohaananga omusango kwokhusambwa nohomba omusango kundi kwosi

⁹ singa esihanwa khu MWAMI nakuhaan'na habundu undi hosi niharali habwinjil'lo bwe Liheema, salabalwa singa mulala khubandu ba Nyasaye khandi tawe.

¹⁰ Omuisiraeli wosi nohomba omucheni owamenyibwa mubo niyakhaliakhwo inyama nesilimwo amatsahi, OMWAMI alamusuula ne salamubala singa mulala khubandu baabe tawe.

¹¹ Obulamu bwesindu siosi esili mwoyo buli mumatsahi, ne nisio esichilanga OMWAMI nalaka mbu amatsahi kosi kasundulwe khulusambwa kho kahinie tsimbi tsiabandu. Amatsahi niko obulamu, ne kahinianga tsimbi mubandu.

¹² Nisio esichil'le OMWAMI ubooleye abandu ba Isiraeli mbu omundu wosi mubo kata omucheni owamenyibwa mubo araliakhwo inyama yosi nesilimwo amatsahi tawe.

¹³ Omuisiraeli wosi nohomba omucheni wosi owamenyibwa mubo niyakhahiima esolo nohomba linyonyi elirali eliomusilo, okhwola asundule hasi amatsahi okhurula musolo nohomba mwinyonyi tsana ma afunikhekhwo olukuukhi.

¹⁴ Obulamu bwesindu siosi esili mwoyo buli mumatsahi, ne nisio esichilanga OMWAMI nalaka abandu ba Isiraeli mbu baraliakhwo inyama yosi nesilimwo amatsahi tawe, ne omundu wosi owakhakhola mbwo salabalwa singa mulala khubandu baabe tawe.

¹⁵ Omundu wosi, Omuisiraeli nohomba omucheni owamenyibwa mubo owakhaliakhwo inyama yomuruko okufwiye okwene nohomba okwir'rwe netsinyama nabulimo okhwola asaabe tsingubo tsitsie, yesinge omubili, ma alindil'le okhwola khumukolooba ma abe omusiiyikhu.

¹⁶ Narakhola mbwo tawe okhwola anyoole esinyasio khulwo obubi bubwe omwene.